إلى أبـــــا قـــــــاســــم

لـــــن أعـــــود
قلت لــــن أعــــود
يعنــــي لن أعـــــود
مــــــائة ألف كانت ...زياتينك
أم مليـــــــون.


شجيراتك ...أعواد ....أحرقها
إلا تثـــــــور
و يصبــح زيتهـــــا
لثورتي ...كــــــل... الوقـــــــود

لن أعـــــود أبا قاسم
لن أعــــــود
مـــائة فـــــدان كانت
أم في عدد الدموع

أرضــــك صحراء قاحلة
إلا تنبت التبر
بين نهديها
إلا تشق على صدرها
و تثور


أبا قاســــم لن أعود
إلا القهر عنكم يزول
و لــــــن يزول
أبا قاسم
ما دام يحكمكم الخوف و الجوع
ينعي
على دياركم البـــــوم

ترقصون على دقات
قلب الجريح
منتظرين موته و موت الربيع
لذلك أبا قاسم
لن أعود

أبا قاســـم لن أعود
أمــــــــوت جوا
أموت طعما لكلاب البحر
و أموت بينهم
على أرضهم في بلاد الروم

لن أكفن حيا فقيرا مثلكم
لن أموت بينكم
على أرضي ذليلا
لن أموت

و حق دموع الرفاق
و حق الفرا ت (ي)
و حق من أدى الرسالة
و كل من لزينب كتب القصيدة الأخيرة
لن أعود.

لن أعود لــــــوطن
يتربص بي و بالقصيدة.
لن أعود لــــوطن
يشرب على نخب هزيمتنا
لن أعود لـــــوطن
يتلذذ طعم الموت فيــــــــــــنا

لن أعود لن أعود
و جثتي لن تعود
أحرقها
و لن تعود


قاسم قاسم

تــــأمل...غريب

جزيرة زمبرة سلامتكم فيها! إتباعت البارح و ما عاد فيها كلام ! البقية لجربة و قرقنة و في بالي حتى بوغرارة في الثــــّنية ! بالله الناس ألي تسكن على الجزر إتشوف على أرواحها بقعة في الصّحراء أحسن من المشاكل ! باش إنبيع جد بوها على بعضها ! ناقصها صبع القابلة ...بيع لا قعد ! ألي باش إبيع موش خير منـــــــك ! ! !!
وقت ألي الأرض ما عادش عندها قيمة ، علاش باش يظرب الواحد ؟ على حدودو ؟ على عرضو ؟ على أولادو ؟ على مرتو ؟ علاش باش يظرب على حريتو ! على كرامتو ؟ أخر شي إفكّر فيه الشيئ هذا ! و يستحيل باش إصير في بلاد ناصبين بيها في السّوق العالمية
!!!!أش يعملو جماعة البنك العالمي اليوم في العاصمة ؟ يثبتو في حساباتهم ! حوت القرش المالي هبط و ما عاد فيها حتى حل كان البيــــــــــوع ! المصيبة هذه عندها ياسر و الناس راقدة على أوذانها ...و إتقول العام عام صابة !!!الميزانية متع الحكومة عاجزة و مشلولة و ما هيش قادرة باش إتخلّص الموضفين ،

ي الواقع البوليس !!! ماية و ثمانين ألف عسكري لازمهم شهريات و لازمهم كراهب و لازمهم أقلام و تليفونات و ماعون باش يخدمو !!!! و لكن ما عندهم حتى إنتاج !!!! إنتاجهم أمن ! و البلاد إتهزّ فيها السّلاح و شادة بعضها...و العام عام صابة !!! بـــلاد مترّكبة من العساسة و الصّبابة ، كيفاش إتحبو يخدم فيها المهندس و الطبيب !!! كيفاش إتحبو البلاد إتربي الريش !؟
يستحيل باش تاقف على ساقيها تحت نضام قمعي و نضام لا عندو الثيقة في روحو و لا في الناس !!! شرعي ما هوش شرعي !!!! الحاكم في بر و البلاد في بر ...جات المهاف و بدات تذبح ...ذبيحة بلا دم !!! التيليكوم ماتت في الفارغ ...السيمان مشي ..البحر تكرى ...و السماء عمرها ما كانت من إختصاصنا

قالك الدّولة لاهيــة بالخوانجية !!!! و :كانهم ها الخوانجية باش إفكو الماكلة من إفام العباد ...و كأنهم وحوش كاسرة باش تاكل الأخظر و اليابس ! عملية التهويل هذه ...تعدات على التوانسة الكل !!! باش المافيا تستفرد بكل شيئ ...و نزلت عليها ذبيحة ...لحم حي و ميــــــــــت !!! لا شيئ يعلو على صوت ظرب الخوانجية و التنكيل بيهم و بعائلاتهم ...تعدات الرّشوة ! تعدات الغورة ...تعدات الغطرسة ...تعدت كل المشاريع ألي ما تصلحش حتى وصلنا لللّحم الحي ! الأرض

