ليس حتما علينا بن علي و التجّمع متاعو

الــــدّار داركم يا لـــــولاد
أيها المدونون أيــتها المدونات
ليس حتما علينا بن علي و التجّمع متاعو

إنعم إنا طالبها ! على بن علي و التجّمع و المافيا السياسية الكل ! الجمهورية هذه عاملها تحديا لبن علي و حزب التجوّع ! عملها للتوانسة ألي حرمت عليهم بلاد الأمن و الأمان ! للفلاحين ...للعمــــّال ...للناس الكل ...للطلبة للتلامذة ...للموضفين الصغار الي كلاهم الخبط ...لأمهاتنا ...لأبــــاتنا و أولادنا .... حليت الجمهورية باش ما إموتش عندنا الأمل ، لأنهم قتلوه ! باش ما إموتش عندنا الخيال ! و باش كل تونسي إحل جمهورية وحدو ...و يتحدى بيها القمع و إرهاب الدّولة ! وقت ألي التونسي يتخلق من جديد ...ساعتها رانا باش نربحو الكونبــــــــــــــــــا....إذا لا بد من الأعتقاد في الرّبح ! و على أرض المعركة ...بدون عزيمة إتكسر الحجر ما إصير شيئ ! بدون إصرار يستحيل الواحد ينجح في حاجة ..فما بالكم بتغير نظام كامل و تأسيس جمهورية جديدة ! تدفن الحقد و الكره و البغضاء ...خمسين سنة و ألي الأن ما نجمناش نعملو دولة مسؤولة أمام المواطن ...؟ علاش ...لأننا ما حبيــــناش ! لأننا إنطــمنو في أرواحنا ! هاهو باش يهديه ربي ...ها توه إنكلّمو المرا عندو ...توه إشيخ و إنكلّموه ....هذه ألكلها دوة فارغة ! العزيمة و الرّؤية الواضحة إتقول ....ليس حتما علينا لا بن علي و لا التجّمع ...و لذلك إنتهى موضوع المطالبة ....و بدى موضوع جديد ....البـــــــــــوفوار ...و فكو من الأيادي الفاسدة ...و مومارستو ...بأقتناع و صدق.

أنا موش معارض أبدا ...كلمة معارضة هذه كلمة جات بيها الديمقراطية ! ما عندها حتى وزن خارج نـــــــضام ديمقراطي ...أنا هوني باش إنفــــك حقـــــي و حق الأخرين و حق الشعب التونسي ..بالتمام ...باش إنكونو واضحين من الأول.

الحلقة الأولى ...و التمشي الصحيح هو تعرية الديكتاتورية ...باش إنشوفو الهيكل متاعها و أنا ساق لازم نظربو عليه ....هنا نتعارض أنا و برشة ناس في مفهوم الديكتاتورية ! راهي ما هيش مرض باش يحقنـــــــــــو المرزوقي ...ما هيش جامع إشرشيلو الغنوشي في قبلة ...ما هيش شركة أحب يدخل الشابي في راس مالها ...ماهيش مكينة باش تصّلح ! الدكتاتورية في مفهومي ...بناء هندسي ...عندو عرص و سقف و حيوط ...و قش و برشة دبك ....الظربة القاتلة ...لازمهـــــــــــا شباب صغير ...يعرف وين يضرب ..الظرب على الرّكايب ...على العرص ...متعها ....الدكتاتورية هذه واقفة على التجّمع الدستوري ...ألي ماهوش قادر كان باش يخلق و إلآ إيجب دكتاتور بعد الدكتاتور.
.****

