الخربقــــــــه --- أو إنتخــــابات 2009 (1)

التحوير الدستوري الأخير ! بن علي حاب إقول بالعربي : أنا و بعدي الطوفان ! ألي فهم فهم و إلا ما فهمش ، هاني باش إنوضحـــلو بلوغتــــــــــــــو ! أسهلشي يا جماعة من لعبة الــخربقة !!!! الناس الكل تفهمها ...كان ألي راسو من الحشيش ما إهزّوش.
• قاعة العمليــــــــــات - وزارة الداّخلية
.! الصّبابة في تونس كي البطاطة، ثمه ناس ألصّبة عملتها خدمة، حتى بعيد على كل شي ما يستراح و يرتاح كان ما إصب ! ساعات أصب بنفسو ! إقول: وين مشى مثلا ! مع شكون قعد ! علاش حكى........ ! يغلطشي واحد من الصبابة و إقول في التلفــــــــــون : ثمة طرح خربقة كبير باش إصير ...المكالمة تلتقطها المخابرات التونسية ...و في أسرع من البرق كل شيئ يوصل ....المعــّـــــــلّم. الراجل كان يعقل ! و قال هذه 2009 ما هيش باش إتصير !!!! هز التلفون :
• أش ثمة ؟ إشبيكم ؟
• ثمة طرح خربقة في البـــــــــــلاد و ما ناش عارفين بين إشكون و إشكون و على راس إشكون باش يتعلب ! ؟
• ما هم باش يلعبو على راســــــــــــــــي !!!! طّـــلّعو إشكون باش يلعب في الحال !!!!! خربقة في البــــــــــــــلاد ...عجبكشي توه ؟
• عادي.... .التوانسة يلعبو في الخربقة حتى على الأنترنات توه...موش لازم باش نعملو الهرج ...توه. ...و ماك تعرف كيفاش ...أمورنا ما هيش حاجة ...و المعارضة راهي إتقوات علينا ياسر ...و مدير البرابكندا معاش إمنجم روحـــــــــــو
!• شوف كيفاش ...الطرح ...راهو طرح فريش ...و اللعبة على راسي !!! إطلّع إشكون باش يلعب ...و البلاصة ويــــــــــن ! بلاد كاملة ...إتسركلها و كان إلزم ، إتهبط الفرق الكــــــــــــــــل !!!
• حاضر سيدي الرئيس ...و الأمر أمرك ...ولاد الحرام ....إطلعهم ...كان حتى باش يلعبو على القمــــــــــــــر!بلاد كانت تسهر ...عاملة جو كبير ...العاصمة حافلة ...القهاوي الكل حالّة و الجماعة إتبلط ...و الشيش إتولعج ...و الناس ما على بلهاش بالحكاية ...و هبطت جحافل البوليس . إلّوجو يلقاوش خربقة على طاولة من الطــــــــــّواول !!!!ا
• ثمه جماعة تلعب في الخربقة عندك؟
• إشكون مازال يلعب في الخربقة في غانا ...؟ إشبيك قديم ؟
• مخابرات إتكلّم فيك !!!! عندك خربقة في القهوة !!! باش نحجزها ..
• يا رسول الله ...كلام هـــــــــذا ...الخربقة ما إسمعتش بيها ...و ما نعرفهاش!!
• باهي ســــــــــكّر القهوة ....طرّد الكليـــــــيونات الكلّ و حالا !!!
إسكّرت القهوة لولي ...و الخبر سرح كي النار في التّبـــــــــن ! و الناس عرفت الي ثمة في تونس ناس أخرى تعرف تلعب الخربقة ...و ها اللّعبة هذه أصبحت ممنوعـــــة على طراب الجمهورية التونسية الكل ...كل واحد إيزيد كلمة و إلا ثنين ....من الخربقة ولات ...جماعة إرهابية إتحــــــب إتخربق البــــــــــــــــــــلاد ....شد يا حمد ...الجيش هبط للشوارع ...القزرنات تملات في لحظة ....ماهو شعب عندنـــــــــــا ولي كي الدجاج !!!! إتشوفو الرّاجل ما غير ما إوقفــــــــــــــوه ! يمشي للقزرنة و يدخل وحدو وحدو ...و يلبس حتى الكسوة !متع التوّقيف ...ولاتشي الحجامة الكـــــــــــل تخدم متطوعة عند الجيش ...و متّهم و إلا مش متهّم ...ينزلو عليه ...قرعـــــــــــــــة ...خديمة في تونس ...و ثمة جماعة ولات تتعلّم في الحجامة في روس الشعب الكــــــــــــــل...بلاد أكثر من السيرك .