!!!! و هاكم حبستو الخوانجية ! و نكلّتو بيهم ! و شرّدوتهم ! و ثمه إشكون مات و ثمه إشكون مازال يحتضر و ثمه ألي مازال في الحبس و ثمة ألي خرج بلا عين و ثمه إشكون بلا ســـــــاق ...و بالسّرطان ! و بالأمراض الخبيثة الكل .

!!!إنحب نعرف أش ربحت تونس وراء ها المجزرة ! و اش عمل و لاش وصل النضام هـــذا ...هاهم عشرين سنة خلوكم وحدكم ...أعطوني أش عملتو ! ولينا نصنعو في الطيارات ! ولينـــــــا نعملو في الفاكونسات في اليابان ! ولينا من الدّول المتقدمة ! و لينا حاجة كبيرة ! شيئ !!!!! معناتها خسرنا في كل شئ و على كل الأصعدة ...على الصعيد الأجتماعي ....الجريمة ولات كي الخبزة ! على التعليم ...جينا قبل الأخر بنقطة ..على صعيد الأمن ..الناس هزّت السلاح و خرجو جماعة جدد ...الرّحمة لا ...و كي إتهبط مليون بوليس و حرس ما إتنجم إتوقف قنوات فضائية إتصب في الفكر الجهادي من السماء !!!! خصرنا ! في كل الحالات ...في الأول و في الأخر ...و المصيبة الناس مازالت شادة إيديها بنضام ما عاد يصلح لحتى شيئ ...ما عاد قادر على حتى شيئ كان أنو أبيع الجزيرة بعد الجزيرة.

...و حبّت إتفيق الناس على أروحها ! و إطيش المخطاف على الشط ! لا مازال إتهني فيه بالمرشيات الجدد ...بلاد تحكم فيها الصّمصارة مـــــــــألها إتولي جمهورية بنـــــــــــــان : تكثر فيها الأمراض ، تتباع أولادها في أسواق الشجوذ الجنسي و كان لزم حتى قطايع ...العين بدينار و القلب بعشرة ! الفقر ما يظلمش أهلو....و لكن المصيبة ألي أحنا إرتضينا الضلم و عبدنا الحاكم ليل ماتت قلوبنـــــــــــــــــــــا ....و لات ساهلة للبيوع ....بيع لا قعد يا حمد.

قاسم قاسم

كلــــــــــو من التفّاح الحــــرام

لا تفشلّّّّ

لقد أرادو منك أن تكون لا شيئ. أن تكبر فاشلا يائسا بائسا بدون أمل . يا ولدي لقد قتلو فيك الفتوه و الشجاعة و الثبات من أجل حياة كريمة. لا تكن مفعولا به كما شاؤو منك أن تكون. لا تتراجع و لا تتوخى الهرب …إنت مقدام كما عهدي بأخيك الذي مات في قلب السجن ظلما و بهتانا. مات من أجل قصيدة في الحب …مات من أجل رغيف شريف أبى إلا أن يفتكه بعرق الجبين. لم ينهزم و لم يمت بين القمامة …جيفة بين الجيف. كيف ترضى ان يفكر لك و يكتب لك ؟ كيف ترضى ان تعيش كالمسكين بين الشوارع ككلاب العسسة؟ كيف ترضى أن يغتصب رغيفك و يكسر قلمك و يستهزأ بك؟ أليست لك أنفة ؟ ألست حرا منذ ولاادتك؟

كيف ترضى أن تربى الهزيمة في قلبك ؟ كيف تعيش مهزوما و انت الفتى الذي مازال لم يخطو خطوة واحدة نحو الحياة ؟ أتلتجأ للسكينة أم ستنادي بالبحر هربا من من لا شكل لهم ؟ ستكون كلاب البحر في إنتظارك و القارب الذي خططت لصنعه سيقلب كما أنقلب الماء على صدر الأرض. أليست هذه ارضك ؟ اليست هذا بيتك ؟ اليس هذا الوطن وطنك؟ كيف ترضى ان تهجّر من منزلك راكعا لغير لله …خائفا من أشباه الرجال.

