لجنة متابعة كريز

يه يه يه ...و لا نام و لا عين إتغمضّت ...و لا قال إيجه النوم ...و خايف إيجيه كريز في وصت اللّيل و لا طبيب أحلّها و لا بنكاجي ...باش إفيّق ساركوزي و ألا بوش ...أمريكا و ما أدراك باركة ! و اليبان ...مصرانها شعرة لا خرج...ما لا جاه النّوم !!! إخّمم في الكريز ؟ لكن موش عارف على أنو كريز ، إنجّم إكون كلاوي ، كريز كبدة ، كريز مالي ، كريز دم !!!! ما تفهم شيئ !!! كان العيون باش يخرجو من الراس متاعو !!!! قاسم متع قرطاج في كريز ...إدوخ...شبعة مرّات إدوخ و إفيق كان بالكـــــــــــونوليا

· زعمة حق ! و ألا الأمريكان لعبوهالنــــــــــــا كي حكاية 11 سمبتمبر !!!! في حكاية 11 سمبتمبر إلقينالها الحـــل و أنزلنا على الخوانجية و كمّلنا بالمحامين و القضاء و هاكه الحكّة طماطم متع حقوق الأنسان ....أما الكريز هذا ما عرفتوش كيفاش بدى و كيفاش وصلنا بلا علم منــــــــــــــــا ... زعمه الفلاّحة ما خلّصوش القروض متاعهم ؟ بالك جماعة السيارة الشعبيّة ما خلصوناش ؟ بالك التوريست كلونا في فلوسنــــــــــــا ؟
· لا لا يا راجل ...كريز و إتعدي ...إشتدي إزمة تنفرجي ...خوذ شريبة ماء ...برّد ! بالك موش الفلوس وجعيــــــــــــــنك ..يا قاسم ..عندكشي الكلاوي ؟ بالك عندك حجرة !!!!
· ما ظهرليش ...لا كبدة لا كلاوي ...أما ألي مقلّقني ...بصراحة الفلوس...فلوسي طارت
· هاهي الدّول الكـــــل في كريز ...و لازمك إطمن الناس
· إطّمن روحي قبل الناس........إنت ماك فاهم شيئ ....إخرج علي يرحم والديك ....لا نرزيك في عمرك ...
· حاضر سيدي....

خرج سي خوينا ، المستشار متع قاسم ! و الأستشارة كانت فاشلة ...بنّك سي قاسم على البنك ...حلّ هاكه الكومبيوتر ! و إشوف في النوامر متع البورصة ...نازلة ...نازلة ...نازلة ...و لا حبت تطلع و إلا تمشي الفوق ! فلوسو الكل باش يمشو زيزي...المليار الأول طار ...و الحكاية فيها شبعة مليار دولار ! شطر الميزانية متع تونس ، إتقولو منين جابوهم ؟ الرّاجل يخدم ليل و نهار ...و الشيفروات الكل نازلة ! إشد جنبـــــــــــــــــــــــــــو ....أه أه يا كبدي على فلوسي

المستشار ألي خرج من حانوت قرطاج !!! إقول للناس بالي الرّئيس قاسم قاسم عندو كريـــــــــــــز !!! و لا وضّح شيئ ...يوصل الكلام للطبيب !!!! إفيق الرّأجل ...من نومو !!!! و يمشي للحانوت !!!!!! يلقاشي الرئيس ...شاد راسو ...

· ما هو لاباس
· لا لبــــــــــــــــــــاس ...إنحس في روحي متقلّق شوية
· أقعد ....أقعد ...خلي إنشوف الضعط

الفكرة عجباتو ...إندزه فيها مريض ..حتى ليل يتعدى ها الكريــــــــــــــز ...و فكّني من الحكاية ! إش إقول لسي قدّيش متع قرطاج

· تعرف يا قدّيش ...إنحب نرتاح شويه ...إعطيني شويه دواء إرّقد ...راني مريض
· لا لا ماكش مريض و ما بيك شيئ
· أنا إنقولك مريض ...و إنت إتقول لا ....أنا الرئيس و ألا إنت ...و الله حكاية
· إتحب إتكون مريض ....دونك مريض ...
· عمّرلي كونجي ...بعشرة أيام ........موش لازمني الدّواء متع النّوم
· حاضر سيدي

رجع للسرير ...إتمد ...العيون في الصّقف : زعمة إشكون إمرّكبلي ها الكريــــــــــــــــــــز ؟ الفلوس و إلا المعارضة و إلا المــــــــــــرا عندي ؟ زعمة علاش إنحس بروحي موش حاجة ؟ إشبيني قالق ....فاق مرّة أخرى و إمشي للكوميوتر إشوف في النوامر ...إشوف في المؤّشر متع البورصة ...يلقاه طايح ...و يلقى روحو زاد خصر ...قرابة خمسة ماية مليون ...هكاكه مشاو هباء!!! إه متع الناس يمشي للناس ...زادت لعبت عليه الدّوخة ....و بدى الرّداد ...ليلة ...ليلة بلا صباح ...