فاصل إعلامي

أما الستاق الجديدة ما زال ما إسمعتوش بيها ؟ ستاق الأنترنات ....أي كل ما هو شبكة عند العزوزة يسمى بستاق. مع فتورة الضوء و فاتورة الماء جات فتورة الهاتف و النترنات ...الماء متفقين فيه و الضوء متفقين فيه لكن أش نعملو بالتلفون المحمول ؟ يا جماعة إتقول التوانسة إلكلّها تخدم في معامل الطيران و معامل السلاح و معامل النووي !!!إيكون ضروري جدا باش الأدارات متاعهم تتصل بيهم في كل وقت و في كل مكان !!ما كنتش نعرف ألي أحنا إطورنا للدرجة هذه ...بصراحة التوانسة الكل يستاهلو حتى إستاق متع إنترنات وايرلاس ...بلا كوابل؟ البلاد في خرير و نعمة كان في الكلام و بالكلام !!!! أي بلادنا دربوكة و المزود خدام بالأنترنات و الشات. الأس أم أس ما نحكوش عليها !!!ولات نوفي في التلفزة و مباشرة ! وقت الحكومة متع شبعة نوفمبر ما لاقات بش تعمل بالهواتف النقالة رجعت منهم وسيلة متع قمار عين جهار و كأن التلفزة الخاربة رزق السيد الوالد متع المدير ؟ لا ربما وارثها على جدو !!!!لا يحشم لا يجعر إبيع في البوند باسونت و التياميق متع الأنتان بالفلوس الكل متع البطالة باش إخليهم يحلمو بخمسين مليون ...شعب يحلم في المباشر بالفلوس و بالهامر و بالوتلى و السهريات متع الليالي الحمراء. مالا زيدو أحلمو كما إتحبو و تو تربحو كما ربح محمود شريف في الكازينو متع لوس أنجلس. ما كمشي حابين تفهمو إلي : الخيل و النساء و القمار ما إكونو كان صنعة الي ما عندو صنعة ...إشري بورتابل جديد و شاتي و أبعث أس أم أس باش تربح ماية مليون ....أحلم يا ولدي ...الحرية و الكرامة ما إتجي بالبورتابل و ما إتجي بالشّات !!!!!!!

الحكومة متاعنا حكومة بورتابل حتى هي ...مخفوقة و خفيفة و إتفرخ كل عشرة سنين. كان كم إفهمتو الي بوه بوليس ما يخرج من بلاسطو كان ما إدخل ولدو في بوقعتو و الدواني و الله ما يتقاعدها كان ما إدخل حد في بلاسطو و يتهنى على شهرية أخرى جاية من الرشوة ....المهم الحكومة هي نفسها منذ خمسين سنة ...إستر الخالق السلطان ما عندوش ولد كبير باقي راهي زادت خرية و راهو شاد خناق العباد ليل و نهار.

المهم الراجل قالك ما نيش مسلّم كان ما يتهنى على البلاد و يطيحها بين إيدين على الأقل واحد من الأقارب ...كان موش سليم شبيوب ...راهي مقولة إنسيب و لا بن عم قريب إتولي أصدق مقولة في العالم و هاذا الي باش إيصير حب من حب و كره من كره و خلي الشعب إيشيخ في البورتابلوات ...شعب ما فالح كان في الدوي و الدوي الفارغ...الناس تصنع في الهاي تاك و أحنا خلقنا ربي باش نطلبو المزيد و المزيد و ما إتعلّمنا كان التّفشفيش و التفزعيق على الناس الي تصنع في التكنولوجيا ...و الحكومة إتعيط على الفتورة النميريك.....علاش الشيئ هاذا ...خايفة على قراجمنا باش إتّبح و إلا شنوه؟ لا الفتورة الي تحكي عليها الحكومة ...موش الفتورة متع الأنترنات إنما فتورة أخرى إنو التونسي يشلق بحكاية التليكوم و يفهم الي الشيئ يجري تحت ساقيه و ماعاد ينفع فيها لا أس أم أس و لا شات على الأنترنات....النترنات هذه ولات مصيبة للحكومة كما ولات مخدر لشعب ما هوش حاب يفهم الي التكنولوجيا عنوان حرية قبل ما إتكون عنوان قمار و زندقة متعدية عليه.

