المشاركات
قاسم
عندي ليك سؤال محيرني عندو مدةعلاش على قد ماكتبت وتكتب ماتحجبتش مدونتك؟رغم انو غيرك كتب اقل من ذلك بكثير واصبح في خبركان؟ زعمة نلقاو جواب في
الحلقة القادمة هههههه
العمــــــروش
الجواب :
باهي، سي العمروش هاهو الجواب قبل الحلقة الجاية ! حاضر ناضر ! في الواقع الجواب على سؤالك سهل في غاية السهولة و كان عطاني الجواب عليه صديق عندي ! ما نيش باش نعطيك الأيجابة متاعو و لكن ستنشر في يوم من الأيام !
ألي حبيتو أنـــــــــــــا !! إني إنوضحلك حاجات أخرى !!! عمــــّك قاسم يكتب في كل شيئ ! ساعات إتجي نصوص باهية و ساعات إتجي خايبة ...كأي جمهورية فيها الباهي و فيها الخايب ...مع الوقت إتعلّمت ...ولات عندي تجربة صغيرة موش كبيرة ! كيفاش أنوصل الفكرة عبر شخصيات في أغلبهم الأصدقاء متاعي. ...حبيت إنقولك يا سي العمروش : عمّك قاسم ...ما هوش لاجئ سياسي ..و ما عمرو ما دخل الحبس و لا عمرو أتوقف و لا عمرو عمل معاه الحاكم بحث ...يعني بالضرورة مواطن عادي كيفني كما برشة مدونين ! أكتشفت تونس بعد ما سافرت ! أكتشفت القمع و القهر و الظلم ، الغورة و الدسيسة عبر تونزين ....فأطلقت العنان لجوادي ...و قلت باش إنكون أنا صوت المقهورين ! صوت المضلومين ! صوت السجين السياسي / صوت الموقفين / صوت الناس العادية ألي مغلوبة على أمرها و بالعة السكين بدمهـــــــــــــا !!!! كتبت ما شاء الله و مازال عندي ما نكتب و ما نيش باش إنبطل حتى سقوط بن علي و الطرابلسية و التّجّوع . الكل جملة مع بعظهم !!!! السرطان ألي ضارب تونس هو حزب التجوع ! و بن علي و الطرابلسية إمثلو جبل بوقرنين متع الأيزبارق.
جاء راسي في راس بن علي نهار ألي كتبت السرّوال الرابع !!! من ليلتها ! أقسمت بأن أهدي جميع أوقات فراغي ألي الشعب التونسي ...و فضح الديكتاتورية بكل الطرق و بكل الوسائل.
شوف كيفاش ! كان بن علي إسكّر المدونة متاعي ...راني باش إنحل تلفزة كاملة و إتشوف قاسم كما كان في الكونبيس عام 86/87 هاكه المشوم على تونس ....معناتها يا سي العمروش ...بن على ما عاش باش يغلط غلطة كما عمل مع تونزين و نـــواة و تونسنيوز ! هاذوم جماعة ما إرجعوهاش ألتالي ....و أنا واحد منهم !
هاذك علاش طلبت من المدونين باش نعملو جريدة المدّون لأنو بن علي ما عاش قادر باش إسكّر و إلا أحل ...و إنما إثباتا لوجودو قاعد كل مرّة يظرب واحد بجمعة رفت من البلوقسفار. هو إسكّر مدونة و تتحل عليه مليون ...هنا نفهمو ألي بن علي خصر المعركة من أساسها ...و ما عاش قادر كان على إنو إشد التركينة ...و تركه فيه كعبة تايزن القوشي .
أنا عارف وين ماشية الكونبا متاعي ...و عارف باش نربح ...و عارف ألي أنا باش إنزيد في التصعيد ...بحل تلفزة كاملة أتبث على الأنترنات ...و توه كان حب ربي إتشوف عمك قاسم ياش أكسر الطاولة من الضرب عليهـــــــــــــــــا ....
ألي هنا سي العمروش ...إن شاء إنكون أقنعتك بالجواب هذا !!!! و في إنتضار الحلقة القادمة ! توه أنشوفو إشكون أقوى جمهورية بن علي البدونة و إلا جمهورية قاسم ألي قامت تحديا للضلم و القهر بصوت الشعب التونسي .
صديقك قاسم
هناك تعليقان (2):
:)))))
شكرا ياسي القاسم للتوضيح ولو انك ماجاوبتنيش هههه
اما راني نحب نبداو ديما يد وحدة ولو اختلفنا
كل واحد وطريقتو
كل واحد ومنهجو
نجمع ومنفرقوش
تي اش مازال هو تعدى البرشة مزال الشوية
إرسال تعليق