طارق الحكلاوي في الفايس بوك (2)

من ناحية التخلويض! أنا أكبر خلواض في العالم يا دكتور ! و من ناحية أنو ما فهم و لا واحد الفيلم هذا: هذا عندك فيه ألف حق : بن علي نفسو و التجّوع و الللجنة المركزية إتقول نفس الكلام على الشعب التونسي، و هذاك علاش كل بعد خطاب إسيب الوزراء متاعو كي الجراد إفسرو فيه للتوانسة: النضرة الدونية للتوانسة هذه، هاك جسّدتها في التعليق متاعك و بكل عفوية !!!! علاش؟ هذا الي باش نكتشفوه في الحلقة هذه! ...أنا إنكدلك ـ بالي الشعب التونسي موش فقط فاهمني...بل قادر باش إفـــهّم المليح فينا !!!! نتجاوزو الحكايات هذه !!!! و إنحبك إتكون ريــــلاكس ...و تقبل الخيال بشوية تواضع . الخيال يساوي التنبئ بمجيئ المستقبل ، و أنــا حاب إنقدّم للشعب التونسي النخبة متاعو و أش قادرة تعمل.

تاكسي إتولوح في 140 في الساعة قاصدة ربي لمطار الجي أف كي في نيويورك ( خدمة جديدة)، الدكتور طارق الكحلاوي حال الرّديون متاعــو ! حكايات و حوارات مع الكلندو و البرباش : في الحقيقة الناس هذه عرفتها الكل بأصواتها و عبر كتباتهم ! فأتشكلت عندي فكرة على كل واحد ! بل الشخصية نفسها بدون نقصان !!!! الرّديون جاب النشيد الوطني و أنهر الدكتور بكاءا : حس وطني إنتابـــــــــو و قال للشوفير : زيد في الفيتاس !!! طيرها التاكسي ! الدكتور طار لتونس قبل الرّديون ، قبل الذبذبات الصّوتية ...حكاية الرّديون و الدكتور إتجي فيلم وحدها بدون الفايس بوك.

حلّقت الطيارة على تونس ! ما هو في بالكم بيها خظرة ! أبدا : تونس من فوق أتقول حكة طماطم مصددة ! و أتشوفو عبر السايت متع سامي بن غربية ، خريطة السجون ! و خلايطة القصور ألي بنها بن علي لمرتو : ما هي قصّة الحب هاكي جات على راس تونس ! و إشكون صّفق : النخبة التونسية و أشكون المزاودي : برهان بسيس و الي الأن ! و إشكون كتب الصّداق : الشيخ راشد الغنوشي ...الصّــّور هاذي الكل دارت في راس طارق الكحلاوي قبل ما ينزل ...موش عارف علاش شدو الطيارة الفوق / فوق المطار إدور لأكثر من نص ساعة ! المهـــم سائق الطائرة ، حب إفرّج الدكتور على الحالة القارصة متع البلاد !!!! شاف الفقر! شاف القمع ! شاف الأرهاب متع الدوّلة ! شاف الناس حارقة في البحر !! شاف الأمراض كيفاش جات على الشباب ! شاف المخدرات تتباع قدام الليــسيات ! شاف العاهرات شدات الصّف في قلب العاصمة ...الطيارجي ما خلى و لا حاجة ما ورّهاش للدكتور طارق الكحلاوي : وراه كيفاش صار إنقلاب شلعة نوفمبر ! وراّه كيفاش صار التزوير متع إنتخبات 89 ! ورّاه الأستفتاء متع عام 2000 ! شاف الدكتور بعينتو : صخصخة الأقتصاد التونسي لصالح الطرابلسية و عائلة بن علــــــــي !!! و في الأخر وراه الخليفة متع بن علي !!! إذاعة الزيتونة و بانكة الزّيتونة ...ورّاه جامع الزّيتونة.
و جاء صوت المصّيفة : مرحبا بكم في تونس ! بلاد الأمن و الأمان ! إبتسم إنها تونس ! مرمدني و أضرب بالكف....بعد خسة دقائق تكون قد حطّت الطائرة...

على أرض الملح و الكذب و النفاق/ نزل الدكتور طارق الكحلاوي / في ممر خاض أداه ألي سيارة مخصصّة لمهته الغــير مستحيلة ، مرسيدس الرّئاسة كانت في إنتضاره/ . فتــح ( بضم الفاء) له الباب الخلفي ....في طريـــقها ألي قصر قرطاج !.
هل يسلك الدكتور طارق الكحلاوي نفس الطريق الذي سلكه الدكتور المازري الحداد و يصبح بوابا للقصر ؟ هذا ما سنعرفه في الحلقة القادمة !؟

قاسم قاسم