المشاركات
الفصل الأول : محل حلاقة ممنوع على الأيتام
عم حمادي الحجام، شلاغمو معنقرين يركز عليهم البرني ولحيتو مسلوتة كي كعبة faïence سبانيولية، نازل على واحد يفركلو في راسو تقول سرقلو الصياغة متاع مرتو وإلا يغسل في زاورة militaire لقاها مطيّشة في الزبلة... وكل وين يزوي الفرّادي خونا يضحكلو ويقولو : "Massage باهيلك للcirculation sanguine ينحي الstress".أربعة كليونات أخرين يستناو في الtournée متاعهم وغاطسين للشوشة في الجرائد متاع قبل التحول تقولش عليهم كانوا محرومين مالمطالعة في Guantanamo... يقوم واحد منهم ويدور لجارو من غير مفتحات ولا حتى amuse-gueule ويسخطو بسوهال يوزن طرناتة : "آش نوّه رأيك في المرشحين للرئاسة؟" يطيّش الراجل الجريدة اللي في يدو تقول مسّو عفريت وإلا poteau ضو في دوار هيشر ويدور للنّسناس ويقلّو : "متاع شنوّه تسأل فيّا ياسي الشّباب، لعبنا البيس مع بعضنا قبل ؟"...الجماعة الكل تقعد ساكتة ومبقرة في بعضها تقولش عليهم اللي يتحرك الأول يخسر...عمك حمادي راسو يدور 190 في الساعة :"زعمة يطلعشي خونا رئيس لجنة الحي وترصيلي في الحبس قالكشي قتلك إجتماع بدون رخصة والقيام بأنشطة مناهضة لجمهورية الغد وما نعرفشي شنوة آخر... لا... لا... يظهرلي اللي سهل بوليس يحب يعرف أحنا معاهم وإلا مع الأخرين... والأخرين الزوز شبيهم ساكتين يطلعوش صبابة متاع شعبة؟..." وفي الوقت اللي عمك حمادي يحرق في réserves المادة الشخمة متاعو يقوم واحد من الساكتين ويقول : "إن شعبنا بلغ درجة من الوعي..." ومن غير ما يخليه يكمّل يلقفو عمك حمادي عالطاير كي القوبنطيني عام 80 : "زايد معاك، شعبنا بلغ هذيكة اللي قلت عليها و انّجمو نحكيو في كل شيء، آش كان عليه كان عطينا كليمة وخذينا كليمة مع بعضنا" ينقز الثالث من بلاصتو تقول بايت يحلم بفرصة كيف هاذي وطاحت عليه مالسماء : "والله قلت الحق ياعم آش سماك ربي، علاه لحمنا بالشوك أحنا وما نضحّيوش، ما عندناش الحق نحكيو في الشأن العام؟" يزيد الرابع يشعل النار :"فرصة لا تعاد يا مادام سعاد".
الفصل الثاني : حانوت حجامة مسكّر كاينّو عمرو ما حلّ في حياتو !
