الغـــــّفاس شيخ تونسنيوز

شيّوه ! نهارين ما لقيت ما نقرى ! درت المدّونات الكل ! شيئ ! الجرائد كيف كيف ! تونسنيوز عندي عام ما عاش نقرى فيها من نهار ألي بدى ينشر لبرهان و للصّباح ! زعفتــــــــو ...و حتى المخابرات متع بن على مرحبا بيهم عند الشيخ ...هذا إسمّوه ثقافة الأنفتاح متع الشيخ ...لازمني نجبدلو وذنيه بالباهي بالباهي باش يعمل للناس ألي تكتب و إمعيشاتو قدر...الشيخ هذا عايش بشكون ؟ عايش بالناس ألي تكتب ! و ألي تندب و لكن الرّاجل شاد الصّحيح في الخور متاعو و الخط المجنون ألي إتبع فيه ! ماشي في بالو الناس ما تفهمشي ...كي إنت حال الجريدة لبن علي ...خلي واحد من الصّحاح ينشر في جريدة من جرائد بن علي ...ما إخلّوهش ...يعدموه ...النص حتى قبل ما يوصل .... جريدة تونسنيوز هذي شادة في خط المصالحة ...و باش إطيح عمّا قريب لخط الوسط التونسية ...و إتزيد حرف شبعة مع تونسنيوز ..إتولي شبعنيـــــوز.

يا شيخ !!! الجريدة هاكي ، عندي فيها باي كامل ...وقت الي كنت تمرد ...أنا ألي علّمتك المسيـــــــــر و أعطيتك فرصة باش تاقف ...اليوم وقت ألي وقفت وليت تمشي اعوج و إتبع في الحيوط ...بديت تتجربع ، وقت الي حلّيت الباب للي يسوى و للي ما يسواش...كان لزم باش إنحيلك الدّم مرّة أخرى و الله ما إرّوف عليك ...و إنعاودلك كان ألزم عشرين مرّة....زيد إتفيسخ على النـــــــــــاس و إجبد بالدّم البادر ! قال إشنوه نساهم ...في إعلام افضل ...عن بو الأعلام ألي تعرفو إنت ...و ألي معاك....و أظربلي على الطيارة.

ما هي مصيبة ...كانت الناس الكل تكتب ...وينهم !!! و علاش ما عاش يكتبو ! زعمة ما عاش عندهوم ما إقولو ....لا ابدا يا شيخ ...إما الناس كرهاتك ...فدّت من الضروح متاعك و من نقّل لّصق ...وينها الأقلام الصحيحة ...كرّهتها في أرواحها ...بخطّك المعوّج و تدبيرك الفالصو ....يا شيخ فالصو ما تصلحش بحتى صوردي....وقت ألي ما تعرفش ...قول ما نعرفش و أنتهى و سكّر ها المزدوج علينا ...توه نلقو ناس أخرى قادرة إتقوم بالمهمّة الأعلامية الصّحية ...إنت ماعاش تصلح بالمعارضة التونسية جملة ....إنت تصلح ...ملاّخ في سوق النحاس ...و كان عندك بحر سيّب عشرة.


وين سمعتو بجريدة معارضة ...تنشر للنضام ؟ الجريدة المعارضة مهمتها إتكون القاعدة متع الفكر المعارض ...مهمتّها باش يا شيخ باش إتوسع النشاط متاعها و توصل باش إتبرمج حاجات أخرى ...كأفلام وثائقية ...إذاعة علاش لا ؟ تلفزة موش مستحيلة.....أما شيخ كيفك إنت ما قادر كان إزيد أصب الماء في الرّكايب ...عن جد بو الصّحافة الي تعرفـــــــــــــــــها و ألي قريتها كانت قريت حرف في حياتك.

قاسم قاسم