حوار مع تجــــوعي ....

ديانا
قال الله تعالى في الآية 6 من سورة الحجرات: بسم الله الرحمان الرحيم "يا أيها الذين آمنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين " - صدق الله العظيم

قاسم

باهي ، القراءن ما عاش تجبدو جملة !!!! هوني نخدم في السياسية ! موش في جامع ! وليت شيخ فيسع فيسع !!!! و كانك من الخوانجية عندي طريقة اخرى للنقاش ! أي الثنيّة هذه تبعد عليها و لا أيات و لا حديث و لا حدّث ....

ديانا

أوّلا انحب انخاطب الأخ حاكم نورمالاند و انقولو اللّي أنا ما كنتش انهاجم فيه و لكن وقت اللي علّقت على التدوينة متاعو المتعلّقة بخطأ في رقن تونس باللغة الفرنسية من طرف أحد المدوّنين، إنّما أنا انقدت كيفيّة تصويرو للخطأ و تهويلو للأمور.

قاسم

هذيك ما هيش غلطة رقن ! أبدا ! هذيك إسّموها ، عدم معرفة و كعور و اعطي لآعور ! لأنو متخرّج من جامعة ما هيش قادرة إلا أنها إطـــــلّع الآميين ! و ما أدراك من أكادمية الجوع و المجاعة و التجّوع
القوفرنارمرحبا بيك سي ديانا ماغازينأولا ما عندي حتى مشكل مع الحزب الدستوري الديمقراطي الي هو حزب تاريخي في تونس و تاريخو في تحرير البلاد حد ما يشكك فيه ... و أنا كنت من أول المرحبين بناشطي الحزب في هالفضاء و يضهرلي تعليقاتي عمرها ما حملت كراهية لحتى حد.

قاسم :

الحكاية يا سي القوفرنير عمرها ما كانت كراهية و إلآ حب ، بل بحث على الحقيقة !! حزب التجّوع ما هوش قادر باش إشارك بحتى شيئ !!!! لا في البحث على الحقيقة !!! و لا إنــــو إخلي الناس تبحث عليها ...المشكل مع الحزب هذه إنو ماشي في بالو بالي بلا بيه المطر ما هيش باش إتصّب ، و أهلو ما شي في بالهم بالي هوما عندهم الحقيقة الثابتة !!! و بالي التوانسة لازمهم يسمعو و يسكتو ...و هونا أحنا إنفكرولكم ...و أدبرولكم من حاجة شويه ....الحزب هذا ، حزب شمولي ..ضد الحرّية !!! و ضد أنو الفضاء السياسي يتحّل و يكبار ، بل ما إنجم يخدم كان تحت الطاولة و بجماعة ديما إتقول نعم...حاضر سيدي ...مشكلة الحزب هذا ...أنو لا يــــــــصلح و لا يصلح ..كما قال الدكتور منصف المرزوقي....حزب مجعول باش إفسّد الحياة السياسية و الثقافية و الآجتماعية ّ!ّّ بتشليكها و بث الفوضى في صفوف المجموعة الوطنية الصادقة.

القوفرنار :

تقلي غلطة مطبعية ...سامحني ...تغلط أنت كيف تكتب اسمك ؟؟؟ من المستحيلات ...و أسأل أي واحد يفهم في البسيكولوجيا ...تي أنت كيف انسان يناديك بأسمك بالغالط تتنبز ...خلي ولد بلادك يكتب أسم وطنك بالغالط.

قاسم :

الناس ألي عندها ...كل شيئ كيف كيف ..و برى بالشلاكة حتى إيجيك الصّباط !!هاذوم سبب خراب البلاد ...نوفل ما هوش مختصّ في حتى شيئ ..حتى في إنو أكون دستوري ..و أمثل حزب الغورة و الجوع !

