المشاركات
و شد في قاسم الصّحيح يمشي معاه للدّار باش إنشوف ! كيفاش عملها ! و كيفاش رّجعها إتخّوف. القرع ألي السوق الكل شراه ! و الشلالق الكل ! و الشّباك الكل !!!! شنوه دار وّلآت إتقول دار الغولة ...من الحديقة ألي الباب ألتيـــــــــلاني ، تصعب على الواحد باش إقصّها ، إذا كان ما كانش متخضّر و في بالو بالحكاية ...يا حناش تتحرّك ، يا رّتيــــــــــل يشعل ، يا عقارب ، يا هوش من كل نوع ...قال شنوه عيد الخوف ...باش الأولاد ما إخافوش ...هاهو كيفاش يحتفل في أمريكا بالعيد متاعهم ...متع الخوف. عملت بحذاه قهوة ...وطلبت منو باش نخرج للجنينة نعمل سيقارو !!! سكتت للحوتة ...و قلت كان الهالاوين متاعهم نهار و إعدي الهالاوين متاعنــــــــــا بدى و الى الأن ما إوفاش ...بلاد الرّعب و الخوف !!!! خوفنا و خوفهم موش كي بعضو ...الشيئ بعيد على بعضو ياسر.
قلت علاش ما نعملش عيد الهالاوين في جمهورية قاسم ...ماهي جمهورية لازمها أعياد و عطل !! جاء في بالي نهار شبعة نـــــــوفمبر ...عيد الغولة ، أولي أسهل و أقرب للتونسي ، باش يتذّكر و يعرف ألي خوفنــــــــــــــا بدى نهار الأنقلاب المشموم ...على روس التوانسة الكل ...!!!! منذ إنقلاب الشابع من نوفمبر و البلاد داخلت في مغارة ما تعرفش كيفاش و لا منين إتجيك اللّدغة!!! و لا تعرفها و لا عقرب و لا لفعة ...التونسي يهبط من بطنو أمو مخلوع ! خايف !!! أمو إتجيبو خايفة ...وقت ألي في السّبيطارات ولات ثمّة مافية إتبدّلت في الصّغار ...فرمليات ...إتكون المرا جابت بنيّة ...و هي كانت حابة ولد ...ما ثمه حتى مشكل ..أدفع ...و ثمة حتى إشكون قالولها جبتي قطّوس ..عجبك خوذو ..ما عجبكشي تصبح على خير ...و كانت جابت بنيّة و إلا وليد و لكن المافيا لقات فيه سوم باعاتــــــــــــــو ...بيع لا قعد !!!! عندنا دولة الرّعب موش دولة القانون و المؤسسات؟ إشكون المسؤول ؟ صانع الرّعب ..و صانع الرّشوة ...و صانع البسكلاتات التونسية.
تدخل المطار !!! خارج و إلا داخل !! يظربك الرّعب و الخوف و إتكون ماك عامل و لا حاجة !! إتولي شاك في روحك ...و بالك قلت حاجة في قهوة من القهاوي ...بالك غلطشي مرة من المّرات في سكرة من السّكرات ...و قلت كلمة خايبة على النضام الخايب ...التونسي داخل و إلا خارج من المطار يتهلوس و يركبو الوسواس ...إنجم أي شلاكة و إلا كلب من كلاب الحاكم إمرمدك في لختلي ، بجرد جرّة قلم تصبح تبحث ...إكون جد جدك معارض ، يوسفي ، مرزوقي ، شابي ، يحياوي ، غنوشي ، همّامي ، نصراوي ، بن رجيبة ....العائلات المعارضة الكل ...تبحث بدون سابق إعلام ! بدون تنبيه و بدون حتى شيئ !!! بلاد الكلها تبحث ....هالاوينـــــــــــــا في تونس كل يوم و كل ليلة ...و الغولة تمشي على ساقيها ..و الغول إركرك في التـــــــــــــاي تحت كل شجرة !!!! التوانسة من الخوف ولات إحبوه و إعيشوه و ياكلوه و يشربوه...حتى وصلنا لدرجة المهزلة ! نضحكو من أروحنا و إنغولو في بعضنا و إنطيحو ذبانة في أي واحد إسترجل و قال نخرج في اليل باش نعمل دورة و إنشم النسّمة ..شعب ركبنا الغولة ...دخلنا الغار ...يا أمة في الغار!!!! ليس حتما عليك ضلامه ...
تدخل لوزارة من الوزارات !!! راجل كي إتحس بروحك ماكشي خايف ...أبدا و يستحيل !!! الرّعب يركبك من الناس الي إمسلّحة الكل في الكولوارات ...في كل تركينة تلقى واحد إعس !!!! علاش إعس زعمة ؟ على حتى شيئ ؟ إعس على أشكون دخل و أشكون خرج !!!! إقيدوك كي تدخل لأدارة من إدارات الشابع من نوفمبر ....علاش إقيدو فيك ...إنت تعرف ؟ إتسرقتشي حاجة !!! تسرقشي دوسي ...فيك ديريكت ...هوما لا ...أيادي نضيفة ...و لكن في السّلاح !!!! \الرّعب موش كان في الأدارة التونسية ...متع الوزارات !!! لا عاد.
في أقل إدارة ...في الرّيف ...يوصلك التهديد للمكتب متاعك ...رئيس شعبة خدمتو إهدد في الموضفين ...و يعطي بطاقات الوطنية ...و إدخّل و أخرّج ...يتصّرف في المال العام و الخاص كذالك ..مدير المؤسسّة يتفرّج خايف لا إصب بيه الصّبة ...
البو ولى إخاف يحكي في الدّار متاعو ...الولد مازال صغير و ما يفهمشي ...يمشيش إقول لأصحابو بابا داخل الفايس بوك ...بابا يقرى في الأنترنات ...بابا يكتب في الأنترنات ...حتى قصّة ..حتى باش إعلّق تعليق ...ما عندو حتى قيمة ...
علاش بن علي زرع الخوف في البلاد ........لحاجة وحدة ...باش إعبي جيبو ..هو المرا و الطرابلسية و المافيا ...متاعهم ...قال إشنوه أمن الدّولة ...ما نحكوش على الديوانة ..وخذينها الطرابلسية خضارة ...تباعت ...عندها ياسر ...و لا دواني و لا موضف سامي و لا حتى جينيرال في الدّوانة إحل فمّو قدام خدّام الطرابلسية ...إدخل و أخرج في الكونتيــــــــــنارات ...إتقول رزق السّيد الوالد....الديوانية ولاو خدامة عند الطرابلسية ....إنت رجل أعمل و تدخل الدوانة ...عمّل على جيبك و إلا راسك إطير ...جملة ...إتخلّص الديوانة و إتخلص بن علي و أتخلًص الطرابلسية !!! و إتخلّص العساس
بلاد إدّور فيها عسّاسة ...إنعم ..تلقوهم قدّأم كل وزارة و قدّأم كل إدارة ...هات ...مشي الدوسي يتعدى ...قلت لا ..إنت إرهابي و إتهدد أمن الدّولة ...شبعة نوفمبر لا يعرف يحكم و لا يعرف إجاري بلاد و شعب ....إلا بالخوف ....زرعو في عضام الناس ....
هنا جمهورية قاسم ...جمهورية التحدي ...قاهرة الخوف ...
قاسم قاسم
ليست هناك تعليقات:
إرسال تعليق