يا ولدي لقد هزموك في العمق …هزمو نفسك و حبسو نفسك …و فرضو عليك أن تهاجر إلى البحر إلى كلابه…لأنك لم تعد تثق في شيئ إلا في الموت. يا حبيبي لقد قتلو الحب فيك و قتلو الحياة فيك لتصبح كلبا بين أياديهم …إنطلت عليك الحيلة بعد الأخرى لتصبح لهم عبدا …أن حريتك ستوفر لك كرامتك و كرامتك ستوفر لك خبزك و خبزك سيجعل من هذا الوطن أعرض من البحر كله.

لا تكن غبي يا ولدي …تفطن لمكائدهم …لا تقرأ جرائدهم و لا تتابع محطتهم فهم يريدون منك أن تكون راقصا لا غير...هم يريدون منك أن لا تعرف شيئ …هم جعلو من هذا الوطن ضيقا لك…برغم إتساعه لكل الخلق. هم أرادو منك أن تكون جريمة …متهما حتى قبل القيام بها …لأنهم ليسو اهلا لتربية اجيال و أجيال …لا علم لهم ..و لا دراية لهم بجراح هذا الوطن…أرادو منك أن تكون متسولا أمام ديارهم و أمام حزبهم …أرادو منك ان تتورط لتصبح منهم …إذا حقيرا دون إنسانية دون عقل مفكر دون أسلوب دون حب دون شيئ. نعم يا ولدي ما زلت لم تكتف هذا الوطن لأنك عقمت ضده و لم ترى حبه و لم تتحسس طريق الحرية فيه. كل من التفاح المحرم إن كنت ولدي.

قاسم قاسم

إشبيك داهش

! أشبيك حال فمك
شنوه الي ماكش فاهمو .

فيق و يزي من الرّقاد


وقتاش الحكومة هذه قالت الحقيقة؟ وقتاش الحكومة المتصابية هذه واجهت السياسة بالسياسة؟ أبدا و ما تستنو منها حتى شيئ ! كل خبر إتقولو يرجع عليها بالوبال. الدكتاتوريات ما إتنجم إتعيش كان في الضلام الأعلامي و العلمي و الثقافي، لأنها فارغة و تعرف الي حتى واحد ما هو باش يحميها.

ما هي حاولت باش تشري الأقلام التوانسة المناضلة عبر حمادي التونسي و أش صّورت؟: شيئ. لا شيئ. الضغط إولد الأنفجار لا أكثر و لا أقل. عشرين سنة : سرقة و خطفة و غورة و تعذيب و تشفي في التوانسة، ذبح و قتل و تهجير و قمع، تجويع العائلات و شماتة عين جهار ، أش إتحبوها تصنع؟...تصنع الفكر البسيط و تصنع قنابل إنسانية.

كان البحر حال اللّعب عليها شوية ، سكرو عليها البحر ...الجماعة شدّت الجبل...لا اكثر و لا اقل ...و الحل كان بالبارود...الناس خرجت عن الحاكم و قاتلك على راسي و على راسو ...كانو ما كانو هاذوم ما هم إلا نتيجة سياسة خاربة من راسها لساسها...كانو ما كانو هاذوم ما هم إلا إنتاج محلــــــي تونسي من عندنا.

البلاد اليوم شادة بعضها و الحاكم يرعش و ما هوش عارف أش يعمل؟ و ما عندوش حل و يستحيل باش يلقاه وقت الي ظرب الأخضر و اليابس. و لا تونسي عندو الثيقة في الحكومة هذه. الحكومة هذه لن تجد من ينقذها و سوف تواصل الحرب على الشعب التونسي من شمالو لجنوبو...و أنا معاكم و هجرة الحكيم شاهدة على قاسم و كاتيزوكا شاهد علي اليوم.

القتل و الشماتة ما إولّدو كان الحقد و كان الكراهية و في نفس الوقت تصنع الخراب....اليوم و بعد عشرين سنة من سياسة دربوكة متع المزود... ولى. الرّصاص الحي خدام. لا شفقة لا رحمة ..جرد معتمد يحكم بالأعدام و إنفذ قتلا بالتياري الكهربائي...و إتحبــــــــو التوانسة إتكتف يديها ....و ما تتعاودش حكاية جبل الرّصاص ...ما ضنيت يا جماعة ...القمع و القتل راهو باش يخلق موش جبل من الرّصاص ...بل جبل من الجثث ...

كيفاش إدخل السلاح؟سؤال هذا؟ وقت الي الرّشوه ظاربة أطنابها أي تونسي قادر باش إدخل حتى صاروخ أرض أرض ...أنا أمن ؟ و أنا بوليس ؟ و أنا جيش وقت الي الرّشوة و الحقد و العمى فاض بيه الكاس.