العاصمة ...تغلي على الصّباح و ألي عندو دورو شادو ...و لا قهوة صّورت مليم ! و لا واحد خلّص الميترو ...و ألي عندو حانوت سكّرو ...يستنى في الكريز يتعدى ...الناس إتشوف لبعضها و ما هيش فاهمة ...ها الكريـــــــــــــز ...كيفاش وصلنا ..و كيفاش جاء لتونس ...ثمه جماعة عندها كريز متع ضحك ...تتفلق بالضحك ...البوليس متع الرّونبيون ما صّور حتى فرنك اليوم ...الناس ما عندهاش فلوس باش تعطي الرّشوة ...يستخايل الناس تضحك عليه ...شعرة لا حط يدو على الزّناد و خدّم الكلاشن.

وصل الخبر لقاسم ....في القصر ، كيفاش خرج الكريز من القصر للشارع ؟ أش مدّخل الشعب هذا في الكريز ..؟ ما فهمهاش الحكاية ...و الرّاجل ما رقدش توه ثلاثة أيــــــــــــــــــــام

· زعمه نعمل لجنة متابعة للكريـــــــــــــــــز ، نادولي الناس الي تفهم في الكريزات الكل !!! كريز الفلوس و كريز الكلاوي و كريز الكبدة و حتى كريز السّكر

جات اللّجنة ...جاء سي بوعامر ، صافن على ذرعانو ! الرّأجل وطني قريب باش يبكي ! و زيد إستحقلو الرّئيس !!!!

· السّلام عليكم ....
· السّلام و رحمة الله و براكاته ...يا هلا يا هـــــــــــلا ...بسيدي الرّئيس ...عيطلي جيت
· يا سي أبو عامر ...عينتك في اللّجنة متع متابعة الكريز ...إتلوّجلي عليه ! وين
· حاضر سيدي الرّئيس ...إنطلّعو من وين هــــــــــــو ...حتى من بطن حوته
· أش طالب
· كرهبة ...أربعة في أربعة ...و بونوات إصانص على قد ما تقدر
· لك ذلك يا سي أبو عــــــــــــــامر ...ما إتجيني كا ن به !!! توكّل على بركة الله .

كرهبة كات فوا كات ، جديدة من الباكو ...خرجت من قصر قرطاج ..إتلّوج على دواء الكريز متع قاسم ...الرّاجل ما زال نافح بالكرهبة ...قبّلها لبنزرت و عطاها الحس ..إخدّم في راسو !!!! زعمة عندو دواء الكريز متع الرّئيس ...و علاش وافقت أنا باش ندخل في ها الحكاية ؟ و كيفاش باش تلقاه الدواء هذا ...و الحكاية في البورصة ...و في الكونبيوترات و بين بنوك ...شيكات بدون رصيد و بونوات و أكسيونات ...زعمة كيق نعمل ؟ و أش هازني لبنزت ؟ و اش هازني للصحراء ؟ اش ثمه غادي ؟ هذه يلزمها واحد في الأقتصاد ........و في الفلوس ...فكني من الحكاية ...خلي نرجع لقاسم ..نعطيه كرهبتو ...و إنقولو أنا ما نجّمش !!!

الكرهبة واقفة قدّام مطعم ...جاء واحد ينشد على صاحب الكات فو كات !!! إتقابل هو سي أبو عامر :

· إتبيعها ...
· أه ...( مع الكريز ) إعطي سومك
· بره خوذ ...40 كيلو ....سير بلاص
· زيد شوية .........قريب باش تخلط ...
· بره خوذ 45 ...قول مبروك
· لا رجعت ...عاش ما كسب ....مات ما خلى .......هات اش عندك

إتباعت الكرهبة ...و شاخ أبو عامر بالفلوس ...و قال نقلب جملة ...و فكّني من قاسم و من الكريز ! أنا هاهو ولات عندي الدّزة ...علاش إلّوج أنــــــــــــــــــا ...؟ ماهو على الفلوس ؟ هاهم عندي ! و قاسم توه يكبر و ينسى و يتعدى الكريز .

قلب سي أبو عامر بالرّئيس ، و من قهوة لقهوة ...متخبي خايف ...طيّش التلفون ...باش ما عاش إرّجع على الرّئيس المكالمات ...إطيح سي خونــــــــــــــــــا بالقابسي ...القابسي عارف أبو عامر ما عندو شيئ ؟ و لكن الرّاجل إتقول ما هوش حاس بالكريز ...يصرف ...و إخلّص على الناس ، قهاوي و مشاوي و سهريات ...

