رسالة قاسم إلي مجلس المستشارين

من رئيس الجمهورية القاسمية ألي السادة النواب

لا سلام لا كلام

أما بعد

كيفاش عملنا توه با جماعة، معناتها بالعربي ما فيكم حتى واحد راجل، يسترجل و إقول أنا إنحب أنولي رئيس! بالضبط هذا الي إفهمتو بمناشدتكم لفرعون تونس باش يلبس السروال الخامس. بربي قولولي علاش داخلين السياسة ، لسبب وحيد باش إتهزو القفة لا أكثر و لا أقل. المجلس متاعم إنشوفو أقل من جماعة تحت الصّور...على الأقل الجماعة هاذوكم ينتجو في الفن و كتبو عدة قصص متع علي الدّعاجي و أنتم طراطرة ...عملينكم تصويرة باش العالم يلقى علاش يضحك، لا إتحلو لا تربطو و ما فالحين كان في دزان البيدق ظربان الحنك.

بالاّزمة لا فيكم واحد داخل البرلمان باش إدافع و إقول الصّدق. الأغلبية الساحقة داخلين على خاطر الشهرية و كستيم تحسين الهندام لا أكثر و لا اقل. و البقية الباقية إدز في النّح باش إقولو هاهو عندو بلاصة مع الجماعة...و لا واحد فيكم إنجح في الأنتخابات المزورة ماية في المياية. و في الواقع من المستوى الثقافي متاع كل واحد منكم نفهمو الي إنتوما ما تصلحو كان صباطية لا أكثر و لا أقل....و فم مرّة بورقيبة كان حاجتو بالنواب ....تعرفو أش قال عليكم رئيس البرلمان : قال الكلاب الكل إنجيبها و إتصحح كما أتحب و تشتهى يا سي المجاهد الأكبر.

و لا واحد فيكم وقف و لا حتى بكلمة مع الشعب التونسي ، بل بالعكس جاين كان ضدو و في عراظتو باش تضمنو تواصل القمع و القهر و الضلم و الدكتاتورية ...و لا أتعلّمتو حاجة في حياتكم كان إنكم تفرحو بتعبي الكروش و الزّردات و الشيخات و في الحقيقة راكم تخدمو ببطونكم...أنا إنضن الي الفلوس الي تخلصو فيها من ظهور الشعب التونسي باش إتولي عليكم بالوباء في نهار من النهارات.

ما تحشموش ! فالحين كان أترشحو و إترشحو ...حاضر سيدي ...حاضر سيدي ...ما عندكم حتى شرعية في تونس و لا خارجها ...و باش أكون في علمكم راهو باش إنسكرو البرلمان جملة و تفصيلا ...أنا الديكور ما إنحبوش ...المهم أني قررت باش أنحنطّكم الكل و أنحطكم في متحف باردو باش الناس أتجي أتشوف في المومياء حيـــــــــة.

و الله طلعة طلعتو بيها ...هاهو توه أنقصو عربي على الناس الكل و إرّشحو فرعون ...لا راهي البلاد ملك السيد الوالد متاعكم و إلا متاعو ...إشنوه الي تعملو فيه ..قولولي خلي نفهم ...كان تكتبو في مؤامرات المعلّم ..... دستور رديتوه كي الشليقة الي يمسح فيه ساقيه. السبب متع التخلّف متاعنا هو إنتم ...أنتم السبب و السّرطان الكبير الي خرّب البلاد ...باقي موش الرّئيس يحكم في البرلمان ...كان مجلسكم هو الي لازمو إشد الدمان ...و لكن إطلعتو رخاص ...جواعة ...ما تستهلوش الكرم و الثيقة لا متع الشعب التونسي و لا متع العالم ...قالولي جمهورية ...أنا جمهورية و أنا طبالة في بالكم عملينها ...عندكم يا جماعة قبعورية ( قبر+عورة) معناتها قبر عريان حتى التراب ما فوقوش ...بالضبط مجلس التكنبين و الخبث و الترهدين

أتحبو تستانسو بالدمقراطية ...ذيل الكلب حطوه أربعين يوم في قصبة و لا إسقم ...إنتم كيف كيف و لا كلمة باهية فيكم و لا في دستوركم. قهرتونا بالبرابقندا. ما تصّلحوش لأنكم متورطين في كل شيئ و أقل واحد فيكم حال كيوسك في المرشي نوار....ناس قاعدة على كراسي تكذب على بعضها و جد عليهم الي هوما مجلس نواب و مجلس مستشارين و دربوكة فارغة. قال أش عندك ...قال عندي.


و السّلام ...و إنشاء ربي إخفف علينا ...و يسّكر البرلمان و المستشار ...باش إنبيضو البنية ...سامحوني البره ...بلا بيكم البلاد أحسن ...بلا بيكم يا جلطامة البلاد إزيد فيها الخير و إتصب عليها المطر...شهرياتكم الكل مقصوصة من اليوم فصاعدا.

و السّـــــــــــــــــــــــــــــــــلام

قاسم قاسم