ياخي ولاتشي البلاد الكلها محاصرة من الشمال للجنوب من أجل إستاق النترنات؟ هاهوم جماعة الكاف دخلو في الفن ّّ!!!!و شدوهم يسمعو في الموسيقى المعارضة ...هاهم جماعة قبلي شدوهم يقرو في الصحفة المعارضة ...جماعة جرجيس خلصو ثاني و مثلث على بن لادن و على بوش!!!!!و الله حكاية مع إستاق الأنترنات و ما أقوى ها الفيتورة النيميريك.....رسول الله الغرب يصنع و أحنا نحصلو في جرّتهم !!!!! ما أحقر حكومة خايفة من ظلّها ...حكومة ما هي بايتة ترقد ...خايفة ليل و نهار يخرجش نهار من النهارات واحد من الأنترنات و إطيح قرطاج و أسس جمهورية ...ثلاثة حتى معوجة.....خافين موش على الشعب التونسي أما خايفين على بلايسهم و على شهرياتهم و الرّشاوي متاعهم و الكراهب متاعهم ...عندهم مصلحة في ديمومة الديكتاتورية و ديمومة الخوف و بث الرّعب بين الناس.

يا سيدي يا سيد الرّجال حكومتنا و الله لا إيهمها تعمر و إلا تخلى المهم الحكم و شدان الشيشمة متع البلاد ...بالشطر ...البلاد وخذينها خضارة ...و الي ياخو الحوازة خضارة عمرو ما إيحافض على الأغصان متع الزّيتونة ...يخرط في الزتون بالعصى ...إنعم ضرب شي إدمّع العين ...حتى من الأغصان الصغيرة الي معملّين عليها العام الجاي كسّروها و ما خلو فيها حتى عين...نوارة لا ّّ!!!يا صحوبة ...بلادنا مشات زيزى ...مشات خضارة العام هذا و العام الجاي باش إيدخلوها في الصمصرية بعد ما باعو الزيتونات الكبار....الزتونة متع القرعة الي غرسها جدي ( التيليكوم) كانت إتهبط كل عام في خمسين ويبة زيتون و أتوكل الناس الكل ...العام الجاي سلامتك في إستاق الضوء و العام الي بعدو سلامتك في إستاق الماء و العام الأخر سلامتك في إستاق الكلام.

كيفاش باش إنخلو الشباب متاعنا يفهم و يعرف الي الوقت راهو ما يخدمش لصالحو و أنما كل شيئ ضدو حتى من الرّيح؟ إنحولهم الأنترنات و الشات ؟ نبعثولهم رسول أخر يقراْ عليهم الفاتحة باش إيفيقو؟ لا يا راجل ...الشباب هاذا ما إيفيق كان كي يوحل في الشيئ إلى رقبتو ...وقت الي تظربو البطالة و إطيشو الحيط توه يفهم الي الوقت الي ضيعو في الضحك و دزان الحنك كان بمثابة الخنجر القاتل الي حطو في يد الجراح متاعو....وقت الي الشباب متاعنا ما إلقاش إشكون أيكادريه من المعارضة بالطبع مشى في مشروع حلم الأس أم أس و مشروع الشات و مشروع أخطى راسي و أضرب.

المسؤولية و كل المسؤولية تتحملها المعارضة لأن الحاكم حط الفلوس الكبار باش إشجع على الديلانكونس و الهيبي و التسيب و المزويد و الدربوكة و من بعد زاد علي القمار مباشرة و خلى الشباب يجري وراء الوهم و وراء شيئ من المستحيل باش يفرح بيه. النضام هاذا خلق عدو وهمي للشعب التونسي و خلق في نفس الوقت هدف وهمي للشباب ...خلاّهم يجرو إلى الأمام باش يخلطو على كنز أس أم أس و في نفس الوقت هاربين من مواجهة الواقع متاعهم المرير ...بتشعيل النار في كل صوت معارض...إشبيك ثماشي معارض إنجح في حياتو ؟ بالمفهوم التونسي ...أبدا لا؟

