المشاركات
كي العادة ، العاشرة إحترام الجار ! البرباش قدام دارهم ، و قضيّة صغيرة في يدو ، داخل بيها للدّار ! أمو تستنى فيه بفارغ الصّبر ...العين في العين ! يترشق بالضحك !!! تترشق أمو كيف و إتقولو أيجى أحكي ...شنوه الجديد الليلة !!!
· وحدة جديدة الليلة ؟ وين مشيتو تخطبو ؟
· الليلة بعدنا برشة ....بعيد ما يسمع حد...أما يا أمي قطعة ذهب ...تعرف الزوز ماشاء الله عليهم
· كيفاش با تعمل مع زوز نساء ...وين باش أتحطهم ؟ يا أخي باش إطردنا من الدّار
· ثمة حاجات ما زال ما نعرفهاش ....موش عارف شنوه ألي في راس قاسم ؟ من ناحية زوز نساء ، مفهومة ..
· مفهومة ...كيفاش ؟ فهمني ؟
· ربي إمسرّحلنـــــــــــــــــــا في أربعة !!! شنوه المشكل !!!!
· إسمع اللّغة هذه موش معاي ...يسمع بوك بالحكاية ...إولي إقول ...إنحب إنطبق الشريعة؟
· لا لا ...كبر هذاك.
و يخرج بو البرباش في البيجاما ...و إتقول عليه سمع كل شيئ ..
· شنوّه كبر ؟ يا برباش ؟ أش معناتها كبرت ؟ مازال إنطنطن ...باش إكون في علمك
· بالله يزوني من ها التخلويض !!!! في بالك ولدك مشى يخطب في وحدة أخرى !!!
· موش مع بعظهم ...؟
· لا ألزوز ...في دار وحدة
· برباش ....وين باش إتحطهوم ...و تعرف الميزانية ...يا برباش ...وحدة و ما قلتلناش متفقين..لكن زوز راك بلاّغتلها ...
· كان موش أربعة يا بابا ....ألتوه ما نيش فاهم أش قاعد إخطط المخرج، ما هو ديما إنجم إنعمل عليكم كان صار ما صـــــــــــــار
· بالطبيعة ....أمك تظرب عليك ...و بوك ما إخليكش
· شوف ....بابا ......حاجتي غدوة ....بزوز كوستسيمات جدد من الباكو ...لبسة كاملة
· ناخو قرض لسيادتك ....منين جوني الفلوس ؟ يا برباش لازمك زوز كساوي
· أنا قتلك و إنت أعمل إلي في راسك ....ماك
· برى برى للباكة غدوة ..........و خوذ قرض جديد ...موش باش إنخلو الطفل عريان ( أمو).
في نفس الوقت ألي يتحدث فيه البرباش مع بوه و أمو ....قاسم يبعث برسالة ألكترونية للقوفرنــــــــار ، يخدم في البانكة وين بو البرباش عندو الكونت
ألي السيد القوفرنار :
واحد : إيجيك غدوة بو البرباش ...باش يطلب قرض !!! تعطيه 50 مليون
ثنين : إنتهت الرّسالة
ثلاثة : التنفيذ حالا و دون تعليق
الأمضاء قاسم قاسم
كان الرّأجل يعقل ، كي طلعت قداّمو الميساج ...قعد حال فمو ..باهت في الأنتاج ...و قال !!!! هاذي إمباصية ماية في الماية ...قاسم هذا كان ما وحلناش الكل في الحبس ...ما يرتحلوش بال ...خمسين مليون لا ياسر لا شوية ...كان جاب بو البرباش الحجّة متع الدّار ...متفقين و كان ما جاب شيئ ...لإشلّم عليه العقل....طفي الكوميوتر و رقد ...العنين محلولة ....و ‘قول : عن بو النهار ألي عرفت فيه قاسم و البرباش و الطرحة الكــــــــــــــل ...النّوم و الله ما شافو ...
الصباح يا فتاح يا رزاق ...لقى روحو في البيرو ...و إشكون واقف قدّامو : بو البرباش .
· بو البرباش : صباح الخير ...هذا الدوسي متاعي ...طالب قرض بقيمة خمسين مليون
· شويه موش ياسر
· علاش
· باش إنعرّس لولدي البرباش .
القوفرنار ، كان يعقل ...البرباش إعرّس بخمسين مليون !!! أش باش إهبط ..هذا مايكل إتجكسن و إلا مادونا ...ما فهم شيئ ..هز حط ...ما فهمش التنكبيصة هذه....و لكن الأموامر متع قاسم ...ما لقالهاش حل.
· الدوسي هاهو كامل ....كل شيئ فيه
· أه حاضر ...ما نقص و لا ورقة
· من جيبي أنا ......يا سيدي ...تعرف كيفاش ...عندك خمسين مليون تحت التصّرف متاعك في الكونت....
في نص النهار بالضبط !!! إشكون يدخل البانكة : قاسم و البرباش !!! يهبطو على القوفرنار ! على الكونتوار ...و كأنهم عمرهم ما شافوه ....و لا حتى يعرفوه ...كل واحد عندو فاليز ديبلوماتيك ..كساوي متع 500 دينار على الأقل ..
· سامـــحنى خوّه ..حاجتي بعرفك ؟
· ( بصوت خافت القوفرنار) تتمنيكو و إلا بجدياتكم
· لو تسمح ...إتصل بعرفك ...قولو المديرين مع شركة الفسفاط حاجتهم بيك
· فزي قوفرنار ...قال البرباش !
هيّ أطلــــــــعو معايا ...إتفظلو يا مديرين ...ظرب على الباب ...و دخل وحدو ...وشوش لعرفو و رجع بسرعة ...و قال إتفــــظلو ..
· السلاّم عليكم ...
· مرحبــــــــــــــا
· جيناك بقضية صغيرة ...ولدي البرباش مدير معمل المظيلة ...!!!
· أه
· عندك شوية وقت يا أستاذ
· رانا ما عرفناش الدّار ...قلت نتعدولك للبانكة ...راني جاي نخطب في بنت الحسب و النسب ، صنية بنتك ...لولدي البرباش
· مرحبــــــــــــــا ...زارتنا بركة يا أهله و سهلة ...خلينا نعملوها أوفسيال ...هاهي دريسة الدار ! و الللية العشاء بحذاية ...أش قولكم
· ما ثمه حتى مانع ...قال البرباش
· باهي تعرف كيفاش برباش ...أنا عندي إجتماع الليلة ...إتولي هز إختك أرابيكا ...و صاحبك القوفرنار ...و تمشــــيو عند صنية ...هونا كل شيئ منظم
· تعرف بابا ...ما ناش باش إنعطلو الرّاجل ...يخدم على روحو ...
· مرحبا بيكم في كل وقت .......البانكة بانكتكم ...و الدّأر داركم .
القوفرنار ..كان حاضر ..و عيـــــــنيه شعرة لا خرجو من رسو من البلوف و الكذب متع قاسم و البرباش ! و إشكشكت في راســـــــــــو و ما فهم شيئ ...
· القوفرنار ...صنية إشكون ...الي تخطبو فيها ...بنت المعّـــّلم و إلا إشكون ، سيبو عليكم خوها راهو ...أمر الحرس الوطني ...إنحيلكم والديكم ...إعرفو مع إشكون تلعبو
· إنت ...سي القوفرنار ...الللية ...تمشي مع الجماعة ...و ألي يعملو البرباش ...إتقول الله إبارك ..مفهوم
· خطر ...راكم ...خطر ....باش إترسيلي في الحبس
قاسم قاسم
ليست هناك تعليقات:
إرسال تعليق