وزير الدفاع متع تونس
يقرى في ورقة ....طرح خربقة ؟ ســــــــــري للغاية ...إشكون باش يلعب ...و علــــــــــى راس إشكون ....خبـــــــــــّر حالا !!!!
قعد حاير ..ما فهم شيئ ! دبابات مصدية الكــــــــــــــل ! و تخريج الجيش يتكلّف بهاكي الحسبة و ما عندوش الميزانية ....وزير الدفاع ..فاهم الي قرطاج ولات خايفة حتى من طرح خربقة ...طالبو.... واحد على واحد أخر ...مغلوب على امــــــــــــــرو ! لازم إطلّع إشكون باش يلعب و ضد إشكون ...و على راس إشكون ؟
• راهم باش يلعبـــــــــــــبو في بقلاداش ؟
• بنقلاداش....الطّرح في بنقلاداش ! أش ثمـــــــه عليهم ؟ طيارة عسكرية تخرج لبقلاداش و حـــــــــــــــلا ...هاني باش إنكّلم رئيس بنقلاداش ...إشد التوانسة الكل...الي عنـــــــــــــــدو ....عارفهم مع طـــــــــــــالبان هاذوكم
• سيدي الرئيس ...ما ثماش جالية تونسية في بنقـــــــــــلاداش !!!!
• تبعث طيــــــــــــــــارة ..عسكرية ...ثمه و إلا ما ثمـــــــــــاش!!!!
• مخاصير زايدة سيدي الـــــــــــــــــرّئيس
• نفذّ الأوامر ....ما إهماكش ...زوز طيـــــــــــــــارات ...المخابرات العسكرية إلكل تمشي ...إتجيبوهم ....الكل!!وزيــــــــــر الدفاع ...إجهز طيارتين ...أخر طراز ...و أحسن رجال متع المخابرات العسكرية يبعثـــــــــهم في مهمة لبنقلاداش !!!! شطر الميزانية متع وزارة الدفاع طارت في الهـــــــــــــــــواء ....رجع وزير الدفاع من المطار العسكري هو و صاحبـــــــــــــو في الكرهبة
• شنوه جدت عليك ...طرح خربقة في بنقلاداش ؟
• علاش لا ؟...معارضة قوية
• و كان يطلع الطرح خربقة متــــــــــاعك في بن خداش متع ولاية مدنيــــــــــــن ...؟؟
• وين إتجي بن خنداش
• ولاية مدنين !!!!! و يتفلق وزير الدفاع بالظحـــــــــــــك
• عملوها الجماعة ....رجّع الطيارات
• خلــــــــــــــــي يمشو ...تطلعشي بن خداش في بنقلاداش ؟
*خربقة ! إشنوه خربقة في تونس ! منذ قديم الزّمان ! و إحنا في نفس البعبوكة بنفس النــــــــاس! بنفس الوجوه ! فدّينا ! ذ رحنا من مسلسل الخربقة! الناس الكل غالطة و ما فيها باس كان الكـــــــــلاب تتبدّل الجيويرات متع الخربفة إســــــــّموها كلاب....