القوفرنار :

ممكن بالنسبة ليك أمر عادي ... أنا يا أخي كيف انحل موسوعة حتى من نيكارغوا و نلقى أسم بلادي مكتوب بالغالط نتغشش و نتنبز

قاسم :

دينا ، بالنسبة ليها ...الدّقائق لا تعني شيئ !!! و هذا أمر خطير !!! و إشوف في الغلط و ما إحل فمّو ...علاش؟ عامل إنصر أخاك ضالما أو مضلوما !!! المصداقية يا سي دينا ...أنك تدين نوفل ...و إتقول ...ماهو ثبّت روحك ! كي تكتب إسم بلادك ...موش تلقى في الأعذار ..كي المرا الهجالة ألي تلقى في الحلول لبنتها ....أستوي روحك و قول الحق.
القوفرنارثانيا .. أش مدخل البلاد مع هالمدونة ؟؟؟؟ ياخي هالسيد يمثل بلادي خير مني ؟؟؟ و الا يدافع عليها خير مني ؟؟؟ مجرد مدون كيفي كيفوا ..و حسب رأي الشخصي ما عندوش المؤهلات باش يمثل بلادي ألي نخزرلها أنا بعين كبيرة

قاسم :

إشكونو نوفل ؟ باش إمثّل تونس أحسن من القوفرنار ؟ إشكونك إنت باش إتمثل تونس أحسن من قاسم و إلا من على و إلا من صالح...دمّكم أصفى من الدماء متاعنا و إلا إتحملـــــــــــو في أرواحكم مسؤولية و لا تونسي حمّلهالكم !!! باش تبدى تتزايد بالوطنية يا سي دينا على قاسم و إلا على القوفرنار ...أنقولك لا يا راجل ...و شد بلاصتك و أستكفى بنفسك ...لستم وصّيـــــا علينا ...لا لا لا لا ! و تونس ما هيش ورثة السّيد الوالد !!!!! فاهم.
القوفرنارو اخيرا نقلك ,خويا العزيز, برى أقرى تدويناتي من أولها تو تفهم الي عمري ما تخبيت باش نعبر عن رأي و نقول كلمتي و ماحاجتيش بمدونة رديئة كيما هذيكا بش نتخبى وراها و نقول الي نحب نقولواتحياتي

قاسم :

باش إكون في علمك يــــــا سي ديانا ...راهم المدّونين ...إحبو أخرّجوك من العزلة السياسية متاعك !!! أنت و نوفل و الحزب متعكم زاده !!!! لكن تخرجيكم من العزلة الي إتعيشوها ...لازم تدفعو الثمّن متاعها ...بالطبيعة ...توه إيجيك الحديث !!! أنا ما ندخل في نقاش طويل المدى ...إلا عندي برنامج ...صحيح و خطوات تكتيكية ذكية !!! و الهدف من إني نحكي ...هوني ..هو تشجيعك على التحّرك داخل الحزب متاعك باش إتساعو على الآمتداد على طاولة الآحتضار ...أنا من المنظرين ألي تقسيم الحزب الخارب هذا !!! و الي تحجيمو باش ياخو الشكل الحقيقي متاعو....هات أش عندك!! و اي تيار إبرهن عن وجودو داخل الحزب هذا ...راهو باش يلقى التشجيع من جمهورية قاسم ..ألي حدود القسمة ....باش إكون التصّدع داخل الحزب هذاك بـــــــــــدى ...و الشق اليوم مشى في العمق ..و أكبر دليل على ذلك وجود إذاعة 6 ...الناس هاذوكم ما يعترفوش بإنقلاب شبعة نوفمبر ...و لا ببن على و لا بالطرابلسية ...إذا ...الماء وصل للرّقبة....هات يديك ! كان إتحب إتعيش ....