لغة ناس ما تفهمش السياسة الي إقولو : ثمة عصابة و جماعة متشددين و إسلامين متمرّدين ...لغة متع هروب و لغة متع فلسفة ضعيفة و لغة رخيصة و أقل منها لغـــة إتقول الي ثمه مجاهدين و حي على الجهاد و حي على الفلاح و المعركة أصبحت بين الكفر و بين السلام ...اللّغة المعبية بأفكار قريش و الغزوات الي صارت في وقت الرّسول صلى عليه و سلّم.

شنوه الحل اليــــــوم ؟ و كيفاش لازمنا نعملو باش الشباب ينزل من الجبال ؟ كيفاش لزمنا نعملو باش الشباب ما يفقدش الأمل و يلتحق بالسّلاح و البارود؟ الصحيح ...كيفاش لازمنا نعملو باش الناس إتريض و ترجع للخدمة و إتنحي من روسها حل حزب الله.

الشعب التونسي هو المسؤول الأول و الحكومة تتحمل المسؤولية الكبيرة في ها الخوماضة ...إنعم الشعب التونسي الي حاسب روحو فرايجي و ما في بالوش و أخطى راسي و أضرب هو المسؤول على الحالة القارصة الي وصلتها البلاد. إنعم حكومة ضعيفة و حكومة ما هيش شرعية ما هيش قادرة باش إتكون شريك في الحل ...حكومة تبنات على الحقرة للتونسي و على الغصب و على الشماتة ما عندهاش لا حل و لا قادرة باش تلقى الحل...إستقالتها أصبحت ضرورية و طلب لا جدال فيه ...معارضة فشلت في كل محاولتها ..ما نجمتش إتخرج الشعب التونسي للشوارع لأن الخطاب متاعها أصبح خطاب عادم ...معارضة ما نجمتش تتوحد و إتخاطب الشعب بلوغة جديدة إتكون مسؤولة كما النضام على الحالة الناتنة. إنعم معارضة ضيقت الخناق على الحاكم و عزلاتو على كل شيئ ما عاش قادرة باش تصنع الحل بل قادرة كان باش تخدم ( كونتر بوا).

قاسم قاسم

مطلب زيادة في الشّهرية

بالاّزمة ، و بالحرام لا عاد ظارب فيها ظربة كان ما إتزيدوني في الشّهرية على الأقل إتوخلصوني 100 ألف أورو في الشّهر ! و كان بالديفيـــــــــــز ! الدينار التونسي هذا برو أحرقوه ! مل نخدمش بدنــــــــــار خشبي سعدو طايح و كل يوم في النقّص !

شوف يا شعب ! مدّرب النجم الساحلي عرضتو عليه 30 ألف أورو و ما رضاش ! باش إمرّن الفريق القومي متاعكم فيه حداشن لاعب!!!!!! ....معناتها على كل راس عرضتو عليه قرابات ألفين و نص إيـــــــــرو في الشّهر ؟ و أنا ألي لاهي بعشرة مليون لاعب في صفة مواطن ! قداّش إتحبو إتخلصوني ؟
على الأقل على كل راس واحد أورو في الشهّر ! باهي إساعدني عشرة مليون أورو في الشهر يزي ...شاد البلاد الكل من شاملها لجنوبها و هذا الكل موش ياسر عليّ ، راهو عندي برشة خدمة ! و موش مشكلة كل واحد يدفع ما يقارب ألفين فرنك في الشهر ...برى إنقوصوهم من الشهريـات ديريكت و أخطونا من المشاكل و المـــــــــاندات !
إتـــفقنا !!!! ! و كان إتحبو موش لازم إتلوجو على مدّرب...أنا إندّرب حتى الحجر !!! ثلاثين ألف أورو في الشهر أنـــــــــــــا أولى بيهم من غيـــري ! خير من البراني ...التونسي للتونسي لحمـــــــــــــة ! هبرة مشوي متع عيد ! خيرنــــــــــا يمشي للبراّنية يا ظيــــــاع !!!!! يا شعب قداش ما تفهمش !
سيدي الرّئيس تفهم حتى في الكـــــــــورة ؟\

