الحملة الأنتخابية الأولى من نوعها

شعارات الحملــــــــة
**
· لآ أحد غير قابل للتّعــــويض
· لا أحد يلزم الجمهوريـــــــــة
**
مرسوم : بأسم الوطن و الوطنية و الوفاء ، يعين المواطن قاسم قاسم مدير الحملة الأنتخابية ..على كل الوزراء و على كل المديرين العامين تسهيل مهمة السيد قاسم .

بناءا على هذا المرسوم ، إتصّلت بالممثلين الأتي ذكرهم حسب الترتيب في جمهورية قاسم .............:

· كورتــــــــي : مدير مساعد....لاهي بالحملة الأنتخابية على المدوّنات
· مركـــــــــير : لا هي بالتكسيات
· إمكــــــــرّز : لاهي باللّواجات
· نرفانـــــــــا : لاهي بالدّقزات و المشعوذين و حلاّن الكتب
**

ثماش واحد مازال ما أبعثش ببرقية أناشد فيها الصانع الكبير باش إرشح روحو لعام 2090. راهو هذا، أخر إعلان! و الي إتفوتو الفرصة هذه، راهو يتحمل مسؤوليتو من بعد ...يا ناس راهي ما هيش ناقصها كان صبع القابلة ، كيف كيف كي عام شبعة وثمانين كي عام الحريقة في معمل الفرينة. يا أولادي شوفو ما يصلح بيكم و راهو ما يصلح بيكم كان الصّلايحي هذا ..راهي هذه أخر كعبة من إنتاج تونسي بحت...بلا بيه راهي البلاد تحبس و ما عاد حتى بسكليت تتصنع و لا عاد حتى إبرة بابور تتركب ...راهو صانع و أول صانع و بعدو ما ثماش...إشري تربح ...هات أش عندك ...زيد الدّقيق ...زيد الماء ...العام عام زمة و المطر راهي شادة في بزقة منـــــــــو....شوفو كيفاش كل واحد منكم إناشد الصّانع المانع باش إيزيد بحذانا إشوية...هذا راهو وفاء منكم و إعتراف منكم بالجميل : شوفو الحبوسات كي ولات : جنان على وجه الأرض: شوفو محمد عبو كيفاش في الحبس و إعدي في الدكتوراه ، شوفو كيفاش المساجين إمشاشورين و كيفاش حطين الحطة كل يوم و البارفان يعمل الكيف...شوفو الشريكات كيفاش ولات كي الشّوبينيون إلكلّها رابحة ، يا سيدي ولينا إنصدرو في الذكاء للعالم الكــــــل، و ستر ربي ما جيناش إدبرو على الناس الأخرى باقي راهي بحرت عليهم كما إبحرنا براس صانع الشكشوكة.

و إستر العالي الفكر متع الحكومة جاء ما إفوتش الصّباط باقي راهي إطاليا و فرنسا خربت ليلهم ياسر ...و إستر العالي حاسبينا متخلفين و عندهم الحق في هذه..موش إتفدليك ...فيدال كستـــــرو تونسي يا خي و إلا شنوه ؟ يمشيش صانع المشماش يعمل ما عمل كسترو في كوبا ...و البقرات الكل كاتب عليهم إسمــــو ....أنا إسمعت إنـــــــــــا الي المجازر الكل كاتبين عليهم : مجزرة شبعة نوفمبر ( إيــــه يا بوقلب....) الشبعة شبعة و المجزرة إتبيع في لحم البغولة.