ديانا :

إنت، قتلي إذن اللي إنت ما تحمل كراهية لحتّى حد....بارك الله فيك. و لكن اتنجمش تفهّمني آش ماعناها إمّالا تكب في سعد الرّاجل و مشهّر بيه و تتّهمو بأنّو مشلّك البلاد؟؟؟؟؟ منين جاء الاحترام اللي إنت تحكي عليه؟؟؟؟؟

قاسم :

سيادتك و سيادتو متعصّبين لحزب بإسم تونس الكل !!! لا بابا !!! بالعكس القوفرنار فيق الراجل بغلطة فادحة ...هو الشخص هذا ..ضار البلاد و الحزب متاعكم أكثر مت ألي نافعـــــــو ..ماهو على الأقل هبطو واحد بروفسيونال ...للصتاد ...يا حسرة ! ما عاد إتبّع الحزب هذاك كان واحد إستوت عنده الآنوار و الـــــــــــــضلم.

ديانا

أنا ما جبت حتى شيء من عندي...المدوّنة متاعك موجودة...و التعليقات موجودة...و الإخوة ينجمو يرجعو ليها و يفصلو بين الجميع و أرجو أن لا تعتبرو ما أكتبه تهجّما نحو شخصكم المصون، سيدي القوفرنور، و لكنه مجرّد لفت نظر!

قاسم :

هنا ما ثماش لا تهجّم و لا هم يحزنون ..هنا ثّمة بحث على الحقيقة ، ألي إنت مازال ما كش مستعد باش إتعاون ..بل قاعد إتغطي في العين الشمس بغربال...كما محاولتك في الدّفاع على نوفل ...كان أجدر إنك تطلب منو ..إصلّح و إلا أعاود التدوينة جملة و إنضم روحـــو ...و يستوى ..موش إتصّفقلو.

ديانا:صحيح إنو من غير المقبول إنو شخص يخطأ في أمور بديهية مثل كتابة بلدو و لكن الله أعلم بظروف التدوين. بكلّنا يصير علينا إنو نخطئو و نغلطو لأنو بجميعنا اندوّنو و نكونوا تحت ضغط الوقت أو غيرو. شكون فينا ما غلطتش نهار في كلمة؟؟؟ تي أنا ديما غالط و انحاول انصلّح المقال أكثر من مرّة قبل ما ننشرو و في أكثر من حالة لا بدّ باش ننسى حاجة.

قاسم :

حتى شيئ ما عاد باش يتعدى ...لا تغلط لا في الكتابة متع بلادك ..و لا مع المواطن !! و خاصة غلــــــــطاتكم التاريخية و الميدانية عبر ممارسة السلطة ولات لا تطاق و أصبحتم عبئا على الشعب التونسي ...و حجر عثر أمام الآنعتاق متاعو

دياناتونس مش صدق الله العظيم باش وقت اللي نكتبوها بالغالط معناها أحنا مشلّكين و شلكّنا البلاد و قزّمناها و قللّنا احترامنا تجاهها.

قاسم

إنتم ضحكتو علينا الشعوب ...و رجّعتونا مهزلة أمام العالم ..إنعم و إنجيبلك خمسين مثال و مثال ...و أقلّهم ..إنكم ما نجمتو إتحلو حتى مشكل قائم الذات ...!!! و الدليل على ذلك ...إضرابات الجوع في البلاد ..أول بلاد تونس ولات في إضرابات الجوع ! أول بلاد في الترافيك متع البابورات ...في بالك جماعتك قاعدين تسرقو و إتقيدو على إسم تونس .....فسّدتونـــــــــــــا سمعتنا في العالم.

ديانابكلّكم تعرفو اللي أنا من أكثر المعارضين لثقافة التخوين و العمالة و كذلك احتكار الوطنية. على خاطر كان باش تحكي على تشليك البلاد، إمّالا بربي قللّي آش يعملو جماعة كيما مدام سهام بن سدرين و الأستاذة راضية نصراوي و سي توفيق بن بريك و سي الشابي و المرزوقي و القائمة طويلة عريضة وقت اللي يتوجّهو إلى باريس و إلا جنيف و يلقاو سيّارات المرسيديس تستنى فيهم في باريس شارل دي غول و إلا في جنيف كوانتران؟؟؟

قاسم:

