21‏/09‏/2008

الجربــوع

جمهورية قاسم
تقدّم بيق تراب بوي
في الشريط السنمائي الطويل
الجربوع

الأهداء لمصباح بن جربوع
لزكية الضفاوي
-4-
· قالها و حصل : بيق تراب بوي !!! مصباح بن جربوع ؟ و لا عظم قعد فيه صحيح ؟ أش لاز حمّه إفيق بكري ؟ و أش إمدخل حمّه في ها الشكشوكة ؟ حكومة و طرابلسية و بن علي و يسار و يمين و معارضة ؟ عملة و عملتها بروحي ، بره فكني من ها الحكاية و إنكلّم جربع ، إنقولو إنفدلك عليه ، راني لا نتكلّم لا بأسم الطرابلسية و لا بأسم الحزب و لا بأسم على و إلا صالح !!!!! و سيّب عليك من الحكاية هذه جملة .
· قاعد كي وصل ! حط الكرهبة في القراج ! خذى التلفون و باش يطلب عاشور ناجي ، جربع متاعنا ....قبل ما إنوقز عند المستشار ! تتبدّل في مخو الحكاية الكل ! و إقول نصدم على العملة و ألي باش إصير خلي إصير ...ما هي أخرتها حبس و إلا موت !!! ز عمة !
· ماية خوانجي مصالح مشكلة هذه !!! و علاش لا ؟ ما إدربهومشي اليوم قبل غدوة ! حكاكيتهم سالهلة و قادر حتى باش نقنعهم ...و حتى كان أمشو هوما زيزي ، أنا خدمت خدمتي و خلصت بالمسّبق .
· لا ماكلة لا شراب ...لازمني إنولي خوانجي توه !!!! نبدى إنصلي لكن كيفاش ؟ كان جاء عندي الدّم الفاسد ، راني إمشيت لحانوت قاسم و نحّاهولي ...و رجعني خوانجي ! نقضي قضيتي و من بعد إنقولو رجعني كما كنت ...زعمة العملية ريفارسيبل ؟
· وقف قدّام المرايا ...دخل جبد الجبة متع السيد الوالد ( سلّم عليه جربوع ) لبسها ! طويل و خشين ، خرجت عليه ...حجّم شعرو بالاّم و زاد طاقية بيضة ، كيف كيف جات خليقة ...كمّل بلغة و شد سبحة و قعد قدّام المرايا إشوف في روحــــــــــو! إقيس ...لبس شخصية خوانجي بالكامل !
· رجع ألتالي ...قعد على القاعة ...قرى يــــــس !!!! أقام الصّلاة و صلى صلاة الأستخارة ...دعى دعاء الأستخارة ...و قال يا ربي لعمل عليك ...و لا جاه النوم و لا دار بيه ...الفجر ، خرج للجامع ! قبل حتى ما يذّن الأذان ...الراّجل في قلب المحراب.
· قال ، كان ثمة مصالحين ، خوانجية ، توه إيجو إصلّو صلاة الفجر حاضر ...و بشوية بالشوّية نتعرف عليهم ...في جمعة إنجم إطلع ماية و إلا حتى أكثر.
· أصلي و مخو في البيع و الشري متع العباد ...و كيفاش باش يقنع ناس ربما لا ناقة لهم و جمل في كل ما يحدث في البلاد ...و عارف هو الشيئ هذا ...و ها المساكين كانو النــــــــــــّار و هوما حطبها !!! كل شيئ يطبخ على ظهورهم ! في الرّكعة الثانية ، بالضبط ...إتجيه الفكرة ...جات كلبة بنت الكلب : قعد ساجد على أركايبو ...حتى كمّل الأمام الصّلاة الكل ...و حتى من الدّعاء ...حتى كمل في مخو السيناريو ...نقطة نقطة ، حرف حرف !
· قام ، لا تحى و لازكى و لا هم يحزنون ...سلب الجبّة و البلغة و خرج في سروال حافي القدمين ...يجري للدّار ...خوانجي ما إنجيش ....إنا كل شيئ إنجي كان خوانجي ....

رجع بيق تراب بوي كما كان ...جربوع .

صمصار الخوانجية ...عندو الحل .


· قداش طالب يا سي الجربوع ...با خي مثّبت في النيمرو 100 و إلا زوز ! ماك عارف ما نعرفش نحسب ياسر ! قداش من واحد خوانجي و من أي نوع ...و على أناهو مذهب ...عندي المذاهب الكل...مالكي ، حنبلي ، شافعي ...
· خظراء و ما قالت الشكارة ...المهم ، خوانجي ...بلحيتو ..راهم باش إقابلو الرّئيس ...شوفو هاذوكم الرّايضين ...متع مصالحة و دوّة فارغة...و العدد 100 كعبة ...واحد ناقص لا ....
· على قدّاش الرّاس ...يا جربوع ...راهو موش كيف كيف !!! الحنبلي أغلى شوية من المالكي
· ألـــــــــو يا هشومة ....المذاهب موش مشكلة ! أبعد على مجلس الشورى ...المهّم جيبهم ...من النوّع الباهي ...كيفك أنت يا هاشمي
· ما قوتليش بقداش الراس ؟؟؟؟ خلاصي ، قبل كل شيئ ؟
· مليون على الراس ...يا هاشمي ...ما ثماش تسبقة ...وقت ألي إتليفري تاخو متعك على فرد فرنك ...
· إسمع كان إنقصت شوية ...إتعاوني ، أنخرجو جماعة من الحبس ! إنت تقضي قضيتك و أنا كيف كيف.
· المهّك إكون مصالح ...و يعترف بحكومة بن علي ...و يطلب السماح ! موش مشكل
· إتفقنا ....يا جربوع
· إتفقنا ....بسرعة ...راهي الحكاية ...سريّة للغاية ...و مسرعة ! عندك في يدّك أربعة و عشرين ســـــــــــاعة .