بالمفهوم التونسي النجاح يساوي إنك عندك العط و عندك الجاه و عندك السلطان و إتنجم تقضي الحاجة ...إبتداء بأقل معارض إلى أكبر معارض الناس هذه كلاتها الغربة و كلاها الجوع و كلاتها العصى و كلاتها كلاب الشوك و كلاها الفقر و كلاها الموت. الناس أش إتقول علي زهير اليحياوي ؟ مات كلاها في رقبتو ...أش إتقول على المنصف بن سالم ...يستاهل ما هو خوانجي ...أش قالت على الزواري و على الجبالي و على بن بريك و علي و على ...قالت الناس الي هوما ما يفهموش و ما يعرفوش و يستاهلو .

...إنعم ولات شماتة لأنو المخ متاعهم لعب فيه الخوف و في نفس الوقت إتبدلت المافيهم متاعهم متع الرّجولية و العطاء و الحرية و الكرامة و النضال بمفاهيم أخرى لا علاقة لها بالأنسانية. الشيئ هذا السبب فيه هو نضام الشابع من نوفمبر ...بالعربي بث و تشجيع ثقافة التسّيب و ثقافة الزندقة و ثقافة المافيا و ثقافة الغدرة و السرقة و الخيانة ....قالي واحد من الجماعة مرة من المرات ...سيب عليك تو يجبدو بيك و كان تحصل يا قاسم و الله ما تلقي حدّّ!!!!!!إنعم الناس تتكلّم بالشكل هذا ...جانتي مرة رسالة من صحوبة قالي سيب عليك من الكتيبة راك ماك باش توصل لي حتى شيئ ...راك تمشي ملح و تمشي زيزي كما إمشات الرّجال الكل ...ريض يا قاسم و اخطاك و فك عليك من الحرية و الكرامة و من زينب و من قيس و جماعة لا حول لهم و لا هم يحزنون...الرّد كان بالكتيبة أكثر و اكثر و الأقتراب أكثر و أكثر من مشاغل العباد و بالّغة متاعهم الي يفهموها ...لازمنا نصنعو في كل حي قاسم و في كل قرية زهير و في كل محكمة عبو و في كل جريدة سليم و في كل صفحة شهرزاد و في كل لابوراطوار بن سالم ....هكا و هكا فقط يفهم نظام بن على .....التصعيد ثم التصعيد ...حتى نتخلصو من أخطبوط التجمع و المافيا متاعو ....كان المعارضة هذه ...إتزيد في التصعيد كل درجة و إلا زوز و كل يوم تعمل مشكلة في بلاسطة تو ى يفهم النضام هذا الي هو ولى متكلف علينا غالي برشة.

الشعب ما يخرج للشوارع كان ما يعرف مية في الماية الي المعارضة قادرة باش إتشد البلاد و تحكم و ما إطيح من النهار الأول...الذاكرة متع الشعب التونسي ذاكرة قوية و تعلّم في برشة مرّات ...و تخذل في عدة منها ...ما عادش باش تتعدى عليه ثورة خبز جديدة و لا إسلامين جدد و لا شبعة نوفمبر جديد ...هاذا الشيئ الي ما حبيتش تفهمو المعارضة ....مازال الشعب التونسي ما هو عارف على حتى شيئ لأنو مغيب تماما إلى يومنا هذا ...