بربي يا الرّئيس المدير العام متع التحرير متع الوسط التونسية ما تنساش باش تبعث برقية على البريد السّريع أتناشد فيها صانع المخ المكلفز متاعك باش يترشح لعام تسعين بعد الألفين ...و كان تعمل مزية يا باربو الصّحافة الثقافية إتقول لرئيس شعبة جريدة العمل باش يعمل إخطيط لصانع التشويش السياسي و صانع الخربقة التونسية ...ماهو إمخربقها ليه ياسر خلى إكمل الطرّح بالحــــــاق و يخرج لابس كبوط إترافل...ما تنساش كذلك أتسلّملي عليه ياسر و إتقولو إزيد يبعث برسالة أخرى متع صواب إناشد فيها باش إيزيدوه في الأنتريت !!!!!موش مشكل ثمانين و إلا مائة ألف كشهرية ...ما تفرقش معاها البلاد ....أنسيت باش إنوصيك على القديد متع جريدة العمل تنشرو على الصّفحة الأولى متاعك باش ما يخمرش !!!!افم و حل الطاسة متع مخـــــــــــــــــك ...كي تكبر توه إتولي فالح !!!أما أمورك ما تعجبش في لدامك شديت في هاك المشد ...خصارتك لا جيت لا غادي لا هوني ....تحياتي !!!!! مع الحملة الأنتخابية هذه

ما تنساش إتقول لخالد شيخات متاعك إبسبس شوية حتى ببرقية و إلا زوز ...تى بالفاكس مقبولة ...هاذاك عندو بوسطة تستنى فيه في قصر قرطاج بعد لا باصا بوش ....و شعرة لا الرّاجل لا طاؤر راسو.... الدمقراطين دخلو البرلمان و شدوه من خناقو ...ألكلها إدبيار شيخات متاعك !!!!!على بوش و ديك إتشيني !!!!! لازم شيخات هاذا إنحطوه مستشار متع التخربيق في قصر قرطاج ...يا طويل العمر ....تعرف كيفاش يا شيخ : ديري لعقلك زيوانة : في بالك بيه هاك الرّاجل ما هو إطلع إوحد بيدو : حاب إدوخ الصبية ياخي دوخاتو ...إنت ما إتجي كان باش إتابع أخبار الفنانين الكبار من نوع فاطمة بوساحة ...ما ني قتلك راهو لساني داير برقبتي و ما نرشفها لحتى واحد من بن قردان لبنزرت !!!!...تعيش جمهورية قاسم


****

· أش قلت إنت يا سيدي : باش تبعث ببرقية لصانع التوخيـــــر إتقولو فيها بربي إيزيد معانا حتى عشرة سنين أخرى.
· يزي بلا تمنيـــــك يا قاسم ...إتحبني إنباصي ...شنوه الحكاية ؟
· ما لا عاطينك رخصة متع قلايبي لجمال عينك ؟ ما هو باش إتحافظ عليها لازمك إترشح صانع التوخير و صاحب النعمة الي عايش فيها
· عايش في حانوت، ناكل و نشرب و نرقد فيه و إنت إتقولي خير و نعمة؟
· ما لا كانت في قلبو كي محمد عبو ؟ اش تعمل يا سي الرّويجل؟

· إشكونو محمد عبو متاعك يا سي قاسم ؟ و أخطاني خلّني ناكل في الخبزة ما غير مشاكل ...حتى العلقم حسادتونا فيه ...شبيك إمعبيلي بطني بالفارغ ...إشبيكم إتقول عاملين علينا مزية تحكمو فينـــــا ....فكني يا قاسم ...فكني منك و من الحاكم و من الكوازي الكـــــل ....راني ما عاش نفهم حتى شيئ ، وليت نرقد خايف، إنفيق خايف ، نمشي خايف ...يا قاسم ...المرا ...المرا ما عاش في باش نقربها ...فشّلتوني حتى جنسيــــــا ...إسمع إبعدني و فكّني راني باش نتكلاطى عليك نهار من النهارات ...و ها البلدية كما إنجيبها و الأرض سوى سوى

· هاني حظرتها البرقية ...لازمك كان باش إتصحح عليها و إتحط الطابع
· و بالطابع زاده ....إتحب ....!!!!!!!!!!!
· ما لا لازمك إتخلص على البرقية تنبري ...ب خمسة وعشرين دينار للحملة الأنتخابية
· إسمع يا سي قاسم ...إتروح إتقود إنت و البلدية و التنبري و كان إلزم أنت و الجماعة الي إمعاك الكــــــــــــــــل و حتى من طارق إبن زياد و حتى من عمر الخيام و حتى من هاك إمكرّز ..و قولو ماعاش ياقف بالتاكسي متاعو قدام القلايبي ....و كان على الصانع .........أه إه إه إه أش إقولت...أش قلت يا قاسم ....صانع اللاشتغير و إلا التوخيـــــر ؟ إنت قلت التوخيـــــر؟

· فهمتهـــــــــــــا ....إشبيك ترعش ديما ...أنا موش قاسم ...صاحب قاسم
· إستنى ...باعثك قاسم ؟
· أه ....أدخــــــــــل ...القضية حاضرة ...خلي إنسكر الباب تــــــوه.