سهام بن سدرين ( الكبرا ) هذيك ....في بالك بالي دارها طيّحوها ..؟ إشكون ماهم المليشيات متع التجّوع ...بالتراكسة !!! ثمة دولة مسؤولة و حزب !!! يأمر بإسقاط دار على راس إمليها ...إذا موش كان الحقد مالي القلوب...!!! موش مدام سهام بن سدرين ألي كسرّتولها وجها خمسين مرّة ...لأنها حاولت تبحث على حقيقة نضام خارب من أصلو .....راضية النصّراوي الي فشختوها مليون مرّة !!! موش هي المحامية الوحيدة الي نجمت ..إتقول للعالم بالي نضام الشابع من نوفمبر ..قاعد يستفعل في الرّجال و قاعد إعـــــذّب في المساجين ...و قاعد يحكم عليهم كما جاء ...ماهي راضية النصّراوي الي وقفت مع المعدومين في سجونكم ...أي إشبيه سي توفيق بن بريك ؟ لأنو قال الحقيقة و مارس المواطنة متاعو رغم أنف بن علي و نضام الشباع من نوفمبر!!! المرزوقي الي طرّدتوه من الجامعة ...!!! لأنو دافع على الانسان التونسي !!! لأنو فضح نضام الشابع من نوفمبر و مومرساتو ...لأنو كان الصّوت الوحيد ألي إستطاع باش إخرّج حقيقة الديكتاور للعالم ...المعارضة التونسية ماهيش معزولة على العالم و باش تتعامل مع كل المؤسسات العالمية لفضح الجرائم الي إرتكبها حزبكم في حق الشعب التونسي ...إنعم كل المؤسسات الآهلية و المجتمعات المدنية !!! بالنسبة للمرسديس ...أنا ما شفتش و يستحيل إنها كانت في إنتضار ...زهير اليحياوي في جنيف ..و إلا سيدة تونس الآولى السيدة نزيهة بن رجيبة ...أبدا ...إشرّفني المرزقي ! و إشرّفني زهير و إتشرّفني راضية و سهام ...و كثير منهم الاسماء ...بأني تونسي !!!
و ما إشرّفنيش نضام أغور على التوانسة بالسّلاح و النار ..فاهم !!! و إلا إنزيدك.

ديانا :

تنجمش تفهّمني منين جاتهم الفلوس باش يقعدو في فنادق 5 نجوم و يركبو أفخر السيارات و يعملو الطيّارة كيما الكار بين تونس و أوروبا؟؟؟؟ وقت اللي الوزراء متاعنا كي يمشيو ياخذو منحة يدوب تغطيلهم مصاريف الأوتيل و بوهم باي كان لقاو مرسديس تستنى فيهم.

قاسم :

كان جات المعارضة عندها فلوس !!! راهي نجمت إنضم روحها و إتجيب البديل !! و لكن لا عندهم فلوس و لا عندهم باش إقاومو نضام أغتصب أموال الشعب التونسي باش إمول بيه ...فيلسوف قرطاج لن تسقط : بخمسين تذكرة سنويا تونس- باريس ! و خمسة عشر ألف دولار شهريا ...شوف طيارة الرّئيس وين مشات ...؟ و تبّع الحكاية !!! تلقى الطيارة عملتها مرتو إتقول تــــاكسي غوار !!! من بلاد لبلاد ..تعمل في الشوبيكن متاعها ...و السّفارة أتخلّص ...على ضهر إشكون ..على ضهر الشعب التونسي ...و من أجيوب الفقراء و المساكين ....و بالنسبة للوزراء !!! وينهم الوزراء الي تحكي عليهم ...تصاور لا إحلو و لا يربطو مع حكومة الطرابلسية ..