عمك حمادي بعث الصانع متاعو يجيب في قهوة وقالو ما ترجع كان ما يطيح عليك الليل وزاد ردّ الباب بالبلج وسكّر الشبابك و الpersiennes والbouche d’aération و جبد العود متاعو وشعل شيشة مجوركة ولم بيه الجماعة... كي تشوفهم محلّقين في الظلام تقول ربّي يستر من 11 سبتمبر أخرى وبرّه... يقوم صاحبنا الي لاعبها متغشّش قبيليكة وحلّ فازعة في الجماعة :- "أمالا قتلي آش نوّه رأيك في المرشحين للرئاسة، مشات معاك سميهملي واحد وتوه نعطيك رأيي فيهم، توه اللّعبة أمام جمهورنا وإنّجمو نفرهدوا على قلوبنا"- "بره نبداو برئيس العصابة الزين بن علي" عمك حمادي زاهيتلو في النوار ويدندن عالعود :"الزين هذا لواش ؟... الزين هذا لواش ؟...".- "وراس أمي نوارة عيني ياكلّ وين نشوف الزّين في التلفزة نتفقد الceinture de sécurité متاعي من غير ما نشعر، ما نعرفش علاش يذكرني ببوليسية الcirculation والخطايا والشنقال" وتترشق الجماعة بالضحك تقول جاهم سراح شرطي في الجمعة الأولى متاع الرّبطيّة.- "والله قلت الحق كان جات الدنيا دنيا راهو شاد الrond-point متاع الجلاز يتلهمق في قطّة معدنوس وإلا خمسة آلاف فرنك"- "برّه آش علينا فيه، اللي يلقيك زنبيلو عبّيلو كيما يقولو موش غلطتو غلطة التوانسة اللي بالعين السكينة بدمها"- "أيا إقلب علينا الصحن وأخطانا من تخربيش الكرامة، آش نوه رأيكم في البوشيحة توه؟"- "يامرحوم الوالدين ما تقليش حمّه قعدات مرشح للرئاسة؟ خسارتو الساعة صاحب محنة ويلوّح مليح... يا حسرة على أيامات الMalaga وعلى العظم المرمّل"- "والله و من غير محقرانية محمد بوشيحة كيف نشوفو نخاف لا يتقصّ الماء الصالح للشراب على الوطن القبلي جملة، ياخي ما يحشمش على روحو وإلا شنوه، داخل لسوق البصاصين بلاش برنقة؟ آش يفهم فيها السياسة هو ؟"- "آه... الدنيا سعود موش تعرية زنود، بره مشينا طقطوقة ياعم آش سماك ربي"- "علاه تتكيف سيادتك؟"- "ياولدي طقطوقة !!! حويجة مالعتيق، موشّح، مألوف... نانسي عجرم وإلا كارول سماحة بوان كوم"- "تي ماهو فهّمني... كلّمني... السح الدح امبو ادّي الواد لبوه..."- "ونترزّا في عويناتي الزّوز لا عمري ضحكت كي اليوم، يقطعهملكم وين مخييينوا الخنّار هذا الكل، اللي يشوفكم من بعيد وما يعرفكمش يقول تخدموا في مصلحة الوفيّات متاع بلدية تونس"- "بره انشالله في راسك، نخدم في الmorgue متاع Charles Nicolle أنا... وما شربش الشاي أشرب أزوزة أنا".- "بجاه والديكم يزيو مالضّمار راهي أجنابي باش تتكلاطا مالضحك، نرجعوا لموضوعنا خير، منير الباجي حليلتو آش عندكم فيه ما تقولو؟"- "والله نحبو السخطة عندو رصيد نضالي يفتّق... يقتل... وآه آه يا محسونة"- "إكبس روحك ويزي مالتمعجين لا نجي نعملك حاجة خايبة، يعطيك بقلة على لونك" الجماعة شطرها في القاعة مالضحك وزوز شادين الصف قدام الtoilettes باش يبولو على أرواحهم...- "ليبيرالي لين ماخلاش الوحيّد وراس سيديعلي، الله يرحمو، كان يسيبوه يعمل آش يحب ما يلبسcostume rose bonbon ويحط أغاني Freddy Mercury قبل القرآن في التلفزة"- "أيا بره نتعداو للحلواني دالي..."الجماعة شايخة لين ما فماش وإذا بالباب يطير من بلاصتو وهات يا طلايع يا Ninjas و Tigres noirsو فرقة تعاطي المخدرات وعينك ما تشوف إلا النور...
الفصل الثالث : سجن الهوارب يا بو قلب!
- "الله يهديك ياعم آش يقول فمي، هاو صب بينا الصانع متاعك ورصاتلنا في قلبو، زايد ياولدي هالتوانسة ما فيهمش آمان، الخباثة راضعينها مع الGuigoze"- "براس الوالدة أخطاني إنتوما جاتك خفافي عويم إستهلاك وتروّحوا لدياركم، آما آنا هاهم لبّسوني مسك وإستعمال وحيازة... وترويج مادة مخدرة و باش ترصيلي هنا سبعة سنين، وهاك الفرخ الصانع متاعي وراس أمي مانكلم عليه ولد أختي في الأردن يحرش فيه أبو مصعب الزرقاوي يقددوا كي علوش العيد"...
ettounsi de TUNeZINE
15-09-2004
