تلفزة العجب

1- إنحب إنقول لسي ماني الأفريكان ، يعطك الصّحة مرّة أخرى في ها النقشة السمحة ألي كتبتها في ما إخص العدمية. و إنحب إنقول زاده بالي أنا أرّشح النص هذا ! كأحسن نص تكتب منذ أكثر من شهر ؟ النصّ هذا جبد على المصيبة متاعنا بالضبط و هي فلسفة ظرب القيم الأنسانية في عمق الشعب التونسي !

2- حاب نسأل المدونين ، قبل ما نتعدى نحكي على الذّوق ، إش بيه النص متع ماني الأفريكان ما جابش إصوات برشة كما نصوص أخرى أقل منو جمالية دقة و بلاغة ، هذا إذا كان ما حسبناش البورتــــــــي متاعو !!!! أنا بصراحة متعجّب في حالة البلوقاسفير ....زعمة أنا غالط و إلا ما نعرفش ؟ لو تعملو مزية وضّحولي الحكاية ؟

3- بالطبع صندوق العجب هذا ، ألي هو التلفزة متع شبعة نوفمبر ، مجعول باش يخدم البرابكندا أولا و ثانيا تحطيم الشعب التونسي ، بالحقرة ، بالتفسيخ عليه ، و بث برامج باش إتشّل الحركة الفكرية متاعو ...وراء ها المسلسل هذا ثمه مخرج فارغ ، أفرغ من صباتي و ثمة مدير عام متع تلفزة متصّهين ! يكره كل ما هو تونسي ، كل ما هو حقيقة ! بالطبع بالتعاون مع جماعة عندهم برنامج واضح لتونس و هو تفقيرها : أدبيا ، ثقافيا ، و حضاريا جملة و تفصيلا ...الشيئ هذا مدروس و مخدوم في مخابر الصّهويونية العالمية! حتى أنها إتشكك الشعب التونسي في القدورات متاعو ...إذا نلقو ألي الخردة هذه ، التلفزة إمسيطرين عليها ، أشباه مخرجين و أشباه كتاب ...ناس مجعولة باش تعدم الذوق عند التونسي ...و الّــذّوق هذا ، تعدم ديجى و لازمنا خدمة كبيرة باش نرجعــــــــو ألي ما كنا زمان !!!! التلفزة هذه إمسيطرين عليها العصابات متع الفلوس ...و منهم الطرابلسية . ثمه نص مخرج إنسيبهم ، و حاكم بأحكامو في المؤسسة هذه حتى إنو البرامج متاعو تتعدى في وقت الفطور . الناس هذه هوما عماد الديكتاتورية ...هاذوم ألي إمصو في دم الشعب التونسي ...كان ما زال واحد ما إركبلوش الدّم الفاسد من جرد التلفزة هذه راهو عايش في الخارج و ما إشوفش في برامج تلفزة الطرابلسية و التّجوع

4- الأشهار : مصيبة ، إنصاف مخرجين ، إدردر و يعطي لأعور ! و إقول أخرجت إشهار ! شيئ إدير العار ...لا فكرة و لا قيمة و لا حتى جمال ! وقت ألي ما تعرفوش تخرجو إشهار ؟ علاش شدين روسنا بالسّيف ...لأنو ما عندكومشي كفاءة ...و لكن حطيكم الطرابلسية و ولاد بن علي باش تتفيسخو على الشعب التونسي ...إبدا لن تمرو ......يا أقبح ما خلقت تونس ..مازال عندكم ربع ساعة أخير ...الديكتاتورية إتعيش لأخر ربع ساعة ...و من بعد توه إنشوفو إشكون يضحك على الأخر.

5- مدير الأذاعة و التلفزة هذا ، لازمو يـــطّرد لا أكثر و لا أقل ، مدير البرمجة كيف كيف ...إنسان ما يعرفش و ماهوش إختصاصو التلفزة ...و أكثر من ذلك ...لازمو إرّجعلنــــــــا فلوسنا ، علاش التوانسة الكل تدفع في 5 آلاف باش إتشوف التقوعير و التجوعيب متع ناس لا علاقة لها لا بالفن و لا بأهلو !!!هاذوم ذبـــــــــــــــان متسّلط على تونس ...لازمو الفليتوكس...هوكش ما يفهموش كان بالحجر.

قاسم قاسم