المشاركات
كي العادة ، عشوة ، الشمس طاحت و البرباش لبس الكوستيم ، رشّة برفان ، ربط البابيون ! المرسديس متع قاسم وقف قدّام الدار ! حل الباب و قعد سي العريس ، بالطبع من تالي ...لاحظو كيفاش إتقدّم البرباش في الدّور ...و كيفاش قاسم بدى إحل في الثنية قدام الملاعبي الجديد ...خرجت الكرهبة بكل هدوء من الحي ! و لا واحد لاحظ حاجة و لا أم البرباش ...فاهمة و موش لازم إنها إتولوج علاش و كيفاش !!!!!
· وين نقصدو ربي يا عرفي ( قاسم)
· برى نخطبو أربيــــــــــــكا اليوم ، أما قبل إتعدى نشرو حاجة مضخمة كهدية ؟
· إمثبت أرابيكا ؟ علاش ؟ من صنية ؟
· أربيكا بوهـــــــــــــا ...قاضي كبير ...في المحكمة الدّستورية !!!!
· زعمة إنغولوه !!!
· ما ريت كان هو ؟
وقفت الكرهبة قدّام باتيسري ...خرج قاسم في لحضة و جاب معاه باكو قطو ! شنوه باكو ما إدخلشي من باب المرسدس ...
· إتحب نشرو حاجة أخرى يا بارباش !!!
· إسمع أرابيكا إتحب الكسكروتات ....بالتّن ...لازمك تشري كسكروت كبير
· موش مشكل ...خبزة كسكروت و بوقا بو ليترا و نص .....صى فى ؟
· أزرم يا سي قاسم ...
· حاضر عرفي ...
في لحضة كانت الكرهبة ، قدّام الدّار ، هبط قاسم ، ظرب الناقوس ، مرّة وحدة ! و قعد يستنى !!! و لا واحد خرج من الدّار ؟
· هاهو ما ثمه حد يا سي البرباش ؟
· كيفاش ما ثمة حــــــــــــــد ؟ توه إحلو !!! أصبر
العروسة بالذّأت خرجت ، أرابيكا باش إتحل الباب ، إشنوه قنبلة يا جماعة ! طول و جمال ! عفّة و رشاقة في نفس الوقت ...أرابيكا عمرها ما شافت قاسم و عمرها ما تعرفو
· ع السّلامة ...زوز إتــفضّل
· السلام عليكم ....السيد الوالد موجود ؟
· إنعم !!! قولو القاضي قاسم قاسم حاجتو بيك ...و إلا تعرف كيفاش قولو ثمة واحد إشرشي على عضام الصّردوك
أربيكا ، مازالت صغيرة ما تعرفش الكلام الصعيب هذا و ما نجمتش تفهم ألي عضام الصّردوك يعنيو النساء القلال منهم ...في وقتنا أحنا ...المـــرا وقت ألي تمشي تخطب ، إتقول ماشية إلّوج على عضام الصّردوك لولدي ...بوها بالطبع يفهم أشكون في الباب و علاش ألوّج
· هاهو بابا ...في الفيراندا ...أصلي ...تفضّل أدخل يا أستاذ
· لو تسمحي ثمة إشكون معاي ...هاهو في الكرهبة
· أي موش مشكل ...إتفظلو الزوز ...يا مرحبـــــــــــــــــــا
كي إمشيت و حليت الباب للعريس ...و البرفان عمل حالة ...أربيكا شافت البرباش واقف أمامها في كستوم ! ما صدّقتش عينـــــــــــها ...
· إنت البرباش ؟
· أنا و نص ...ما عجبتكشي
· لا أبدا ...شو ها الأناقة ...أش جاي تعمل
· إسمع ...طيبت حاجة باهية و إلا لا ؟ ...سي قاسم ما كلى شيئ !!!! و أنا كذلك
· شنوه ؟ إشكونـــــــو قاسم .....قاسم متع البعابص ...
· لا لا قاسم متع الجمهورية
· إسمع ...إنسكّر الباب ...و تمشو تلعبو بعيد ...ما إدروش بدارنا
قرب قاسم من أربيكا ...و شدّها من ذراعها ...بكل لطف بالطبع
· فهمت أش قلت لبوك ؟ عضام الصّردوك أش يعنــــييو ؟
· لا
· خطبتك للبرباش ...فهمت ؟ أش تعمل توه كي بوك يستنى في الخّطابة
· حصّلتوني ....أما راهو ما نيش باش إنوافق
· إسمع ........ ( البرباس )، إتنفذي الأوامر بالحرف ...راني باش إنباصي ...
· باهي ...إدخلو ....
دخلنا وراء العروسة ...أحنا مشينا لبوها و هي كملّت للكوجينة ...
· السلام عليكم سيدي القاضي
· السلام و رحمة الله
· و الله باردة الفيرانده عندكم ...سيدي القاضي ...هذا ولدي البرباش ...مهندس تكنولوجيات حديثة ..إنشاء كان حب ربي ...جايين نخطبو فيك ...في بنت الحسب و النّسب ...بنتك أربيكا
· الطيبون للطيبات يا وليدي ...كان كتب مكتوبها علاش لا ؟...هاي نمشو نفطـرو ...
· و الله أحسن كان إنخرجو الطاولة ألبرّه ...يا قاضي أش قولك ...برباش برّه خرّج الطاولة إنت و أربيكا ...
أربيكا قرصت البرباش ، يدو ما عاش إمنجم إحرّكها ...فشلت ..و كيخ كيخ بالضّحك ...شعره لا الفطور مشى في الهاوية
قاسم قاسم
ليست هناك تعليقات:
إرسال تعليق