المشاركات
الفيلسوف متع الفلسفة متع قصر قرطاج ! هو في الواقع الحدّاد متع القصر! إشّد الفكرة إحددّها إيجيبها و هي و الأرض سوى سوى، على ساقيها ماعاش تاقف! أبدا !و إلي يومنا هذا إمسّش حاجة، راهي تفسد ديريكت ! و لكن أش تعمل ! بحوث أكادمية كبيرة و جامعات إتخبط في الخربقة الغانية و ما لقاوش الحل ! من فيلادلفيـــــا الي النرّويج ، من القطب الشمالي ألي أندونسيــــا البحّاث متع بن علي الكل يخدمو كيفاش باش الخليفة يربح ! أش كرهت كلمة دكتور و كلمة أكادمية ! ثمة قانون إتوّصلتلو عبر الريشارش متاعي على المعيز : القانون هذا أقول : صعّبها تسهال ! سهــّلها تمساط. الفيلسوف جاء للقصر باش ياخو متاعو ! الفلوس ! الشيك ! الي باش يشري بيهم الماتش من الشيخ الكبير ! يلقى الخليفة في وسط البـــــــاب! حاضر باش ! يرعش بكـــلّو ! عيون باش تخرج من راســــو !
· باش إنبطلو من حكاية شريان الماتش من الشّيــــــخ ! خصارة فلوس زايد و خليه إهبــــــــــط كلاب حتى من المّــــريخ ! يلعبوش معاه الملايكة ! رابحو رابحو !
· ألي إتقولو إنت ! السّمع و الطاعة يا مولاي ! إنت كبيرنا و تعرف !
· أنا إنحب نعرف الأسود متع الأستاذ الشابي ؟ منين جابهم ! يا خي في الجريد ثمة صيودة ! إنا إنحبك تمشي للجريد و إتشوف بعينـــــــك ! صيودة و إلا قطاطس ! بالك إرانب الرّأجل إحب إهبطهم للستاد و أحنا ما في علمناش ! و خصارة فلوس زايدة باش إنجيبو كــــــــلاب من إستراليا!
· من ناحية الصّيودة في توزر ما ثماش ! و عمري ما سمعت بصيد إعيش في شط الجريد ! و لكن الثبات يا مولاي بــــــــــاهي ...وين تعرف ! المرازيق أش يعملو في الصّحراء ؟
· فكرّتني ...إفكرّك في الشهادة ...الحكاية فيها المرزوقي! إزرم ! لشط الجريد ..يمشوش يتفاهمو على راسي !!!! لا لا لا ...هاذوم إتفاهمو على راسي و بالحـــــــــاق عندهم صيودة إشكون ألي يغلب الصّيد ؟ يا فيلسوف !
· ثمه أسد غيرك يا مولاي !!!! ما يغلب الصّيد كان النسّر
· نســـــــــور قرطاج ...وينهم ؟ نادي على النـــّسور الكلّ ! هاذوكم قادرين باش يعـــورو عيون الصّيودة متع الأستاذ الشابي!!!
· يا مولاي ...نسور قرطاج ...خاصرين ديمة ! حتى من كاس إفريقيا روحو يدا فارغة و أخرى لا شيئ فيهـــــــــــــا ...ما هو جرّبناهم حتى في كاس العالم ! الدّور الأول ما فاتوهش ...خصارة فلــــــــــوس يا مولاي !!!! إعطيني شوية وقت ، إنفكّر في الحكاية
· تطلع بيها توه توه ....قتلك البـــــــــلاد ألكلها متافهمة على راسي !!!!! لازم تطلع بالحـــــــــل و إلا راك مشيت زيزي!!
مشي الخليفة ! و خلى الفيلسوف وحدو ! و ركحت زكرة إبريك في نسور قرطاج ! الخليفة فش الغظب متاعو في الأنترونار ! إتقول هو الي يلعب موش النسّور متاعو ! رّوح الرّأجل و ما عطوهش حتى حق الرّد ! يا غلبت إشكون نغلب ! الرّاجل براني و صاحب عويلة ! و ضيف على تونس ! بلاد كـــــــاملة طاحت فيه قامة ! أما الناس ألي بالحاق لازمها العصى طفـــــــــــو عليها الضّوء.
الأستاذ الشابي ! قاعد وحدو ! جالس القرفصاء على شط الجريد ! و يستخايل فيه ستــــــــــــاد ! إشوف فيه و كأنو ملعب للتزحلق على الجليد ! الفضاء الي داير بيه خلآه يحلم بالرّبــــــــح ! و إشوف في الصّويدة إترّيش في النـــسّور متع قرطاج ! و الريش عامل ضبابة و ما بينو و بين الخلافة كان المرازيق ! كل مرّة يخرج صيد من بين النخـــــــــّل ، من الغابة ...و يقعد حذى العرف ! كلمة لا ّ! الرّاجل إفكّر في الأستراتيجيا ...و حتى بصيودة و مازال شاك في روحو ! جاه أسد صغير ! و قالو يا إمعـــــــــّلم راهو الشيخ نـــــــــاوي إبيع الماتش للخليفة ! معناتها أفهم الجيورات متع الخليفة ما هومشي باش يتعبو ...و ناوي عليك إنت و باش إهبط النسور متع قرطاج ضدنـــــــــــا ! الكل!