وزير الدفاع ! ما فهم اش يعمل ؟ رّوح رقـــــد ! و قال غدوة إحلّها ربي ! البـــلاد راقدة على خربقة ...االشّعب التونسي و بالحروف الكبيرة و على كل المحطّات كتبت : مــــمــــنوع التخربيق ! الوزير الأول سمع بالحكاية ...قال أش نعمل أنـــــــــا ؟ إنخربق و إلا نحكم ...الوزير الول ما فهم شيئ من الخربقة ..الجديدة و إلي لازمو إنحي البلاياك ...خايف لا الجماعة يعطوه الحــــــس ..... ... كان باش إخليهم ..العالم يفهم الي الحكومة قاعدة إتخربق في البلاد ! بين نـــــــــــــارين ...نادى وزير الدّفاع • أشنيه الحكاية متع الخربقة
• خلي عـــــــــــزاها سكات ...و الله ما إرقدها
• كيفاش ...شنوه الي صار ...ما في بالي بحتى شيئ
• المعلّم ...قال بالي ثمـــه جماعة باش يلعبو طرح خربقة على راسو !!!! و أنا بعثت الطيارات
لبنقــــــــــلاداش ..باش إتجيب الجماعة ! و الحكاية طلعت في بن خداش ...ما عاش عارف أش نعمل
· فديــــــــــت من ها الخربقة
• نحّي البلايك ...إشنوه قاعد إنخربق
• أمنعها بمنشــــــــــــور سيدي الوزير الأول
منشور الخربقة 108
...الـوزير الأول...وقت الي جاء قدامـــــــــو : منشور الخربقة بعد ما رقناتو السّكريرترة ...شد راســــــــــــــــو ...و يتفلق بالضحك ...إشّد المنشـــــور و إشركو !!!! إنحي الفيسته ...و يخرج من البيرو !!!! و بدى يتكّلم وحدو : عقاب عمري وليت وزير خربقة ...إنخرّج ...منشور الخربقة .ثمة إشكون في المعارضة سمع بالحكاية ...و نص مطّول يخرج على أكبر سيت معارض ! ...يكتب بالفرنسوية ..يحكي على طرح الخربقة ...و إكمــــــــل النص بجملة ...فيها : الطرح هذا براسو ...كان موش إنقـــــــــــلاب متع ثمه ثمــه !!!! و دخل النص في الشبكة و بدات المحطـــــات الأذاعية و التلفزية تنشر في الخبر ...يا طرح خربقة ...يا إنقلاب ....وزارة الدفاع الأمريكية ..تعمل لجنة متابعة ...ولاتشي لعبة الخربقة من أكبر اللّعب الأليكترونية في العالم ..و حتى الشطرنج ما عاد عندو حتى قيمة ....ولات تدّرس في الجامعات العالمية و خاصة العسكرية منها ! إلكلّها إسراتيجــــــــــــــــا ....كنّـــــــــا في بلاد ! إتصدر في الشباب لأروبا و كل يوم ماية إموتو في البحر ...ولينا بـــــــــــــلاد إتصدر في التحاليل الأستراتجية و كيفية القيام بإنقلابات الخربقية ......المعارضات العالمية ألكلّها إتصب في تونس ...تتعلّم في الخربقة ...باش يعملو إنقلابات في بلدانهم ....العالم ألكل إحب البـــــــــوفوار ...الفلوس و البوفوار ..هذي قّصة العالم في الحقيقة ! إلا في تونس ! الناس لا عاد عينتها في شيئ ...كان الضّحك ...و كان دزّان الحنك ...فدّت من البوفوار ...في تونس : أضحك و قاوم ! أرسم و قاوم ! دّون و قـــــــــوام ! خربق و قاوم !!!يسمع بن علــــي بالحكاية !!!!و إقول ..... كيفاش ما إيجوش إشاورني أنا في فلسفة الأنقــــــــلابات !!! أنا أكبر خربـــــــــــــاق في العالم ! و انا ألي صنعت الخربقة الأليكتورنية ! و قال زادة : إنحل جامعة كـــــــــــــاملة إندّرس فيها .....بن علي حاب أولي المستشار العالمي في الحكاية .... كان موش وزير الدفاع ..قالو :