مفهوم الثورة الي في الذّاكرة متاعو هو مفهومها متع ثورة الخبز ...ما إتبدلش المفهوم هذاك لأنو الشعب ما مرش بعدها بتحركات كبيرة و ما إنتصرش إتنصار أخر إشد بلاسطة ثورة الخبز...هذا تحليلي لمفهوم الثورة عند الشعب التونسي و كما العادة ما يلزمناش إنجددو حاجة قديمة مستعملين لغة : إشتدي إزمة تنفرجي بمعنى : إنزيدو في الضغط على النضام حتى تنجبروه باش إيزيد في الخبزة و قتها تو يخرج الشعب التونسي ...كلام فارغ هذا ...لأنو النضام نفسو إتعلم كيفش لازمو إيزيد في الخبزة ...زيادة الزريقة بالشوية بالشوية ...و الشعب فهم الخشلة و ركش كما عادتو في إتضار مخلوق أخر قادر إبدلو المفاهيم الي راسو الي توقفت على التطور منذ ثورة الخبز...في خلاصة الثورة نحن إذا نعيش بمفاهيم ثورية متع عام الخبزة في وقت مافية الخبزة...إذا لا بد عملية الميز أجور متع علاقتنا مع شعبنا ...نحن متأخرين بالنسبة للشعب التونسي.

باهي ...ثمة حكاية الديمقراطية و الّعبة متاعها...أنا نعرف ماية في الماية الي الشعب التونسي ما يثقش في ديمقراطية النضام و كي يقرى عليه ستين حزب ...و كل واحد يدخل مع النضام في شكشوكة الديمقراطية باش يقنع الشعب التونسي بالدخول في إنتخبات ...إنقولو الي الشعب التونسي راهو باش ينتخب النضام ليس جبنا و لكن شماتة في الي جبد بيه و حب إيعديها عليه....من أصعب خلق الله على وجه الأرض هو التونسي ...يستحيل إنك تفهم ماية في الماية و يستحيل يعطيك الجنب كان ما كانش مطمان على بيتو و دارو و صغارو ....تحكم فيه حاجتين : عصفور في اليد و لا ديمقراطية إطير ...و ثانيا : في راسك و لا في راسي أمي...خلاصة مشاركة أو مصالحة النضام لخوض إنتخبات ديمقراطية ...كان إتنحوها من روسكم أحسن لأن الشعب هذا ما يمنّش بالديمقراطية: حتى و لو يترشح بوش ضد الزين ...الشعب التونسي يمشي مع الزّين ....الشيئ هاذا راهو في الكروموزوم متع الشعب التونسي : ديكتاتورية متاعنا و لا ديمقراطية غيرنا ...و هذي هي الورقة الي يلعب عليها النضام التونسي و التجمع بصفة خاصة ...التجمع قادر يعمل إنتخبات ديمقراطية إلى أخر لحظة قبل ليلة الأنتخابات و من غدوة قادر إطلع إشاعة في الخصوم بألى هوما مدعمين من أمريكا و من أوروبا....أخير باب التعامل مع التجمع أو المصالحة معاه يعني قتل طموحات الشعب التونسي.

إشكون الي قادر إبدل الشعب التونسي ...الأنسان هاذا يلزمو إكون جن أرقط ..معناتها إنجم يقنع الشعب التونسي بحاجة عمرو ما راها و لا سمع بيها ...إنقلاب جديد لا! ديمقراطية لا! تجمع لا! دستور لا! ....لازمها جنون بالحق إتنجم تقسم ظهر التجمع قبل البدئ في إقناع الشعب التونسي ...كان يوصل واحد من المعارضين باش يخترق التجمع و يقسمو عل زوز و إلا على ثلاثة ...تونس تتخلص نهائيا من أي نضام دكتاتوري إلى الأبد ....التجمع الدستوري هو الحقل الوحيد في العالم الخصب لأنتاج الدكتاتوريات...الحزب هاذا عايش بفلوس الدولة و بفلوس الشعب التونسي و ما إنجمش ياقف بدون الفلوس متع المافيا السياسية و الأقتصادية ....المافيا هذه قادرة تقتل مليون تونسي باش إتعيش هي ؟

أشكون قادر أكسر التجمع ؟ كما إتكسر الحزب الشيوعي السوفياتي ؟ هذا هو موضوع البحث ....وقت الي واحد منكم إطلع الحل ساعتها نعطيها الدكتوراه متع الدولة و متع جمهورية قاسم.

قاسم قاسم