قاسم قاسم



الجربـــــــــــــوع...و الكسكي دياري



يا سيدي ، المعذرة و كل المعذرة على التأخر متاعي ! ما جاوبتكشي في الوقت ! !! أولا ما نعرفش إنفازي ...و اللّغة هذه ما إنحبهاش جملة و تفصيلا ! أنا جدي للغاية !!!! أما علاش الكتيبة إتجي بتواتر غزيز ! هذا يا سيدي راجع لأصل الحكاية نفسها. بالعربي قاعد إنـــوّلد في الفكرة ، نفسها باش تخلق فكرة أخرى ...il faut pousser l’idée , pour faire extraire une autre , disant, je cherche le finish. و لكن أحيانا بدون جدوى ! إذا لابد من المحاولة مرّة أخرى .

سيدي الكريم ! باش ناخذك على حد عقلك كما قلت و إنحاول باش إنفسّرلك شوية الحكاية ...متع الجربوع هذه !!! يا سيدي الحكاية هذه إتحط على الطاولة الثقافية و السياسية و الأجتماعية كذلك : موضوع ثقافة الأستسلام و الأنتضار ! عبر زوز من النــــــــــــــاس كبارات في التاريخ التونسي : العلاّمة عبد الرّحمان أبن خلدون و بطل المقاومة الوطنية مصباح بن جربوع !!!! بالطبيعة في شكل أخر موش الشكل الي تعرفو إنت و تعرفو الناس الكل ! الكلاسيكي للكتابة .
جربع في دور أبن خلدون ...يتقرّب من السلطان و في نفس الوقت إكنبلّو ! و كان يلقى فيه ظربة ما إرجعاش ...و هذا يا سيدي المرض ألي خلى تونس ألب اليوم بدون دولة مسؤولة ...بل شعب في خدمة الدّولة موش دولة في خدمة الشعب ...أبن خلدون ...حياتو كاملة عدّها من بلاط ألي بلاط و ما وصلش لحتى شيئ في البحث العدل ألي كتبو ....ختم حياتو السياسية بالتفواض مع المغول ( تشنقيسخان)...شوفتو أبن خلدون ...و لا مات و لا قال إنموت ..بل موجود حيا يرزق و موش واحد ...قول مليون منو ...في العاصمة ...يتحرّكو و يشربو و يكتبــــــو كل يوم في الهزيمة ...ناس ما عاندهاش مشروع ، رؤية واضحة ، بل مشروعهم الوحيد كتابة الهزيمة و إستمراريتها . هذاك علاش تونس اليوم ما إتنجم تاقف على سقيها أبدا !!! نخبة، يا كسكسي دياري ما إتوصلتش باش تقطع مع سياسية أبن خلدون .

جربوع ...يلعب في دور مصباح بن جربوع ...و لكن في شكل اخر تماما و بعيد جدا على الجبــــــــــال و على السلاح و على الكّر و الفـــرّ ....مصباح بن جربوع ، إذا كان ما كانتش عندو رؤية صحيحة و فكر سليم ما يطلعش الي الجبـــــــــل !!!! بشكل أو بأخر ...الفكرة ألي يحملها في راسو هي ألي هزّاتو ألي المغامرة بعد المغامرة فألي الشهادة من أجل الوطن. جربوع أو بيق تراب بوي ...يا سي كسكسي دياري مازال ما وصلش باش تتوّضح عندو الأمور ...و مازال قاعد ضايع فيها .....تاوه إنشوفو كيفاش باش البطل هذا ! إولي إميز بين الخيط الأبيض و الخيط الأسود ..ثمة خيط باش إخرجو من الوحلة و ثمه خيط باش إيزيد على ما بيه ....في إنتضار الحلاقات القادمة !!!

الحكومة ، بن على و الطرابلسية :::: يلعبو في دور القبائل المتناحرة على السلطة ! و هذه حقيقة لا جدال فيها ...معناتها كل شيئ إتقدّم إلا طريقة الحكم في تونس ألي هي سبب كل تخلّفنا و سبب المصائب ...الحزب نفسو هذا ! حزب قبلي لا أكثر و لا أقل ...و في صراعات جهويّة أكثر منها فكرية ! علاش لأنو ما عندوش رؤية واضحة ...إذا ساهل ياسر باش الحزب الخارب هذا يركب عليه أي إنسان عسكري ...

المثقّف التونسي ...ضاع في الصّراع القبلي هذا ...و أصبح سبب من المشكلة في حد ذاتها ....إنعاود إنقولك ...مشكلتنا في تونس أولا و أخيرا : هي مشكلة المثقّف ....،.الفرايجي ...، ألي إفازي ، ألي ما زال ما فهمش و ما هوش حاب يفهم ...ألي الـــرّبح ما إنجم إكون كان بالقطيعة نهائيا مع العشوائية السياسية أولا و ثانيا بتحديد الهدف !

صديقك قاسم