المشاركات
شد بطنك بالضحكبيع لا قعد يا حمد****للتسجيل في مدرسة الديمقراطيةصبو 25 دينار في 2626و عينك ما رات العمى*********صارى باش إتعلّمنونا الدّيمقراطية، ولاة مادة إختارية و إلا إجبارية. على من تقرى في زابورك يا معّلم أخر زمان. قالو تعرفش الدّيمقراطية، قالو إنقري فيها في المدارس الأبتدائية. أب الديمقراطية التونسية، بأخر ما طلع، طلع بديمقراطية تصّرف في السوق السوداء. أه يا بو قلب كي غلّبتو علينا حتى الدّجاج.الي ما يدري إقول سبول. على ها الطّلعة المليحة متاعكم لازمنا نكتبو دستور جديد بالدّارجة باش يتفهم على الطريقة الصّوقراطية. برى ...عاد ...الدكتاتورية باش إتعلّمنا الديمقراطية ! موش عجب ريس العالمين هذا. الكلام هاذا إجنن موش إدخل للحبوسات. ما لقو بها وين، قالك هاهو نبدو إنقرّو في التوانسة في الديمقراطية في المدارس الأبتدائية و بالشكل هذا توه نحل المشاكل متع الشعب الكل، إنشاء بعد عمر طويل. إستني با دجاجة ليل إجيك الشعير من باجة، كان حرثو و العام جاء صابة . أش قال و أش قتلك الدكتاتورية حابة إتقول بألي الشعب التونسي ما زال ما إنضجش باش يتعامل بالديمقراطية و لذلك لازمنا إنقرّوها كمادة إختارية في السّداسي الأول متع كل عام دراسي ...و ألي ما إيجيبش عشرة من عشرين في مادة الديمقراطية إنحو عليه الجنسية التونسية.و الله كلام مدهون بالزّبدة و الله خرافة كبيرة طلع بيها أب الديكتاتورية التونسية. يا سيدي المادة هذه ما هي موجودة في حتى مدرسة في العالم كان عندنا في مدارس بن على الأبتدائية و الثانوية. إنشاء الله ها الخط إنبت ...و كان نبّت حتى بصلة يا جماعة إيدي إيجو قصوّها...الديمقراطية يحسبوها مادة تتقرى !!!ما هيش تجربة تعاش في الشارع و في السوق و في التلفزة و في الأنتخابات و في البرلمان. يا سيدي إحب إقول هاهي لعبة الديمقراطية ألعبو بيها مع الأولاد الصغار و ما عليكمش في الحكم و في البرلمان و في مدى الحياة و في الصّحافة و في المساجين السياسين و ما عليكمش في حتى شيئ هاهو أنا إنخمم في بلاسطكم و إستنو حتى ليل أولادكم يتعلّمو الديمقراطية و من بعد توه إنشوفو مع ولدي سي حمد. دولة و حكومة ولات تلعب بالمفاهيم و تتخبط في كل شيئ ...المهم الصّحيح لا. و جابو المخرجين الكل و قالولهم شوفنا حل مع أيات الديمقراطية و شوفونا حل مع المعارضة السياسية ...غلبنا في ها الجماعة و ما لقينا معاهم حتى حل. حك راسو واحد فاسد منهم و قال : أحسن حل ، إندخلو الديمقراطية كمادة أساسية في الباكلوريا، بالعربي إنشلكو المفاهيم الكبيرة هذه و أرجعوها كما فن فاطمة بوساحة. التجوّع هذا وصل إلى حد الرّذالة و جعل من كل ما هو شيئ عندو معنى، بصلة. تشليك المفاهيم، من صدق و من عمل و من كرامة و من حرية ولى إختصاص ها العصابة التونسية الي حابة إتعديها حتى على العالم الكل. وصلو لدرجة من التفاهة إلى أنهم ولّو سيرك أمام العالم. كل شيئ عندهم تافه لأنهم تافهين، كل شيئ عندهم أصبح بلا قيمة لأنهم ما عندهومش قيم و أخلاق كبيرة. هاؤلاء المجانين أصبحو عجّز بأتم معنى الكلمة. وصلو بالثقافة التونسية إلى حد القبح و جنّدو التافه و أخوه، الساقط و خوه، الحمار و خوه من أجل طرح ثقافة الخور و ثقافة الرّذيلة و ثقافة الزّنا و ثقافة الكذب و النفاق و السرقة و الهمج و تدبير الرّاس ...