****

· التاكسي الي شريتها جديدة هذه سي المدير ...بقداش ؟
· موش كان التلكسي !!!!حتى الرّخصة ... شريتها ...توه عندي ولاو زوز تكسيات ! وحدة حاط عليها إمكرّز و هذه باش إنحط عليها كان حب ربي مركير ...ماك تعرف يا قاسم ولاد نضاف ...و إيحافظو على الكراهب ...لاباس ..لاباس ...لاباس
· إيه ...لازمك برقية لصانع التكسيات ؟ إه ما شنوه بلا بيه التكسيات ما إدورش ...و ما هيش صفر و ما هيش بالياسمين زادة!!!
· إشنوه باش نبعث ببرقية لفولزفاقن ...في ألمانيا ..؟
· صانع التكسيات لازمو برقية ...أبعثها حتى لفورد ...المهم في الفلوس !!!
· إنت تتكلّم ديمة بالآلغــــــاز ...التكسيات قاعدة كي عدات الفيزيتة و يا قاسم و الله رشوة إدفعت أكثر من ثلاثمية و خمسين دينار ...و شعبة التاكسيات إدفعتلها ...و نقابة التكسيات كيف كيف زيد دفعت رشوة على خاطر إمكرّز و على خاطر مركير ..الشوفارية الزوز في المعارضة و ماك تعرف ما إخدمهوم حد ...كان باش و باش ، دبرت الرّخصة من أمن الدولـــــة ...يا قاسم ماك عارف كان إتخدم واحد أخر راهو إصب بيك الصّبة من غدوة و يمشي و إقول عليك سلـــــــــــــــــفي جهادي و تمشي إلى يوم يبعثون..!!!
· شوف، هذه أمورك ، إنت عارف كيفاش إتسيرها ...توه ثمة حملة إنتخابية ؟
· في ألمانيا ؟
· أنعم في ألمانيا و لكن التمويل من جيبك... من التاكسيات الي عندك ...شكون صنع التاكسي إنت و إلا الألمان ....؟
· يا قاسم ...أرحمني ...ألطف بي من نهار الي عرفتك و أنا في المشاكل و حتى مركير و إمكرّز باش إنطردهوم ...يا راسي ...حرب عصابات في البلاد ..و لينا كما إيطاليا ...الناس الكل إتمشي في الرّشوة و زيد فيها سياسة ...فكني يا قاسم من صانع التكسيات و من صانع ...راس...........!!!!
· أنا البرقية إكتبتها ....و لازمها تنبري بخمسة مائة دينار.. باش نبعثها و أنت أعمل رايـــــــــــك .
· أش قلت يا قاسم ؟ صانع التكسيات ؟ يطلعشي ....الصانع متاعنا ؟
· هاك هــــــــــــــــــــو
· أدخل .......عندي ما نحكيلك ....قصة الفيلم الجديد يا قاسم.