شنوّه ! هبطت من بطن أمي إنجنقل ! رظعتها في الحليب الكورة من بزولة جارتنا ! ولدها كوارجي : نورالدّين ديـــــــــــــوه ! هاذاك الي شاط الكورة من أريانة لحمام ألأنف ...أنا خوه من الرّضا عــــــــــــــــة ! بريمة حتى الكورة باش إنجيبولها واحد من برّه ...هذه كورة يا ضايع : لعب ذر متع حوم !!! هاتهوم الحداشن ملاعبي كان ما إطلّعش منهم الزيت أنا ما عاش رئيس جمهورية !! !!! بالحرام إثنين ثلاثة كان ما إهــــــزّوش كاس العالم ...الطيارة إنطيحها بيهم و لا رجع كلب منهم ...أما الثلاثين ألف أورو في الشهّر ما يرجع منهم حتى دورو !!! عندكم كان الرّجال !!! الكورة و حرتو فيها ! بربي قولولي كانت ما جيتش انـــــــــــا أش باش تعملو ؟ توه التكنولوجيا إنجمو تستوردوها ..ما عندنـــــــــاش !!! أما مدّرب ر ياضة هذه قالتلهم إسكـــــــــتو !!!
سيدي الرّئيس راهي الحكاية !!!!

شنية الحكاية ..حسدني ديريكت في الثلاثين ألف أورو ! الكورة ساهلة ماهلة !ّ اما في بالي موش عاجبك الجـــــــــو خلاص إنت ...أنا شبعان أحسنلكم من واحد جعان ! باش إعبي كرشو من الأول و ما يعطيكم شيئ !!! أنا عبيت و راضي بثلاثين ألف أورو ! شوفتو هذاك ما رضاش بيهم ..و لكن رئيسك يرضى ...لأنـــــــــو إحبكم و إحب بلادو تربح شوية ديفيــــــــــــــز ! خير ما يمشي في جيوب البرّانية و أولاد أش أقول فمي !!!

لا سيدي الرّئيس ...أنا قلت ما عندكش وقت باش تلتهى بالفريق القومي

مهبول حتى إنت يا مواطن ....أنا ما نعمل في شيئ ، كان نحسب في الفلوس ! و كان ثمة ذبيحة نحظرلها...ذبيحة ثلاثين ألف إورو في الشهّر هذه متاعي !!!! الوقت عندي ! و بالفاضل ...البوليسية تخدم على ارواحهــــــــــا !!! بلاد تمشي بالتعليمات !!! المهم أنو الأضرابات متع الكيران و البرط و الصّحة ما إتصيريش !! !!! ما بقى ألي إحب إغنـــــــــــــــي أنا نعطيه الدّربوكة ...المعارضة متاعكم ما إتخوفنيش شوفت و ألا لا ؟ رئيس حزب معارض ...إمرشحني للرئاسة ؟ شوف أش عندي من وقت ! خدمة مخدومة من فجر الأنقلاب ....أفهم ...يا مواطن ...أنا و لا أحد ممرّن الفريق القومي !!!!!

و الله يا سيدي الرّئيس ...إنحب نخدم معاك ...إنعاونك في التدريب !

باهيشي توه ! ولينـــــاش نلعبو بمستقبل الفريق القومي بكلّـــو ! السياسية كاملة مربوطة به ...و إنت ما عندك حتى تجربة لا في التدريب و لا في التدليك و لا في حتى إختصاص من إختصصات كرة القدم !!! لا لا يا راجل ...إنت حتى الكورة ما تعرفش كيفاش إتشوتهـــــــــــــا ...كنت تلعب في داركم بكورة كـــــــــــلاسط ...إتحب تتعلّم في الفريق القومي ...أبعد من ها الطريق ...و سيب عليك من ها المشروع ...معاي ما نقبل حد ...و قداش إتحبني إنخلّصـــــــــــــك يا سي الشباب ؟ بالك طالب خمسة ألاف أورو في الشّــــــــــــــــهر ؟؟
لا سيدي الرّئيس ...طالب تفتوفة !!!!!

تف تف تف ...برى تفتف أبعيد ...تفتوفة !!!! على حساب الفريق القومي ؟ سيب صالح ...و إبعدني ...و جيب الجديد.

رئيس الجمهورية التونسية و القائد الأعلى للقوات المسلّحة
قاسم قاسم

رسالة إلي مواطن 2

من رئيس الجمهورية و القائد الأعلى للقوات المسلّحة
التونسية

قاســـــم قاســــم

شوف يا مواطن ! موش لاهي بيك أنا ! و ما عنديش وقت للحديث هذا ! كل يد شدت أختها من هوكا العام ؟ مشاكلك و طلباتك هذه الكل أمور ما تعنينــــنش لا ياسر لا شوية ؟ فيـــــــــكش من إرّيشو ؟ عندك العــــــــط ! مرحبا بيك في كل وقت ! من غير هذا أنسى !