ديانا

شكون اللي يشلّك ببلادو و شعبو و يشهّر بيهم في المحافل الدولية و يبعث بالفاكسوات للبرلمان الأوروبي و للصحف و القنوات الأجنبية و يروّج لأخبار كاذبة سرعانما منظمات حقوقية كيما منظمة العفو الدولية و هيومن رايتس ووتش ماقدّمت اعتذاراتها للحكومة التونسية نتيجة أخبار كاذبة تلقّاوها و من بعد التحقيق اتضّح أنها غير صحيحة تماما؟؟؟؟

قاسم

جيب ربور واحد موش صحيح !!!! و أنا إنجيبلك ...شهادات عينّة من محاولات الآغتصاب و القتل و التعذيب ..داخل تونس...إشبيه هرب الملحق متع السفارة في باريس و قت الي المــــــــــرا قدّمت بيه قضية ...موش هو الي دّمر عائلة كاملة !! و قدّاش من عائلات دمرتها بتهم باطلة ....و هزّان و نفضان !!! ضّحكتو علينا العالم.

ديانا:
اشكون اللي يشلّك في البلاد و يصوّر في تونس على إنها سجن كبير و لا يمكن لمواطينها الخروج من أرضها في حين إنو هو نفسو حرّ طليق يدخل و يخرج على البلاد كيما يحب و يشتهي؟؟؟؟؟؟؟؟؟؟؟؟

قاسم

إنعم تونس سجن كبير !!! ياسر !!! و أنا ألي يومنا هذا إنقول بالي ثمّة صور كامل داير بيها ...و الوديل متع الصّور ..هو حائط الكلب و الحمار !!! أشبيه محمد عبو ما نجّمش إسافر ...إشبيهم اللاّجئين ما إنجموش أرّوحو ...إشبيه الشعب التونسي ( الشباب) يحلم بأنو يحرق و اموت في البحر ..كان البلاد هذيك ما ولاتشي حبس كبير ...الحريّة يا ولد ما هيش في أنك تدخل و تخرج من مطار ....لا ابدا ...!!! الحرّية أنك إتعيشها في الفكر متاعك ...في إنك ما إتحسش بروحك مراقب ..الحرّية إنك إتولي تحلم بحاجة أحسن و حاجة خير ...الحرّية هي أنك تقتل الآحباط الي ظرب البلاد ...!!! إذا إنت ما كش حر! ما إتنجمش تفهم الحرّية ...

ديانا
اشكون اللي يشلّك في البلاد؟ اللي انهار الكل و هو يقزّم في بلادو و إنجازاتها؟؟؟؟

قاسم

بالك جبت حاجة من دار السيّد الوالد ، إنت و إلا بن علي و إلا الطرابلسية ّّّ..الي وصلتلو تونس بأيدي أولادها ...بشعبهــــــــــا ...بمهنديسيها ..كان خايب و إلا باهي !!! الآنجازات ..راهي ملك الشعب التونسي ..و ماجاش بيها الحزب أبدا و إلا بن علي !! حدّأد و قصعتو منقوبة ...لا إنت و لا بن علي عاملين مزية على الشعب التونسي ! ابدا ....الشعب هو الي عمل كل شيئ ...و إنتوما قاعدين إتفسّدو ..كان موش منكم رانا على الاقل كي اليونان و إلا البرتغال ...بالقليلة القيلة ...رانا خلطنــــــــــــا على العالم المتحضّر و قدّمــــــــــــــنا حاجة للأنسانية ....إنت و بن علي و الحزب ...إنتوما السّبب أفي تخلّفنــــــــــــــــا و إخفاقتنا و هزيمتنا.

ديانا
و لنّا انجي لسي قاسم. يا ولدي مرحبا بيك و بهالعودة الميمونة في العلاقات بيني و بينك.

قاسم

أنا رجعتلك ، باش إنخرّجك من العزلة متاعك ...إنت عايش في غار ...إنا هاهو باش إنمدلك يدي باش إنخرّجك للهواء ...للعالم الكبير ..باش إتحل عينيك و تتلتحق بالكوبة ! و باش إتشارك التوانسة في البحث عن الحقيقة ...ما حتما عليك ظلام غار بن علي و الــــتّجوع.....