***

و مشات معاك يا كورتي و الليلة فراقها صباح ....و طالعة بنت الكلب الليلة للعالي ، أيه برى نعملو طلة على الجــــــــــــــبانة
· السّلام عليكم يا سيدي ....أش حولك و أش حوال الي إتعس عليهم ؟
· لاباس يا سي قاسم ..ألكلهم راقدين و لا واحد فاق ؟ و لا واحد قال ...أح
· أيه خديمتك باهيه ...عساس على الجّبانة ؟
· لازمك تبعث ببرقية لصانع الجّبانة الكبير ؟
· أشنوه يا قاسم ! برقية للخالق إتحبني نبعث و إلا شنوه ...حتى الموت موش مانع منكم ...إنعس على القبور ...أن صانع جبابن و أنا برقية ...سبحانة الله
· هذا قبــــــــــــــر شكون ؟ أهو إبا التعذيب حتى على القبر متاعو !!!!
· إستغفر الله يا قاسم ...هذا سيد الرّجال ...زهير اليحياوي متع تونزين !!!! ما تعرفوش ...ما هو قتلوه بعد ما شد عام و نص في الحبس !!!!
· و هذا أشكون ؟ هاهو إنشوف فيه الكـــلو شوك ...مات جعان هاذا!!!!!
· إستغفر الله ..هاذك ما هو متع السّواك الحار متع جريدة الفجر ...كيف كيف مات في الحبس ...شوفتهم هاذوكم الكل جماعة السياسة و الحرية و الكرامة ...ماتو من أجل كلمة حـــــق..
· و حاطينك تعس عليهم ألواه ؟ علاش خايفين ؟
· خايفين لا أهاليهم يعملو إجتماع في الجبانة ....إخافو من الموتى أكثر من الحيين يا سي قاسم
· أش عملنا ....في القبور الفارغة هاذيك ؟
· هاذك على اليمين : قبر عمـــــر الخيام ، و الأخر قبرك أنت و الأخر قبري أنا....و لذلك لا برقية و لا جواب لصانع الجّبانة و برى يا سي قاسم أبعد لا نقبرك قبل وقتك ....لا لا لا لا لا لا لا لا لا ....إبعدني

***

· أشبيك ...أتعس على الجبل أنت ؟
· ما هو الجيش يترينا .....كل يوم و لازم أنعس تمشيش رصاصة طايشة تضرب واحد من جماعة المعارضة
· كيفــــــــــــــــــاش ؟ ثمة الرّصاص ، في الجبل هاذا!!!!!!
· على إسمو يا سي قاسم : جبل الرّصاص
· لازمك تبعث ببرقية لصانع الرّصاص الكبير ....باش تقعد عساس و ما إطيروكش......
· صانع الرّصاص ؟ شكون ...أنا عرفي من وزارة الدّفاع ....
· أنا دفاع ؟ الدفاع متع الجماعة المافية
· تعرفهم الجماعة الي يترينــــــــــــــــــــــــو ؟
· نعرفهوم ...كل يوم يتعدو من هوني ...جماعة متع حاكم ...لكن سيفيل؟ و أمتنكرين ...باش ما إيجيبوش الشّبهة ....
· زعمة شكونهم ؟
· موش عارف ....بالك من هم فيهم ...يا سي قاسم منهم فيهم ...خلي و إسكوت...و البرقية يا سي قاسم ...ماك تعرف أنا على التقاعد و ما عاد ينفع فيها شيئ ......باردة ...خبزة باردة....سيبني لا نعطيك رصاصة في الجبين!! أمسلّح خــــــــــوك ...أبعد!!!!!!أبعدني ....لا حملة إنتخابية و لا حملة تنظيف !!!!!!!!إشطرها طحانة و أتهز في القفة يا قسومة يا غالي..

***
بلاد ربافيكة ...البلاد إلكلّها لابسة الرّوبفيكة و أتحط في الحطايط بفظلات الغرب !!و الشيئ هاذا أثــــــر بشكل كبير حتى على التفكير متاع البلاد ...الأنسان ولى نفسو روبافيكة !!!الفكر نفسو الي تحملو الشبيبة أصبح روبافيكة ...يلتقطون فضلات الغرب حتى الفكرية منها !!!!أتشوفهوم على النات و على الأنترنات و تقرالهم ...تلقى روبافيكة إنتشرت و ناس تفرز و أتقلّب في فكر الرّوبافيكة الي ما يصلح كان لصناعة الشلالق متع الميكانيك ...فكرة كي الشّليقة ..فكرة فظلة ...ناس أتحب تقنعنـــــا بالتّفتح و بالحداثة متع الرّوبافيكة و بلغة روبافيكة !!!!!ناس أتظن أنها تتقدم و لكن في الواقع ينشرو في فكـــــــــــر فارغ ...لا حمامة و لا غراب !!!واحد أبعثلي قالي ...أشبيهم التوانسة ما عاش يتكلّمو بالفرنسوية !!!!قتلو حتى يقرو بالعربي باش يقرالكم أنتم ...بالدّارجة و شوف و إشوف

حملة أنتخابية باش أتحبوني باش إنمولّها ؟ بالرّوبافيكة و علاش لا ؟ كل قدير و قدرو!!!!!و هات أش عندك يا فنــــــــــــــــــــــان !!!!