• سيب عليك ...كان إتجيك الناس هوني ...إتولي تعترف برشة حاجات ! و صاحب صنعتك عدوك ! خلي عزاها سكـــــــــات ! و ما شاف حد ما رى حد .....سيّب علينا ...أقعد في الظـــــل !!! راهو إترسيلك في حل و أربط مع الصّحافة العالمية ....الناس جايه هوني تتــــــــــــــعلّم في الخربقة ...أش دخّلنـــــــــــــا أحنا • لا لا لا ...دخّلنا ...راسي في الحكاية ....راهم باش يلعبو على راســــــــــــــــي ....إنت المهمة متاعك : إطلع إشكون .....اش عملت مع بنقلاداش ؟
• مازال ما جوش الطيارات ...و التقارير مازال ما وصلتش !!!!راهي بعيدة ياسر بنقلاداش !!!! وزير الدفاع ا ما حبش إقول على حكاية بن خـــــــــــــداش !!!! إباصي الرّاجل !!!! خرج من القصر ما هوش فاعم أش باش يعمل !!!!! المعارضة عندها الحــــــــــل ! كأيها المعارضات في العالم …قادرة باش إتصب ببعضها و في أي لحظة !!! و قابلة للصّبة قبل حتى المصالحة ....بدون مشّقة. واحد من المعارضة إهز التلفون و يعمل تـــــــــــــــــــل للجماعة في باريس ... إخوّنا ...جاتو الصّبة حاضرة ناظرة ...إشكون باش يلعب ضد إشكون ...و على راس إشكون و في أي مدينة.... الي طلّعها واحد من جماعة الكبار: الدّكتور متع بن خداش...أقدّم لكم الدكتــــــــــــــور النجـــــّار
الي كلّم وزير الدّفاع على حكاية الطرح متع الخربقة ما فسّرلـــــــــــوش حتي شيئ و الأخر كيف كيف ما طلبش أكثر ...حاجتـــــــــــــو بالأسامي و لا أكثر و لا اقـــل ! المهم إفك عليه من ها الحكاية ...و بعد الخربقة هذه ناوي حتى باش يستقيل ! ولكن جملة ظريفة ...خلاّتـــــو يتعوّج و إقول ...الطرح هذا جـــــــــاي على راس برشة جماعة موش كان بن علي .... وزير الدّفاع...خاف. تونس يحكمها الخوف ! و باش إكون الشيئ هذا هو المحدد و لسنوات عديدة ! الناس الكل خايفة من بعضها ...شعب ما عاش يتحكّم في مصيرو ....إنتهى ...الحالة هذه قادرة باش إطلّع كان الصمصارة و من كل بـــــــــــرّ ....الشعب ما عاش إهمو إشكون يسرق ، إشكون إكنبن ! إشكون إصالح مع إشكون ...إشكون يظرب في إشكون ! شعب سلبي ...و ما عندو حتى حـــــــــــل، إلا التعامل و بكل سلبية مع المستقبل متاعو ! ما إتحملش المسؤولية ...و النخبة جبدت بيه أكثر من مرّة ...زعف الشأن العام ! و قال طرح خربقة أحسن من كل شيئ ! ما هي ممنوعة ...نلعبو ...كل ما هو ممنوع في تونس أولي فيه العســـــــــل ...! إتصنعت خربقة في وسط كل دّار و كل مرا شدت رجلها إتخبط فيه ...قليل وين تلقى راجل و إربح مرتو في طرح خربقة.
العائلات إتبع في الأخبار عبر الأقمار الصناعية ...وقتاش و كيفاش و مع إشكون طرح الخربقة هــــــــذا ..باش يبدى ...التلفزات العالمية ...ظخمت الخبر ليل ولات تحكي على بطولة عالمية في الخربقة على راس الخليفة متع الولايات المتحدة في تونس .لغة كما هذه خلاّت وزير الدفاع يتصــــل بالرّئيس و إقولو بالظبط على الجماعة ....إشكون باش يلعب و وين بالضـــبط.
كي سمع الخليفة ...بـــالي الدكتور النجّــــار في الحكاية ...و بألي هو أخطر لاعب في الخربقة ...نادى الفلاسفة متع تونس الكّل و كـــــــلّفهم باش يعملو مـــــوديل للدكتور باش يعرف إش في راســـــــو .
فهم وزير الدّفاع الي الخليفـــــــــــــــة إحب يلعب !!! و خاصة كي سمع بإسم قاسم رئيس جمهورية المحيط الأطلسي ....ماهو رابحو في طـــــــــرح الـــنوفي الي فات ...الرّاجل إحب الريفونش .....توه إنشوفو ....إشكون يربح ...و كيفاش

********
قاسم قــــــــــاسم