المشاركات
هاهو علاش الدّجاج ما إنحبوش و نكره الريحة متع جد بوه ؟ توه الدّجاج عطاه ربي منقار باش ياكل و يشرب ، و لكن شيئ النافع ربي ..ما يستعملــــو كان في الفساد...تطلعشي نوارة في البلاد ! حتى متع قرعة ، الدّجاجة تمشيلها بالعــــــــــاني و شماتة في قاسم و تنقرها و إتفسّدها ...و قداش من نوارة إتهلكت في هاكي البـــلاد ...السّبب الوحيد متع خرابها ها الدّجاج الآسود ...كان النّوارة ما قصّهاش بن علي و ألا الطرابلسيّة ...راهي ماية في الماية باش يهلكها الدّجاج ...إيه ؟ أش نعملو أحنــــــــــــــــا التوانسة الي أغلب مكلتنا من الدّجاج ...نقطعوه جملة و إلا نشرو قرياج على كبر تونس ؟
حكاية القرياج هذه يستحيل ! أحنا هكــــّا و إنعيشو داخل صور من حديد ...بلاد مسركلها بن على و الطرابلسية بصور كي صور الصّين ..حتى من الآنترنات مقصوصة ..من داخل تونس ما إتشوف شيئ ...الصّور عالي ...و كان إنزيدو عليه قرياج ..إنموتو بالخنقة!!!
بلاد إتسيب عليها دجاج أسود و مريض و عندو منقار يا لطيف ...اللّطف ...حتى البنيّات ولات خايفة على عيوناتها ...تسومني متع دجاج ..ينقر في العباد و النّوار و النخّل و الشّجر و حتى من القطّوس ما فلتش ....بلاد باش يحكمها الدّجاج ..يا لطيف يا لطيف ...و يا عارنا على أروحنا ؟ التوانسة حــــــــــارو في الدّجاج و ما نجموش إقاوموه.
صاحبي المرحوم ، زهير اليحياوي ، هذاك النــّوارة الي نّورت في الرّبيع و طابت بكري و خلاّت زرّعتها في كل بلاصة ...في الأنترنات في الفايس بوك في الصّحافة في العالم كامل ...باش مات زهير اليحياوي ...سيبو عليه دجاجة كحلة ..جات حتى لتونزين ...و ماهو طيب ، ما فاقش و ما عطهاش قدر ...قال هذه دجاجة ما تعمل شيئ ...و لكن في الآخر قتلاتو بالآنفليـــــونزا...الله يرحمو و إسامحو.
صاحبي ..كيف كيف الدكتور منصف المرزوكي ..ما نجموش بن علي و ما نجموهيشي الطرابلسية ! كي رّوح لتونس سيّبــــو عليه الدجاج متع حمام سوسة ...شعرة لا مشى زيزي ...الرّاجل !!! و غنتم إتقولو الدّجاج ما أخوّفش ...لا الدّجاج سلاحو في فمّـــــو ...كالكلب حشاكم .!!!!
صاحبي قاضي القضاة ..مختار اليحياوي ..ألي يومنا هذا ..دارو مسركلة بالدّجاج الآسود ! و حتى من فوق الدّار ...ثمة صردوق وين إيجه حد للدّار يطلع يــــذّن و إفزّع بن علي و الطرابلسية !! راهي بلاد ولات محكومة من الدّجاج...إتكلّم دجاجة إترسيلك في عين عورة ...خير هو الواحد أولي عينـــــــــــتو بيضاء جملة.
توه عشرين سناء و لا طلعت نوارة في البلاد ...حتى من الياسمين ما سلمش ..دجاج قاعد يسكر فوق الصّور و الكمية ياسمين ...في الغابة نفسها ..ما ثماش نوار...أبدا في هاكي البلاد باش تقعد نوارة و إتفرّخ و أتجيب الزّريعة ...و إيزيد يكثر نوار البلاد.
دكتور نوارة ، قاري مليح ! أقري في الجامعة ! يحكي مليح ! الرّاجل معبى و عندو ما إقول و عندو ما يحكي ...و هابط للميدان بكل تواضع إنجمو إنقولو ...و يكتب بالدّارجة ...و رّبما إكون أول دكتور جامعي كتب بالدارجة و إنجم أوصل المعلومة ...إسيبت عليه دجاجة من تونس ، قالو ناقدة في السّنماء ؟؟؟؟ أنا باش نهبل ....حتى الدّجاج يفهم في السّنماء و النقد ...و هاكي الدّجاجة طيحت ذبانة في الدّكتــــــــــــور !!! علاش ؟؟؟ الدّجاج صنعتو الفساد أولا و أخيرا...ينقر كل شيئ !!! و شماتة في تونس و في أهلها ....شماتة في العباد.
أنا السنماء ما نفهمـــهاش أبدا !!! و لكن نكتب في نصوص تشبه للسنماء !!! ربّمّا تشبه لأفلام !! أما باش فيلم إتكون فيه البطلة دجاجة مــــــــازال ما إكتبتوش ...و لكن هاكوم تقرو فيهم ...إشنوه دواء الدّجاج ؟؟؟؟؟ نعملو دواء البرعوث ؟ نشري ذيب ؟ نشري ثعلب !!!! ما عاش ناكلو الدّجاج.؟
يا رب ..صّبرني مع الدّجاج
الدكتور مازال ما فاقش ...من النقرة الآولى ...و إتجي دجاجة أخرى ...إتزيد إتّكمل عليه !!! إتقول فنانة ..راقصة و مخرجة و نحاتة ...خدمتها الفـــساد و هاذا ما عندو من نقول !
الدّجاج هذا ..عندو حــــل واحد !!!! ها الدّجاج الي ما إمخلي حتى نوارة إطيب و إتعيش و إترّبي الريش ....عندو حل واحد عند قاسم .........إرّيش جد والديه الكلب ...إنخليه إعيش عريان ! على الآقل ما عاش يوصل ...للنوار العالي ..و إجوانحو تتقصص جملة.
قاسم قاسم
ليست هناك تعليقات:
إرسال تعليق