كان كل مواطن يبعثلي و إنحلو مشكلتو بالجوابات ! ...معناتها بلاش ! لا فرنك لا صوردي في جــــرّتو ؟عاد قولي بـرى أعمل حاجة أخرى أحسن تلقى فاش إتعيش! أفهم يا مواطن : البلاد تخدم بالطريقة هذه ألي عندو العط أكثر هو ألي يحكم ! حرام حلال ...باندة ...خطفة ..غورة : هذه أمور الواحد بينو و بين ألي خالقو ...! يرحم الحاج ما عاش تبعثلي حتى جـــــــــواب ...بالك حال جمهورية على خاطرك ؟ عاد قولي برى حل حانوت كي المعارضة متاعكم ..ألي نهار و مطولو تشّكى و تتبكي ...و تكتب في الجرايد العالمية ...!!! و هاكه بيه و هاكه عليـــــه ....شوف يا مواطن !! !!! أنا الرّئيس متع البلاد هذه و المليـــــــــــــح فيكم ...............فيه ! طابشي خاطرك !

جواب في جواب ...للرئيس ...جوابات هابطة كي المطر ...خصارة حبار و مضيعة للوقت ..ألي يوجعو راســــــــــو يبعث بجواب للرّئيس ؟ لغة هذه يا سي المواطن ! سيّبني ..هابني يرحم ولديك ...أش إتحب نعملّك ؟ ظربوك على صباعك و قالولك أقرب من السياسية ؟ لا إتحط إيديك في المغاغر و لا تلدغك اللّفـــــــــاع !!! إنت يا مواطن ما فهمتش اللّعبة متع السياسية و متع البلاد هذه ! و مازال ماشي في بـــــــــالك ! العدل أساس العمران ...! و ماشي في بــــــــالك الي الرّئيس ما في بالوش ...بسيط إنت يا مواطن في بساطة المـــــــــــاء. شوف تاخـــــــــو مني نصيحة متع رجال : حقّك خوذو بسنـّــــــينك ، كان ألزم !!!! و لا إنسان في الدّنيا باش ياخــــــــولك حقّك بوبلاش ! أنسى الطمع ! و أجهر على ساسك و جدد بنيــــــــــــــو!

شوف يا مواطـــن!
إنت بديت إتمس في اللّحم الحـــيّ ! في المـــــرا ! في المـــــــرا ! في المرا عندي ! أش بيها المــــــــــرا ! ؟ جاتشي لواحد و فكّت منــــــــو فلوسو بالسيف ؟ حطاشي صباعها في جيب واحد من المواطنين ! لا أبدا هذا ما صارش !!!! و إذا كان الشيئ هذا صار ! راهو لمصلحة البـــــــــلاط ! شوف يا مواطن ! نهار ألي عملنا التغيـــــــــــر ! ما عندنا حتى فرنك لا أنا و لا هي ؟ كيفاش باش تحكم و إنت جيبك فارغ ! الغنيــــــــــا متع البلاد راهم مهاف و ظاربين الظربة من وقت الأستعمــــــــــــار ! ماهم خطفو الأراضي و المشاريع بعد التعضــــــــــاد ! أنا و المـــــــــرا نزلنا عليهم ! معناتها و لا واحد جاب حاجة من دار بـــــــــوه ! الكلها خطفة و إتشقليب ! المهم المواطن البسيط ما ظرينــــــــــــــاهش و ما قريبناش منو ، بالعكس عطينـــــــــا للناس قروض باش تعمل مشاريع صغيرة ...و فلوس الطرابلسية و فولوسي ...ألكلهم في تونس ...أحنا قاعدين نستثمـــــــــــرو في البلاد ! أما ألي الجماعة قبلنـــــــــــا فلوسهم في مالطا و في سويسرا و في فرنســـــــــــــا !!! و كلمة الحق لازمها تتقال : الماء الي ماشي للسدرة ماهي الزيتونة أولى بيه ...زوجتي و أم أولادي يا مواطن ! و بنت الشعب ...ماكم إتحبو الرّئيس ياخو مرا بنت الشعب ...من عائلة متوسطة و شعبية ...و كوّنت على روحها... لصغارها. إتخمم في أولادنـــــــــــا و في مستقبلهم ...المهم ما جاتش لحتى مواطن بسيط و فكّت منو خبزتــــــــــــــو :
أبدا هذا عمرو ما صار ! و الحاجات هذه عمرها ما تصير في فجر الشابع من نوفمبر . كان موش منهـــــــــا راني مشيت زيزي و راني خمرت في الحبوســــــــــات ! مـــــــــــرا ولية ! لا إتحبش لا إدبش ! و إنفكر حتى باش إنسلّم ليها الحكم ...إشنوه المانع ! ألمـــــــــــــــانيا و ما أدراك تحكم فيها مــــــــــــــرا ! و هاهي المرا عند كلينتن باش إتشد أمريكا الكل ! قلت أنا و كما العادة تونس إتكون سباقة في الشيئ هـــــــــــذا ....لازمني إنحظّر شوية الشعب التونسي للشيئ هذا ! و بيني وبينك ما عاد عندي الثيقة في حتى واحد ...كان في ليلى !!!!. يا مواطن ! كان إصير ما إصير و يعملو علي إنقلاب ...ماهي العائلة الكل مشات زيزي ...و لا أنا و لا هي و لا الذرية ...عاد أحسن حـــــــــــــل بالنسبة للعائلة ...أنو تحكم ليلى ...لأنها الظامن الوحيد لسلامتي المادية و الأقتصادية ...
حكاية الحزب نحيها من راسك ...هاذوكم كلاب ! تربو على صيفة الكلب ...إتبع و بـــــــــــــس ! إشكون عندو فلوس اليوم في تونس ؟ أنا و المــــــــرا ! القادرين باش إنسلّفو الدولة و إدّورو الدّولاب متع البلاد ...تعرف كان إنهزو إيدينـــــــــــــــا على البلاد تبرك جملة و تفصيلا ...بالحرام لا عاد واحد نجم يشري خبزة ....لازمك يا مواطن إتحل مخكّ شوية ...و تعرف ألي الشرعية اليوم تسوى فلوس ...العط و ما أدراد من العط !

