الدكتور طارق الكحلاوي في الفايس بوك

الفايس بوك
جمهورية قاسم تقدم
الدكتور طارق الكحلاوي و المدّون الكبير فري راس
في الفلم الجديد
الفايس بوك

ما لقى بيها وين عمّار بن علي ، كل يوم بفركة و عود حطب داخل على المدّونين ! أظرب هذا ، إشلم هذا ، سكّر الحانوت هذا، ، نقصّ لهاذا في الدوزة، أبعث فيروس للفايس بوك ، سكّر جد بوه الأيمايل، أش نعملو أحنا بالكوميوترات و الأنترنات ! خلى العباد ترجع تكتب بالفحم ! بن علي قوى عليه الطرب و كل يوم تطلع مدّونة جديدة و تنقب حيط الكلب و الحمار ( أرجع لفيلم هجرة الحكيم، توه تفهم إشكون الكلب و إشكون الحمار). جربوعستان ما عاد فيها حتى كابل يخدم، بن على ما إنجمش يحكم في شعب حر ، عرف الحرية و حتى شوية !!! ما إنجم يحكم كان في ناس من تحت إماتها ما خرجتش !!!! الفايس بوك ، رجع العالم قرية و الأولاد و لات إنتاقش و تتظم داخل نوادي و مجموعات ثقافية و سياسية و حتى ربما أحزاب ! و علاش لا ؟

على مستعملي الفايس بوك التفكير جليــــا في الأمر هذا و أنا قاسم قاسم أول ما مدخل في حزب يتحدى بن علي و التجّوع . شوفو الحكاية يا جماعة و قولولي ! ما هي ديمة تبدى بفكرة صغيرة ...و فــلّيس مع فلّيس أولي كديس ! و و احد مع واحد إولي حزب كبير و تولي رؤية سياسية و أولي مشروع إجتماعي و ثقافي و سياسي !سموّه الحزب هذا : حزب الفايس بوك !

ما عليناش ...أنا إنــحل الطريق و إنتم عليكم بالكتيبة و البحث على حقيقة الأشياء. عمـــّار حاب إفسّر للشعب التونسي : علاش أمر بتسكير الفايس بوك و علاش أمر بتسكير المدونات متع الأولاد ! و علاش البلاد هايشة في حالة طوارئ منذ ضلام الشابع من نوفمبر العقيم. و كما عادتو سي عمــّار بن علي ، كل وين يعمل خطاب يبعث الوزراء باش إفسرو الخطاب هذا للشعب التونسي ...و كأنو الشعب هذا ما يفهمش و إلا عمّار بن علي يتكلّم بالشّنوه....عاد كي الشعب هذا ما يفهمش أش إقول عمـــّار ..إنولو إنجمو إنقولو بألي عمـــــــــــّار إمطيح في الشعب التونسي بصلة !
يا شعب يا تونسي ، وقت ألي الرئيس متاعك إمطيح فيك ذبانة ! ما إتقوليش علاش ما زال إتناشد فيه باش يترّشخ مرّ’ أخري ! يا شعب يا تونسي / الحكومة هذه حاسباتك قطيــــع ما تعرفش أش يصلح بيك و لازم إعلموك المسير كي الحمار بالظبط ، علاش مازلت تسمع في خطاباتهم و إتبع في شعبهم و تقرى في جرايدهم !

يا شعب يا تونسي يا أحسن صفاق على مسرح قرطاج! أنا إنقول ألي عندك الدّم الفاسد، مريض بالدّم الفاسد و لازمني إنعديكم الكل على المغيـــــاث و كان ألزم ، إنبطل كل شيئ و ما نلتهى كانك بالشعب ألي إصفق لفاطمة بوساحة و زين العابدين بن علي !

ما لقي بها وين بن علي ، قال في بلاصة ها الوزراء ألي لا هم يخدمو و لا هم شادين الطفلة ...هاهو نبعث بالمدونين للشعب التونسي حتى إفسرلو علاش سكّرنا الفايس بوك و الأنترنات الكل....قال إشكون نبعث ؟ جاء على بالو قاسم : قال ، هذاك يعمل علي إنقلاب قبل ما يوصل لسوسة !!! بطــــّل !!!! ظرب خماسو في سداسو و طاح الزّهر على الدكتور : طارق الكحلاوي و إفكارو اللّيلة ! بن علي ما إخاف كان من الجماعة ألي إفكـــرو في النهار ، واحد كما طارق الكحلاوي ما إخوّفش : الشخصية هذه إتذكرني بصديق عزيز عليّ ياسر ياسر ألا و هو طارق بن زياد متع تونزيـــــــــــن العروصة : طارق أبن زياد هذا مرّة من المّرات قتلــو هيّ نعملة إنقلاب على تونزيــــــن !!! راهي ولات شعبة : قالي لازم إنشاور الفرنسيس ! ما لا قتلو بالحرام كمـــــــــا إنسّكرها : و سكّــــــــرتها في ليلة من ليالي طارق الكحلاوي و تفكيرو في بان سلفـــــــــــــانيا: على فكرة ، ما هي جابتنا الدّورة على بان سلفانيـــــا ، خلي نحكيلكم عليها / كنت في نيويورك ! صاحبي عندو فولفو لازم إصلحها في بان سلفـــــــــانيا ، قالي تمشي ، قتــــلو إتالي لا ! ديمه على قدام !! وصلنا ...نحساب روحي في مدنيــــــــــــــــــن !! ما فيها حد ! بلاد فارغة ! كان طارق الكحلاوي !

يقرى في جواب جاه على طريق البريد السّري السريع !!! أنا وقف على الطاولة ! و الرّاجل سكّر الجواب و دخل بعظو ...جاه جواب من الرّئيس ! و طلب منو باش يهبط حـــــــــــالا لتونس و يمشي إفسّر للقفاصة علاش بن علي سكّر الفايس بوك و الأنترنات في نهار واحد !!!
و حتى قهوة ما طلبهاش لسي قاسم ألي جايــــو بالّّــــذّمة باش إقولو على السناريو ! و كيفاش إنجم يقنع القفاصة و الرّديف و المظيلة بمشروع بن علي التحديثي متع تسكير الأنترنات.:
عمل وطني قالي ..! !! توه طالع للمطـــــار ...ما عنديش وقت يا قاسم ! بره رّوح ! ما إتكـــّلمنيس : توه إشدوني في المطار !!!!! أش بيك ما إشدوكش ! عندك فيزا من الرّئيس و باش إتقابلو ...الرّأجل طار كي الحمامة و عينك ما رات العمى.

فاصل :

برشة نصوص ، خرجت على الأنترنات و تقرات و إتناقش و في الواقع النصوص هذيك إتكتبت يا نــــــــــاس و البارود في راس صاحب المقال ...هذا باش إنحظركم للحلقات الجاية متع فيلم الفايس بـــــــــــــــوك

قاسم قاسم