ديانا
بربّي قللّي، ياخي الكلام اللي إنت كتبتو الفوق صحيح و إلا أنا نحلم؟؟؟؟؟؟؟

قاسم

لا هذاك موش حلم !!! إنت مفجوع !!! من مواجهة الحقيقة ...و لذلك عاز عليك الضلام و الغار ...لأنك تشعر بطمأنينة كاذبة فيه ...جهرك الضّوء ..ما فهمت ما تكتب !!! البرى! ..مازل باش نعطيك ببروجكتــــــــــــار ..3000 وات ...!!

ديانا
ميليشيات و سلاح و قنابل و تفرقيع....يا ولدي شبيك؟؟؟؟؟ ياخي بايت تتفرّج في فيلم على أم.بي.سي أكشن ؟؟؟؟ تقولش أعليك تحكيلي على حزب الله و إلا على حماس. كانك تحكي أعليهم...أنا موافقك 100 في المائة هههههههه ماك تعرف، عدوّ عدوّي...صديقي هههههههه.

قاسم :

الحزب متاعكم، مسلّح إنعم !!! و الدّولة الي كان لزمها باش تحمي المواطن التونسي ! ولات تحمي في حزب ....البوليس التونسي إمثل حماية لنضام شمولي حزبي متطّرف ، و لا تعني له الدّولة حاجة ...الحزب هو الدّولة و الدّولة هو الحزب !!! هنا وليتو كما حزب الله مضاعف ثنين. غادي على الاقل ...ثمه نوع من الديمقراطية ...لكثرة الآحزاب و كثرة الطوائف ...أما إنتم ..حزب واحد مسلّح ..ملّغم ...و بارك على البلاد !!! و إفك من الناس في إرزاقها ...و إطرّد إشكون أحب من الجامعة ...و إسكّر كما أحب ! و احل كما أحب ...بالضبط كما أي حزب شيوعي متع بكري في أروبا الشرقية !!!

ديانا

أما كانك تحكي على تونس و فعلا على التجمّع، فسامحني فيك. ظاهرلي إنت عندك ماس في خيوط الضوء ضربو في بعضهم و عمللوك حالة من الهيجان و الانفعال اللي ينجم راهو يؤدي إلى جلطة دماغية أو سكتة قلبية لا قدّر الله

قاسم

نحكي على التجّوع ...تجمّع التوانسة الجواعة ..ألفاشلين ..الي ما إنجمو يوصلو لحتى شيئ بمقدورتهم الذهنية ..إلا عبر التّزوير و الغورة و الدّسيسة و السّلآح في إيدهم ! و قال إشنوه ...تجمع ديمقراطي دستوري ...!!! مافيا سياسية و أقتاصدية لا بد من التخلّص منها ...إما أجلا و أما عاجـــــــــــــــلا....التجّوع يا سي المدير ! هو الحقل الخصب ...لصناعة و إنتاج الدكتاتورية ...و لذلك لابد من ظربه في العمق.

دياناأنا مانيش متحدث رسمي باسم التجمع و لكن ثمة حقائق لا بدّ من إيضاحها لأنها تغالط الرأي العام.

قاسم

التجمّع لاهو وريث للحركة الوطنية ...و لا وريث لبرقيبة ...التجّمع حزب لقيط ..لا شرعية عندو ...لا تاريخية و لا حتى يومية ...التجّوع جاء و تخلق عبر إنقلاب الشابع من نوفمبر ...باش إكسّرالمصامر الدامرة متع حزب بورقيبة ...إذا ثمّة قطيعة كبيرة !! صارت في تونس ...

البقية الباقية ما عندي عليها حتى تعليق ....لأني بكل صدق ..النوامر متع الحكومة التونسية ما فيها حتـــــــى نيمرو صحيح ... و ثمة حتى دراسة علمية ما إتزّورتش من واحد من جماعة التجّوع ....لذلك قص عليّ ها الحكاية ...حتى إتولي عندنا دولة مسؤولة و صادقة و قائمة على مختصّيبن و خبراء ...ماهوش قادر لا بن علي و لا عمّار بن زور باش يشريهم ...و إزّورولو الحسابات.