· منين جوك الفلوس
· قلبت قاسم في كرهبة كات فوا كات
· قلبت الرّئيس ....إنت خطير
· كان إتشوف هو قداش قلب من عبــــــــــــــــــــاد! منين جاوه الفلوس...سبعة مليار دولار
· ما هيش عملة ...........لكن أش باش تعمل بيهم 45 مليون
· إرّوح لبلادنــــــــــــــا و نشري الغنم ....سارح ....صنعة بوك لا إعيروك

الرّئيس في قرطاج يستنى عندو جمعة ...و في إشكون يستنى ؟ في واحد قلب بيه ...ألي خلاّتو البورصة ..كمّلو أبو عامر ...إشبيه ما عاش إجاوب على التيليفونات ...زعمة قلب بالكرهبة ؟ قاسم ما عاش وجعونو الناس ألي تهلبت في أرزاقها و ربّما ديارها ....وجعاتو كيفاش عداها عليه أبو عامر و قلب بالكرهبة و الأسانس ...و إنزيد إنخلّص عليه الأيسانس !!!!

يركب الرّئيس في كرهبتو و يخرج من القصر ...مشى إل,ّج على أبو عامر ...ألي مشى ألوّج على الكريز ..خروج الباي من القصر ...ما هوش ساهل ...بالحرس متاعو ....و الخيل و الخيالة و الزّاد و الزّوادة....يقصد ربي باش إزور البلاد و إفسّر للناس ها الكريز و في نفس الوقت إلّوج على أبو عامر.

قال نبدى بالشّمال ...

أول ضيعة في بنزت دخلها ...
· السّلام
· مرحبا بالرّئيس ...زغرتي يا مرا
· أه شنوه الجـــــــــــّو ...كيفاش فلاحتك
· كريز يا سيدي الرّئيس ....
· قداش عندك من بركوس ؟
· 30 بركوس ...........
· على كل بركوس 26 نعجة ....هات 5 براكس للكريـــــــــــــز
· كيفاش سيدي الرّئيس
· القرض الي ما خلّصتوش ......فمّك إتسكرو
· حاضر سيدي الرّيس
· تصبح على خير

الرّئيس ...سي قاسم لقى الحل و كيفاش إرّجع فلوسو ...البورصة خاصرة ...إرّجعو من الشعب ! على كل ضيعة ...ألوج في العشر ...الفلاّح ألي ما خلّص القرض ...يخو منو قطار قطارين ..بركوس ...يقبل كل شيئ حتى من الدّحاج ...و ألي يلقاه إمحلّص القرض ...إقولو خرّجتش الزّكاة ..ما هو ما فيها حتى ورقة تثبت العشرة في الماية ...الفلاّحة الكل دفعت !!!!

و بدى هابط ...بعد لا صفّى الكاف و جندوبة و باجة و القصرين و سليانة و الرّبع الخالي ...إتنفنفت امور الرّئيس ...و رّجع فلوسو الي خاصرهم في البورصة ...ما كفتهش ...وين يلقى سيارة شعبية ...إفك الكونتــــــــــــرا ....و إقول لصاحبها ...أخلط لتونس ...راهو عندي كريز ....جابتو الدورة ...على أبو عامر

دخل الرّئيس لضيعة سي أبو عامر ...كي شافو ...حسب روحو لا في بالو لا في خبرو ما حبش إحشم الرّأجل قدام الحرس و الناس .........يلقى عندو الغنم ...و البـــــــــــل و الخيرات العشرة و الرّاجل في بحبوحة من العيش الرّغيد

· إنت خرّجت الزّكاة ؟
· خرّجت
· هات البونو .....متع بيت مال المسلمين
· ما ثماش بيت سي قاسم
· هات العشرة في الماية
· تــــــــــــــــــــــــــــــاخو سيدي الرّئيس ........إتحبش حاجة أخرى سيدي الرّئيس ؟
· لقيتوش الكريز .....و وإلا مازال إتلّوج
· هاك ألقيتو إنت سي قاسم .................و ألقيتنى معاه
· أه ما قتليش ...مانا شطر بالشطر يا سي أبو عامر
· أه صحيح ....
· هات الشطر ...
· تاخـــــــــــــــــــو سيدي الرّئيس .....إتحبش حاجة أخرى سيدي الّرئيس
· البركوس ما هو بركوسي ....و نعجاتك ما يلدوش
· أه سيدي الرّئيس
· عطيني متــــــــــــــــــاعي
· قداش مـــــــــــــــــازال عندك
· الخير و البركة
· هات البركة و خلي عندك الخيـــــــــــــــــر
· قداش مازال عندك
· الخير
· وين ريـــــــــــــــــــتو الخير يا سي أبو عامر
· من عمل عملا و أتقنه
· من هو
· في سيدي الرّئيس ............
· شد المزّفت ..........سي أبو عامر ! تلقى الخير.

قاسم قاسم