ناس فقدت الثيقة في أرواحها و ما لقات باش إتواجه الفكر الصحيح كما بلغة الخشلة و لغة الي ما عندو لغة. الكل أصبحو علماء و الكل أصبحو يعتزو بالمكاسب الي حققتها تونس، وكأن الشي جد عليهم و ألي تونس ولات دولة كبيرة و إتصدر في الأدمغة و القطايع متع الكراهب و الصواريخ و الدّبابات. و في الواقع البلاد هذه في عهدهم أصبحت أتصدر في نساها ألى طيوان باش إتصّور أفلام الجنس. بلاد إتصدر في أولادها عبر البحر باش ما يوصل كان في شكارة وإلا ياكلو حوت البحر...هاذا ما وصلتلو الدكتاتورية و هذا هو الصّحيح و اش قاعد إصير على الساحة السياسية في الدّخل و الخارج. قالك عندنا حضارة كبيرة في تونس منذ خمسين سنة و صانع التغير كتب أعز كتب و التجربة متاعنا صدّرناها حتى لأمريكا و لفرنسا و لليابان و كل الدّول في العالم شادة علينا الصف باش تتعلم الديمقراطية متاعنا و الحرية متاعنا و أولى الشيخ الكبير منظر للعالم ...شعرة وحدة لا أعطوه جائزة نوبل...التجمع يا سيدي، أكبر مدرسة في العالم في كل ما هو خمج و همج و بوسعادة، طالب باش يعترفو بيه كحزب إشتراكي عالمي و طالب حتى جائزة متع غـــــاندي...يوصل بالواحد الكذب على روحو ليل يغلط و ماعاد يعرف لا أش إقول و لا أش يعمل و لا كيفاش إفكر...غولة، إغول في التوانسة التجمع و حاسب روحو ما بعدو حد و كان جاء من عندي ...كلينكس إنضف منو. اه..الرّاجل ...شاد الطريق بالباندية متاعو ...قطاّع طرق و قالك أمن و أمان و ديمقراطية ...داخل على الناس في إديارها ...إفك في أولاد الرّجال و في نساء الرّجال و قالك دولة و حزب و هيبة و هيأة و زمارة فارغة. هذه دولة و هذه مسؤولية و هذه مدرسة باش ولدك يقرى عندها الديمقراطية. عفوا هذه مدرسة متع مشاغبين و متع ناس باك ما عندهاش متع ديكتاتورية لا أكثر و لا اقل. بلاد غيارين على بناتها و على أولادها و على خبزها و على قمحها و على شعيرها. إنعم هذه عصابة لازم نتخلّصو منها و في أقرب وقت ممكن. • أش أحب عندي ...زعمة • برى شوف يا قاسم ...قالو الجزيرة متع القطعاية محطوطة في الميزاد العلني• بيع لا قعد يا حمد هي خاربة ....خاربة بيك و إلا بلا بيكو أنا ماشي ..ماشي ....يا دنيا ماشي.إمشات ...هي بالسلامة و أول الغيث قطرات ...و الصحيح مازال القدّام. كان يسلم جبل الشعانبي إنسمو رابحين. أحسن شيئ كان أهل القصرين إيفيقو على أرواحهم و يدقولو كابل حديد في الأرض...عارفو باش يمشي زيزي كالتليكوم. جبل و إطير .حلواشي هذه ...أنا سمعت الي تحتو كنز كبير متع ذهب و كما تعرفو الميزانية ناقصة و عمرها ما هي باش تلقى ميزانها في لداما الجماعة شدينها. و لا عام قالو العام هاذا صابة ...ديمة زمة ...هات أش إحركها الميزانية ...المهم البرلمان قررّ باش إيبيع الشعانبي ....بيع لا قعد ...بيع لا قعد ...الي باش إيبيع ما هوش خير منك يا سيد الرّجال.عمرت جربة و نبحو كلابها!!!! جربة عمرها ما تعمر كي يبنو فيها ألف وتيل : أهلها صرافة فلوس ...الطايح مرفوع و نادي بالجرف. جربة عمرها تعمر و القنطرة كان ما عملوهاش الرّومان و الله ما يعملها التّجمع كي يذن رئيس الشعبة الكبير. كلام هو و إلا لعب ذرية ...فرق كبير بين الي يبني و بين الي إهدم ...إستر ربي خلو الفرنسيس شوية إنفراستريكتير في البلاد ...لليوم و العجل إدور على هاك الكياس الي ماشي لصنهاجة. المدينة هاكي ما بقى منها كان الأسم ...خاربة كي العادة و عمارها ما إيجي بي بيوع الحنايا....و الله أش قولكم كان إنبيعو الحنايا ...أش نعملو بيهم ؟ ما هي كانت غلطة متع فيزياء ...الجماعة هاذوكم ما كانوش يعرفو الي الماء إنجم يطلع الصعدة !!! اليوم هانا ولينا نعرفو الماء كيفاش إيسيل؟ الماء الي ماشي للزيتونة الطرابلسي أولى به؟ و الله كان نعرضو الحنايا على الأمريكان تو يشروهم و يحطوهم على الميسيسبي و إيقول أحنا هما الي بنيناهم؟ إشنية قيمتهم قدام الميزانية الميزره...الناس لازمها الخبز!!!!لا كلينا و لا شريبنا و يرانا إنموتو بالجوع كان باش إتبيعو الحنايا و الشعانبي ....و كان إلزم الكنيسة الرومانية متع قرطاج. الحاجة الوحيدة الي ما تتباعش هو قصر قرطاج لأنو على ملكهم من هاك العام ...و ما الي ساكنو كان كرّاي ...مكلف بمهمة لدى البنك الدولي ...البلاد حاطها في الميزاد العلني و العباد كي الكباش...كل مرّة ينزل على واحد ...و لا إشبع دم و لا أشبع فلوس و لا أشبع لحم ني و طايب....بيع لا قعد...زرق السيد الوالد هو؟ما ثماش قاز في البلاد و البرميل بترول بهاكي الحسبة !!!و كل دولار زيادة إكلف الميزانية خمسة وثلاثين مليون دينار زايد ...إزح و كأنهم يستنو وقتاش إيزيد البترول باش إيزيدو في البيوع و إقيدو على القاز و على الميزانية...ما نحكيلكمش كيفاش ما ثم حتى نيمرو صحيح و لا عدد إوافق الأخر ...الميزانية ديمة ناقصة و البترول ديمة في الزيادة و شد يا حمد ...زيد الدقيق زيد الماء...هاذي هي الميزانية متع تونس الشابع من نوفمبر....إنقذها البلاد ...كما حب وإشتهاء...و مازال كان باش يتهنى عليها و يرهنها عند خوتنا في الدم. بيع لا قعد ...أرجل منك الي باش إيبيع هو؟الصحاري الكل فيهم بيترول كان صحرتنا ما فيها شيئ ؟ لغة هذه و إلا البرامل من ثم إلى ثم و عينك ما رات العمى ...و الميزانية و لا فيها قطرة مازوط...ما سمع حد ما رى حد تونس ما فيهاش بترول و الصحراء متاعها موش صحراء جنة على وجه الأرض و حتى اللفاع ما فيهاش ...ماية في الماية اللّفاع التونسية من جنس بشري إتمص الدم و البترول كيف كيف...باهي ماهي حد بالحد صحرتنا مع صحراء ليبيا و التزاير ...إشبيهم عندهم و أحنا ما عندناش ...تستحفضو عليه للأجيال القادمة ...و الله ما في علمي باللغة هاذي ...و إشبيكم جبل الشعانبي معلقين عليه ...للبيع......بيع لا قعد خاسر عليه إنت.ثماش حاجة تنباع اخرى من غير معمل السمان و معمل الحديد متع بنزرت ؟ إيه عندك بحيرة إشكل ...البحيرة هذه في جرتها كان المشاكل و الوشواشة و حتى الطيور المهاجرة ما عاش هابطة فيها !!! أش نعملو بيها ...لا حوت ...لا إشباك ...لا غلة لا ثمرة ...زايدة علينا و ما يسكنها حد ...بيع لا قعد ...خاسر عليها إنت ...مشكلة و لات إشكل هذه ...هنا نكتبو بلا شكل و بلا معنى و لا بلا موضوع و بلا هدف ...تي حياتنا أصبحت بدون معنى ...قراتنا زايدة ...معارضتنا أزيد و أزيد ...ناقصها كان صبع القابلة ...بيع لا قعد يا حمد.شط الجريد عندو سنين ملاح يا ولد ...راهو أربعة ماية غرام ملح في الّلترو ؟ أش نعملو بيه ؟ و قداش من جماعة حبو يعملو التحاليل متع الماء متاعو و ما إلقاوش حتى معدن فيه ...الشط هذاك أفقر شط في العالم ...خاثر ياسر حتى الكانوطة ما تمشيش فيه...ما فيه حتى مصلحة ...تي وللى مقلقنا ...راجع على النخلات و باش يقتلهم في السنوات القادم ...ما فيها حتى حل يا قاسم كان البيوع!!! عجب !!! زعمة ما فيهش حل؟ حتى إنموت أنا و من بعد بيع !!! الميزانية يا قاسم ....فارغة الناس باش إتموت بالشّر....الله إشرك بطونا ...قولو أمين يا ربي العالمين ...الله إحرم علينا العلفة ...ناكلو القرط ..إن شاء الله و ما إتبيعش ....الله يهدي من خلق ...إسمع ما يشريه حد ...بالحرام كاما إنبيعو بالتلفون ....بيع لا قعد بيع لا قعد يا حمد ...واش أقعد؟ ثم مسرح قرطاج ...و الله يشروه الطليان ...