التّونسي متاع التّونيزين

بقر الله في زرع الله...

مادام السّرطيّة وبوليسيّة السّيركولاسيون والأمن الجامعي ولاو يفهمو برشة ودوّروها جمهورية الغد و إستفتاء وتحوير دستور قلنا نشاركو معاهم يما تيسّر لا يتّهمونا بتعطيل المجهود التنموي وبعدم المساهمة بالنّهوض بالمواطن التّونسي و أخيه الإنسان وكيما تعرفو في تونس ساهل برشة باش الواحد يلقى روحو متّهم بحاجة معملهاش, عاد من المستحسن يعملها بيدو, ثمّاش ما ربّي يزيدو, خير من اللّي يقعد يعضّ في صوابع ساقيه حين لا ينفع النّدم.بدون إطالة ندخلو في الموضوع اللّي هو أنّو ثمّة مواطن غير صالح يحبّ يكعبرها لبقيّة المواطنين و يضحّك عليهم بني آدم وبني إسرائيل قال شنوّة "إصلاح دستوري جوهري يؤسّس لجمهوريّة الغد" بينما النّاس الكلّ تعرف أنّها لهقة و نهلة و غطّة و حشية و تكركيرة و تدرويش و تزعبين و بلادة و ركاكة و تجلطيم و ضربان لوغة و دزّان بيدق... و بيما أنّو المواطن هاذا زكرم بكرم وشارب دواء غالط و أبهم من صبّاطي دوّر بيه جماعة ولاد حرام و مهفّات متاع تحوّل و خاصّة متاع تحيّل على القانون منذ نعومة أظفارهم, بنادريّة من الطّراز الرّفيع, شهايدهم شطرها مزوّر والباقي بالفوسكة و المراكز اللّي وصلولها تكلّفتلهم شكاير طحين و قوادة و صبّة... اَما شعلينا فيهم توّا على خاطر الرّهوط اللّي كيف زهير المظفّر و الصّادق شعبان و عياض الودرني و عبد العزيز بن ضياء و غيرهم كيف الذبّان مايتلمّوا كان على خرية و نحنا و مع كامل إحتراماتي ليكم باش نحكيو على الخرية فقط... يا فقط.التّحوير الدّستوري اللّي يحبّوا يشرّبوهولنا بعابص الكبّار متاع كليّة العقوق والعلوم القالونيّة صباحا مساءا وقبل الصّباح وبعد المساء و يوم الأحد هو نسخة مضرّحة برشة و فوسكة مالتّحوير اللّي عملو سيّئ الذّكر "بينوشي" متاع الشيلى باش الشّعب متاعو ما ينحّيلوش جدّ بوه الكلب ويبهذل بحالو قدّام المحاكم الابتدائية و الثانوية بعد العمايل الزّرقة اللّي عملها في أحفاد ال"إنكا" و ال"أزتاك" و بما أنّو التّاريخ يعيد نفسو هاو زينوشي متاع الشّّهيلي عجبتّو اللّعبة و عرّبها باش يزيد يخرّبها :الفصل 41 – فقرة 2 : يتمتّع رئيس الجمهوريّة أثناء ممارسة مهامه بحصانة قضائيّة, كما ينتفع بهذه الحصانة القضائيّة بعد إنتهاء مباشرته لمهامه بالنّسبة للأفعال التي قام بها بمناسبة أدائه لمهامه.بالرّجولية عندي برشة ملاحظات عالعفسة التّحفونة هاذي :• يا سي زعبع راهي "الحصانة القضائيّة" مقطوعة من نهار 2 فيفري 2002 آما كان تحبّ حصان راهي البلاد معبّية وما عليك كان تختار و كان تحبّ نعاونك هاي بعض الأسماء اللامعة : منصف قوجة, الشّاوش علي, صلاح الدّين العامري, محمّد بوشيحة... آما إذا مصرّ أنّو الحصان يكون قضائي أهوك عندك صطوفة الكعباشي و الجديدي غنيّة و توّا نزيدو نشوفو دوسيّات الأخرين.• يا سي زعبع التّوانسة ماهمش باش يحاسبوا رئيسهم على "الأفعال التي قام بها بمناسبة أدائه لمهامه" على خاطرك ما عملت شئ للبلاد آما باش يحاسبوك على الأفعال اللّي ماقمتش بيها, مثال : عدم منع الفساد و المحسوبيّة و الرّشوة و التّعذيب...• يا سي زعبع تنجّم ترقد مطمان على خاطر الموتى و المجانين ما يحاسبهم كان خالقهم.و الآن سيداتي أوانسي سادتي إليكم مربط الحصانة... عفوا الفرس, الفصل الذي لا يشق له غبار و البحر الذي ليس له قرار و من به المعنويّات سريعا تنهار لأنّه كشف كلّ الخنّار:الفصل 39 - جديد : ... و يجوز لرئيس الجمهوريّة أن يجدّد ترشّحه.• ماكمش تحلموا و ماهيّاش غلطة مطبعيّة الفصل 39 يوفى بنكتة وارجع للسّطر و ماعادش يوفى ب"يجوز لرئيس الجمهوريّة أن يجدّد ترشّحه مرّتين" ونكتة... ومعناها بالعربي يزّي مالضّحك.• واللّه عندي اقتراح للجماعة متاع اللّعب بعشانا و عرفهم زعبع علاش مايزيدوش يبدّلو واحد من فصول العام و يسمّيوه 39 على خاطر من نهار اللّي شدّو الحكم لا رينا لا شتاء لا ربيع و لا صيف وسخشيّا نقترح عليهم التّقسيم الآتي : فصل الخريف 1, فصل الخريف 2, فصل الخريف 3 و الفصل 39.

"و يقولولي بطّل السّبيريتو"

Ettounsi Mtaa Tunezine