المشاركات
يا قفصة ثوري ...ثوري ! يا تونس دوري دوري
حاول نضام الشابع من نوفمبر عزل أهالي الحوض المنجمي عن تونس جملة و تفصيلا ، حتى إنو الشرارة ما تتعداش للمدن الأخرى ...و تــثور تونس جملة في وجهو كما صار في الخبزة ...نجح بن علي نوعا ما في بداية الأزمة و لكن فشل للمرّة الألف في حل المشكلة في حد ذااتها : الناس هذي طالبة إنها تخدم و إتعيش عيشا كريما لا أكثر ...و لكن الأتهـــــــامات كانت كما العادة : محاولة قلب النضام و التّمرد المسلّح...و كانت الأحكام قاسية ...و زاد الهم على قفصة و تونس !!!! للمّرة الحمسين بعد الألف ؟
في تونس بن علي ثمّة قانون واحد : عيش و إسكت و إلا كسّر قرنك !!! هذه هي اللّغة الي يتكلّمها نضام الشابع من نوفمبر. إطالب بحقك في الشغل ، بحرّيتك ، بكرامتك ، باي حاجة ، إتولي إرهابي و إتحاول باش تعمل إنقلاب بالسلاّح...هذه هي غناية نضام فاشل باش إواجه أي مشكل إجتماعي و إلا سياسي ...منذ عشرين سنة و أحنا في ها الخرافة متع التــــــــــــــــــأمر على النضام.
و كان نضام بن علي منزّل من السماء !! و كأن بن علي نفسو رسول و إلا نبي بعثو ربي للتوانسة ...!!! و كأّن بن علي هذا ...ولى القدر متع تونس !!!! و كأننا بلا بيه رانا باش إنباتو بلا عشاء و المطر ما عاش تنزل....بالضبط هذا أش إحب يوصل نضام التجّوع ...و هذا أش حاب إقولو للتوانسة بقمع أهالي الحوض المنجمي و أهالي بنزرت و أهالي سيدي بوزيد...بلاد كاملة محاصرة ...من شامالها لجنوبها....و إقول عليه نضام ...
نضام بن علي عمرو ما كان نضام بل عشوائية سياسية بلغت الذروة متاعها ألي حد وجود مشكلة متع بوفوار داخل قصر قرطاج...و الناس ما عاش عارفة إش كون يحكم هو و إلامرتو و إلا نسيبـــــــــــــو ...شكشوكة ما عاد فاهمين منها و لا حاجة.
النضام هذا ما نجمشي يخرج من الكريز متاعو !!! حاب إوحل المشكلة في الشعب التونسي بإتهامو بالتسلّح ...و تعكير الجو العام ...إتقول راهو الكياش إمعوّج و ضيق ! إقولك إنت إرهابي و مسلّح و إتحب تقلب بن علي !!!! إتقولش راهو الضو ديمه إقص و شوفولنا حل ...إقوللك ، إنت إرهابي و مسلّح و إتحب تقلب النضام...هذه تونس بن علي ...هذا لآش وصلنا في تونس.
بن علي ما عندو حتى شرعية و لذلك باش يبقى ألّوج عليها و بكل الطرق ، حتى و لو باش إقتّل ولاية قفصة كاملة جوعا \، تشرّدا و حصارا....ما عندوش حل و يستحيل باش يلقاه ...منذ 20 سنة و جماعتو إتهز و تنفض ...مشاكل تراكمت منذ 20 سنة ما هيش باش تنحل في ليلة و نهار و إلا بزيارة وزير و إلا بتسمية وزير من قفصة و إلا ببث حلقة على قناة ليلى فيها شوية قفاصة.
مشكلتنا في تونس واضحة ، وضوح الشمس !!! بن علي هو المشكلة أولا و اساسا !!! ما قلبش الرّأجل هـــــــــــــــذا و إستقال و خلى الشعب إدبر راسو ...البلاد باش إتهز السلاّح فعلا و فكرا...موش كذب و نفاق كما قاعد يتهم في المناجم و في الفلاحة متع سيدي بوزيد و في المناضلين متع بنزرت....وعندها فقط توه يفهم التــــــــــــــّجوع إش معناتها الفكر و السلاح مع بعضهم !!! معناتها إولي قانون : العين بالعين و السن بالسّن....جاري المفعـــــــــول .
ألي أبناء قفصة :
أي معركة سياسية ، إجتماعية ، أو أي ما كانت ...لا بد من خوضها في العاصمة تونس!! إنعم ...العاصمة السياسية ...لازمكم تهبطو للعاصمة ...و تنصبو الخيام متاعكم في قلب شارع الحبيب بورقيبة ...و الضرب راهو باش إيزيد في قفصة و خاصّة بعد زيارة الفرنسيس ...النضام حسّها في إعضامـــــــــــو و باش ينتقم منكم و من التوانسة الكل ...إنعم يا أهالي الحوض المنجمي ...إنزلو للعاصمة ...و فكّو الحصار على الشعب التونسي الكـــــــــــــــــل ....بنزرت تهبط ...و سيدي بوزيد تخلط عليكم !!! و لو لمدة شهر أو شهرين ...أهبطو لتونس !!!! أهبطو لتونس ...أهبطو لتونس.
سلام
قاسم قاسم
ليست هناك تعليقات:
إرسال تعليق