· شوف يا ولد ...!!!!!!قداش دخلّت من شكارة العام هاذا ؟
· ما هو لاباس ...يا سي قاسم ...أش جابك و جابني ؟
· شيئ ...لازم برقية لصانع الرّوبفيكة ؟
· هذه جاية من أمريكــــا يا سي قاسم ...و لا برقية و لا زوز!!!! و سيب عليك من اللّوغة هذه !!!! شنوه أتحبني نشريها مرّتين ...يا قاسم فديت من اللّوغة هذه ...فديت من التهديد ...ماعاش خادم ...بالحرام نحرقو الحانوت ..أشبيك حاط إيدك في جيبي !!!!سيبني ...ما عاش إدورو بيّة ...أنحب إنهج من ها البلاد
· هذه أخر حملة إنتخابية يا سي الرّوبافيكة ....ماك إنت روبافيكة و رضيت باش إتكون روبافيكة ...لازمك أتمول الحملــــــة الأنتخابية !!!!
· كيفاش يا قاسم إتحبني ...إنمول حملة بـــــــــــــــوش ...ناقص بوش فلوس ، علاش ما ياخوش من ديك أتشينــــــــــي ...عندو البترول الكل...حتى من أمريكا أنمول فيها أنـــــــــــــــــــــــــــا ...من رزق أولادي
· الصّبر يا سيــــــــــــــــد!!!!!أنا البرقية إكتبتها و أنت إعمل الي يظهرلك !!لازمها تنبري ...بمائة دينار موش برشة .
· يا خي ...شوف يا قاسم ...ما عنديش أنـــــــــا و موش دافع !!!
· شوف ...أعمل راي ....أما حانوتك راهو يتحرق الليلة قبل غدوه...من بعد ما إتجينيش ...و إتقولي حرقولي حانوتي ...حط في بالك الي صانع الرّوبافيكة ...إشوف في كل شيئّّّ!!!!!
· أنا صانع ...الرّوبافيكة يا قاسم تحكي عليه أنت !!!!إشنوه يطلعشي !!!!!
· الي هو هو ...ثمة و إلا ما ثماش ! ما عنديش وقت ...لازمني نمشي !!!
· أعمل دورة و إيجـــــــــــى يا قاسم ...تلقى التنبري حاضر.

***
بلاد موحشة، مقفرة !شوارع إمسخة، قطاطس سود !!!كلاب إتعسس في قلب العاصمة...الجربوع أتقول بهيم!!!يا ربي ها الحصلة في الرّحلة متع الحملة! يا كورتي :

· أش ثـــــم جديد؟ شنوه الجوّ !
· ما فهمت شيئ يا عرفي ...إنت مع إشكون! معاهم و إلا معانا!
· شنوه الي إتحب تفهمو !!!!
· يا خي قداش ثمه من مرّشح في الأنتخابات هذه
· علمي علمك ...عندي كونترا ....لازم إنكملـــــو ...لا أكثر و لا أقل يا سيدي
· يا عرفي ...هيا نمشو نشربو قهيوية ...عندك فاكس لا زم نحكو فيه
· ما هو لاباس !!!
· من اللّجنـــــــــة المركزية يا سي قاسم ...باش إتباصي يا عرفي ، فاكس شديد اللّهجة و قالولوك في إيدك ساعة من الزمان لازم أتكون في القصبة
· أش عملو الجماعة ...أطلبهم الكل ...إجتماع ...حالا ...متع التكسيات و متع اللّوجات و متع المشعوذين ...أنحب منهم إيجـــيو حالا ...أنده ...
· حاظر عرفي !!!!!