مضاهرات.... قادر نسحقها ألكل من شاملها لجنوبها. معارضة ...و الله و الله لاني حسبها حتى في الوجود. إشكون مازال ناشد على معارضة جعـــــــــــانة في كرشها ...لا تخدم لا إتخلي من يخدم ! !! يا مواطن حل مخك مليح .......مصالحة ! مع إشكون ! معاي أنــــــــــا ! لا بابا ...أنا من صالح و لا واحد ...ما ظلمت و لا إنسان ...ألي ظلم ظلم روحـــــــــــــو !!!! يا مواطن أفهم ! الحكاية راهي المرشي ....عندك حويجة ...إتربحني و إربحك !!! يا مرحبا ! ما عندكش ! أسكت و ألعب قدام داركم ....إش بيك يا مواطن ما إتحبش تفهم ...أنا ما حاجتي بحتى واحد : لا بحزب و لا بحكومة و لا بعمار و لا بصالح و لا برلمان و لا معارضة ! أنا وليت رئيس وحدي و حدي ...و مرتي حمات ظهري ...!!! ألداخل في الرينق ما معاي كان العالي ...إذا موش لازمني دوّتــــك الفارغة ...أنا ما إنجمني و لا واحد و لا مواطن ! الرّاجـــــــــــــال فيكم إشد السيف و يجي إقابلني.
.شوفت أنا ما جبدش على المــــــــــرا عندك ! بكل إحترام ! و لكن إنحب إنوضحكلك حاجة : ثمة تونسي ما تحكمشي فيه مرتــــــــــــــو !!!! ما حكمتش عليسة كما إشتهات و إرتضات ...ما حكمتش الماجدة كما حبتّ ...حكمت حتى سعيدة في قرطاج ...اليوم أتلومو على ليلـــــــــــــــــى ...جيتكم على العين العورة !!!!!! مرتي و إنحبها ! و هي و لا كلب منكم

.قاسم

الثورة السوداء

أخاف أن أستقيل

أتلوى طريح الفراش ...أصبحت أخاف من قلمي...يقتلني

إن لم أكتب ثورةالفقراء

أخاف أغمض الجفن و أرى وطنا كان أخظرا...

فجأة يصبح في أحداقي أسودا يتلوى.

يتلضى هذا الوطن يخاف أن تسيل الدماء

و يرضى:أن تسيل دموع الجفاء

أن تسيل دموع الأمهاة يرضى هذا الوطن بالغربة داخل الوطن

يرضى بحكم الجبناء

ترضى هذه الأرض بدفن الكبرياء

يرضى هذا البحربأكل لحم الفقراء

يموت هذا الوطن مستغرقا في حلم البـــقاء

ألاّ يجابه ...

أن يسكت

أن يشرب العلقم

أن يتأوه أن يغار على زينب

أن تعرىأن يزنى بها ليلا

ألاّ يقاوم

أن يستقيل حقنا للدماء

إن كانت حقا دماء

.ماء...دمائكم بني وطني

عشبا أكلكم

أرضكم تلك التي رفضت قاسم !!!!!

رفضت عصفور الفضاء

أبدا لن ترتوي

إلا أن شبعت ا دماء.