كلمة النّسور متع قرطاج هذه ! إتخلي الأستاذ الشابي ياقف ! يلقى روحو قدام 25 صيد المقوّد يوزين 500 كلغ ! و منهم المرزوقي ! صيد إزرق ! كي وقف و حل عينيه بالباهي خاف أكثر من الخليفة ! النسور في السياسية تعني العسكــــــــر ! كان يربح الأستاذ الخليفة و حتى في الشّوط الول متع الخربقة ! راهو باش إدور عليه العسكر ! و إتموت الصّيودة الكـــــــــــــّل ! و خاف إيصيـــــرو ما صار للشّيـــــخ هوكا العام ! و تونس تبرك مرّة أخرى ! و إستني يا دجاجة ليل إيجيك الشعير من باجة ! في الحين يطلب من السّكريترة باش يعمل إجتـــــــــــــماع عام ! موضوعو العبرة بالمشاركة موش الرّبـــــــــــــح !الأســــــــــتاذ حاجتو بالشعب الكل إيجي معاه ! موش كان اليسار ! رسالة مشفّرة للعاصمة ...تمشي على الماء مباشرة! عبر شط الجريد.
قاسم في اليـــــــبان ! أش يعمل ؟ يتعلّم في التكنيــــــــــك متع الســـّموراي ! على فكرة كلمة ساموراي : تعني باليابنية : سيريــــــــــــــو ! الناس الصّحاح الي ما إوخروش لا قداّم إبراطور و لا خليفة و لا شيخ و لا شابي و لا مرزوقي ! أخر ساموراي مات عام 1873 في معركة ضد الحداثة و ضد السلطان في نفس الوقت! و لكن التكنيك مازال هو هو ! تونس لازمها ناس ســـــــــــاموراي ! ملتزمة ! جادة ! و إتّمن بالأنتصار ! الفريق مـــــــازال موش حاضر و المدّونين مازلو يعملو في الأبحاث الأكادمية في الدّجاجة قبل و إلا العضمة قبـــــــــــل! المدّونين التوانسة ، مازالو صغار ! و ساق إلتالي و ساق ألي الأمام ! و ما زال ما إخذاوش الثيقة في أرواحهم ! الشخصية مازال ما طابتش! مازال ما إستكملهاش الوقت ! و التجربة ما زالت في بدياتها ! مازالو في وهم كبيــر ! ثمة حاجة ما هيش واضحة أمامهم ! ألا وهي : الحقيقة ...!!!!!
سمع بن علي ! بالحكاية ولات فيها ساموراي ! و صيودة ! و الكلاب الي شراهم ما عاد ينفعو بحتى شيئ ! و العسكر الي إمعملّ عليه كان خصر ...ياكلوه السّاموراي ! هذه جنون إتحبوني نلعب معاهم الديمقراطية !
· لا لا لا ...الديمقراطية و الخربقة ما تمشيش معـــــــــــــــاي ! كيفاش عملـــــــــــــنا يا فيلسوف ! يمشوش إقولو الخليفة إنسحب و إنولي خـــــــــــــوّاف و ما نعرفش نلعب ! و حاجتي كان بالكرسي ؟ شوف لي حـــــــــــــل في القريب العاجل !!!!! و نادي الفلاسفة الكل و الشيوخة الكل ! و العباد الكل إتجيبها و تحكيلهم الحكاية !!!
إجتمعت الناس الكّل ، هزّو نفظو ! إتناقشو ! زادو! نقّصو و لا واحد إطلع بحل باش ينقذ الخليفة ! شيئ ؟ حلف عليهم و لا واحد يخرج من القصر ! يا إمــــــا إطلعو الفكرة ! يا روسكم الكل إنقصّهــــــــــــــا!
مع نص الـــــليل ، ركح الجو و دارت بنت الكلب في روسهم ! صب هات ! شد عندك ! شاخت الجماعة و إتنفس القصر من الظعط شوية ! يطلع برهان بسيس بطلعة ! ضحّكت الخليفة و شاخ عليها الفكرة ! و قالو كــــمّل يا برهان كمّل ...حكايتك سمحة !!! أش إقول شيخ السلفية الجهادية برهان بسيس
يا مولاي ! الديقراطية هذه راهي فتنة في السلام ! و إنت موش من صالحك باش تفتن بين شعبـــك ! و تدخل البلاد في بعضها ...إتراسيلك في حروب داخلية ! و بنزرت دخلت في تونس ! و توزر في قفصة ! و صفاقس في سوسة ! و سوسة في سيدي بوزيد !!! و ما ثمة حتى نص شرعي إحـــــــــــرّم توريث السلطة ! ! من حينك إتعين ولدك محمد خليفة و أمير المؤمنين...و حتى كانو صغير هونا أمو إتقوم بالحكومة ليل يكبر و يــــخشان عودو !!! و سكّر علينا ها الخرافة متع الخربقة و متع الديمقراطية ! و أقول فتى برهان الشيخ برهان
قاسم قاسم
و مازال الشيئ في الثنية !
ليست هناك تعليقات:
إرسال تعليق