جرّب حطو على السيت و إشوف!!! و الله فكرة البيوع بالأنترنات ...أحسن حل أنو كل شيئ ولي بالمكشوف علاش ها المشاكل عاملها أنا ...ما هو كل شيئ من غادي لغادي و الشراية إتصب في الفلوس في سوسيرا و عينك ما رات لعمي. ...ما عندنا ما نعملو بيه مسرح الكلو حجر قديم ما يصلح بحتى صوردي ...بيع لا قعد ...مبروك علّي شاريه. زعمه أشكون يشري مسرح كي قرطاج؟ الي يعرف قيمتو بالطبع...و قت الي ما عاش عندو قيمة و الي إيجي إغني على الخشبة متاعو ...وقت الي دخلاتو فاطمة بوساحة ...المسرح هاذا لازمو يتباع و في اسرع وقت ممكن ....بعنا يا سي قاسم...بيع لا قعد...يجعل لا باش ولــــــــــــــــــــــــــــــــــى يا ولد.الميزانية مازالت ناقصة !!!!!!!!بلعت الحنايا ...بلعت الشعانبي ...بلعت شط الجريد ...بلعت مسرح قرطاج و مازال طالبة ...أش بيهم جواعة التوانسة ؟ أش بيهم ؟ مكنهم الشر؟ يا رب إتنزل علينا مصيبة باش تمحقنا من وجه ها البسيطة ...يا قاسم الميزانية ما فيهاش الشهريات متع المعلمين ؟ ما إتخلص حد الشهر هاذا ....لا لا لا إيثورو عليّ كان ما إنصبش الشهريات ...الي ما ثارش على وطنو ما إثور على بطنو!!! غالط يا قاسم ...ما كش فاهم التونسي : بطني قبل وطني !!!!!إشنوه الوطن إمتعك يا قاسم ؟ جبولات و حجر أش نعملو بيهم ...اليوم خمر و غد امر .....بيع لا قعد يا حمد. الميزانية كيفاش عملنا فيها مازالت ناقصة ؟ اللّجم ؟ مسرح اللّجم بيع ولديه ...عندو ألف سنة واقف و ما صنع حتى راجل ...عندو ألف سنة واقف و ما صنع حتى مخرج و حتى فنان و حتى ممثل ...ناقصنا كان المسرح أحنا ....أحنا مسرح للعالم الكل ...أحنا سيرك عمار ....بيع لا قعد الّجم اللّكلها بعبادها بكلابها بعلالشها بجمالها بنساها برجالها كان ما زال في هاكي البلاد رجال.....حط على السيت ...و خلي العالم يتفرج علينا كيفاش إنبيعو في دبشنا....إتباع ديريكت يا قاسم في الساعة الأولى متع العرض على الأنترنات....يعطك الصحة في الفكر منين تخلق فيها ....و إنت يعطك الصحة في الشراية منين إتجيب فيهم؟ألو ....السيت متاعكم ولات أشهر سيت في العالم ...شكون ..وزير المالية ...أش إتحب..... المزانية مازال ناقصة شهريات الطّبةّّّّّّّ!!!!وقتاش لازمك باش إتصبلهم ...غدوة أخر أجل يا جماعة ....شوفولي حل: ساهل الحل ...هات إنبيعو إبن خلدون ...صنبة واقفة منذ قورون ...أش كتب هو و إلا اش عمل ..ما هو قال العرب المستعربة ما إتنجمش تعمل ديمقراطية و رانا شعوب في عوض باش تبني قادرة كان على الهدم ...هاني نبني في الجمهورية الثانية و في الديمقراطية و في قصر في الأرجنتين...بهيم ما يعرف شيئ إبن خلدون ...حط على السيت ...و بيع ولديه حتى بشهرية طبيب وحدة. بيع لا قعد يا حمد.ثماشي حاجة مازال ما بعنهاش ؟ الميزانية مازال ناقصة !!!!أش ناقصة ؟ ناقصة شهريات البولسية ؟ بيع الحبيب ...البطو متع المهاجرين !!! مروحين لواه العام هذا : البلاد إتباعت ...توه يوصلهم كل شيئ غادي ...و البولسية كانت تبعثهم الكل يخدمو غادي يرظاو بالحل!!!!!جرب و شوف بطو قرطاج ...شنوه حقو ؟ ما إيجيب شيئ ..ما أحسن تعطيه للبولسية يصرفو فيه و يخلصو من جلود عمالنا بالخارج ...قالها راجل ...بيع لا قعد يا حمد.ثم حاجة وحدة مازال ما إتباعتشي؟ طلعاهوعا شنية ؟ المعارضة يا جماعة لازمنا نستحفظو بيها ....بلا بيها البيعات الكل تبطل .....حاجة وحدة ما تتباعش و ما تتشراش طلّعوها شنية ؟ ....شوكة قي حلق التّجمع ّّ....تونزين...و جماعتها....
رئيس الجمهورية قاسم قاسم