قاسم قاسم

جـــــــــنة و أطرافك نـــــــــار

الرّئيس :

إشبيها الناس هاجّة ؟ من البلاد يا سي الوزير؟ في إشكون باش نحكم أنـــا، وقت ألي كل واحد يجمع ديبشو و إيزيد فيه؟ فهّمني شنية خدمتك إنت ؟ لاهي بالحدود و إلا لا؟ إشنوه الفضايح قدام العالم الكل : عندي ناس جاعت ! ما لقات ما تــــــــــاكل و الخبز إمطيش في كل بلاصة ...وينو وزيــــــــــلر الزّبلة !!!!؟
جابو وزير الزبلة :
ما عادش إطيش الزبلة ! عطيهم الفظلة يا فظــــــــــلة. من اليوم مازال نسمع بواحد هاجر و إلا خرج من البلاد بسبب ضيق العيش ...راسك إنقصّو ! الناس الكل لازمها إتبات شبعانة : على الأقل نص شبع !!!!

سيدي الرّئيس : كنت ماشي بمقولة جــــــــّوع الكلب إتبعك !

ما عاش إطبق المقولة هذه ! و إنساها ! لازمك إتبدّل الأستراتجيـــا ؟ شوف كيفاش إتنقّلهم من القرية متـــــاعهم ! ما عاد إتخلي حتى واحد يسكن بالقرب من الحدود! دخلّهم ألداخل !!!! شوف كيفاش تبعد على الطريق و إعملهم مخيّم يسكنو فيه ! و إلا تعرف كيفاش : أنا موش باش نعملهم خواتم على قد أصباعهم : ألي عجبو عجبو و ألي ما عجبوش يشرب ماء البحر !

لكن إتقرّب ألداخل البلاد ...بالك يرجعو عليك ...ألي خرج خلي يخرج ! بأنقص واحد ! ما الله راحة من خبازة العيش النيّ.
باش تفهم إنت! كان إتحل اللّعب ، بالحرام كما الشعب بــــأكلو يرحل و لا قعد واحد ! العشرة مليون تونسي يقلبو و أخلوني وحدي.... بـــــــــلا شعب ! باش رئيس عاد !؟ عليك إنت و جماعتك الصّبابة ...لا لا لا أنا الشعب إنحبو ...إنحبو يقعد ضعيف !؟ عريان قريان ! و كل مرّة إطيشلو حويجة يلتها فيها شهر و إلا شهرين ...سكّر علي ها الموضوع متع الخروج و الهجرة الجماعية ...و إلا تعرف كيفاش ...حطّوهم الكل في الحبس باش تشعف العرب الكل و ما عاد يخرج حتى واحد من الجنة الي حليتهالهم !!! هنا جنّة الشابع من نوفمبر ...

عاد إتولي جنــــــــــة و أطرافها نار ، سيدي الرّئيس ؟

تتمنيك على الجمهورية ! إنعم جنة ! البلاد رجعتها جنة و نص ! و كان موش مني راهي البلاد عابثة فيها الــــذّيوبة ! أشبيه عاد كان قرية و إلا زوز خرجو !؟ ما إنجموش إرّضو الناس الكل ...كثرة الدّلال راهي إتّهبـــــــــل ! لأني الشعب إمدللّو ياسر ! الناس الكل عندها المــــــــــاء و عندها الضّوء و في كل حومة ســـــــــتاد كورة! إشبيه عاد لازم الناس الكل تاكل بالعلوش !!!! بالزّبدة !!!! هونا العنكوش رخيص ! كسكي بالعنكوش من أحسن ما تاكل ! و خبز بالزّيت أحسن مليون مرّة من الخبز بالزّبدة و الفرماج ....الماكلة العربي راهي نافعة ياسر ...فسّر للناس الشيئ هاذا!

كوني هاني سيدي الرّئيس ...توه إريقلها الحكاية هذه متع القرى الحدودية !!!!

ماعاش إنحب نسمع بناس هاجرت و خرجت من البلاد بسبب الجوع و الفقر أبدا ! كان ألزم ....إنت تعرف كيفاش ...عارفك كبير و تفهم !!!؟؟؟

نتخــلّصو من الجاعانين و الفقراء الكـــــــــل ؟ سيدي الرّئيس ! أنا إنشوف هذا أحسن حل باش الجنة إتولي أطرافهـــــــــــــــا بردا و سلاما .....و لكن الفقراء راهم برشة على الأقل الشطــــّر متع البلاد ....؟؟؟

بدات المشاكل !!! يا سي الوزير ...تعرف كيفاش ...إنت مطرود من اليوم ! وجهك ما عاش إنحب إنشــــــــــــــوفو !!

أمرك سيدي الرّئيس !!!
إقلب وجهك

قاسم قاسم