المشاركات
السّلام عليكم سي علي ،
شوف كيفاش سي علي ، الأجسام الحيّة ماهي متكّونة من خليــــا ، إتعيش و تشرب و تاكل و تتنفس و إتموت ...دون ما إموت الجسم ، فرق كبير بين موت الخلّية و موت الجسم ...لحضة سي علي . العمليّة هذه صعيبة شوية : مفهوم الموت و الحياة يوجد في الخليّة بحد ذاتها ) حاجة داخلية ..إنقولو إنترانســــــــاك) إنقولو بعد شهر أو شهرين ، في حالة من الحالات ، ألخليّة ترفض أمـــر الموت و إتواصل إتعيش و تتطّور كما إساعدها ...هذا يا سي علي الدّوعاجي المفهوم البسيط و المبسّط للسّرطان حشاك و حشى الناس الكل . يعني رفض الموت ....هنا قمّة الثّورة متع الخلّية، رغم عدم قدرة الجسم على تحّمّل الأورام ...و ألي أجلا او عاجلا ماشي للموت، لنهايتو القطعيّة ....إتقابلت أنا و عزرئيل ثلاثة مرّات و في كل مرّة نربحو و نفصع ....مانيش باش نحكيلك كيفاش صارو الحكايات ...مازال ما جاش الوقت متع القصص هذي ألي إتخوف برشة مدّونين ...هوما من ربي يرعشو و زيد إجبد على الذيب و الغولة و المقرونة كاليبر 12
التونسي كخلية ، لازمو يرفض الموت الفكري و الموت الثقافي و الموت السياسي ...يتمرّد على الجسم ..ألي هو المجتمع هذا حتى و لو كان الرّفض هاذا باش إتعب الجسم ، و تطلع السّخانة متاعو ...رفض الموت متع الخليّة يعني التــــــواصل ...يعني إضافة قيمة جديدة للمجتمع ألا و هي الحياة...باش إعيش الجسم هذا في تناغم لا بد من أنو التونسي يرفض الموت ..يرفض إنو إذوب في الأمر الواقع ألي حابة برشة ناس تفرضو عليه فرضا ...كذبا و بهتانا .... الحاكم هذا ، بن علي و جماعتو و رغم فراغهم السياسي و الفكري حابين أنو يفرضو لا شيئ على التوانسة الكل !! باش طلعو أخر شيئ ...بالرّجوع ألي البايـــــــــات ...إنعم ...الرّاجل أحتفل بالعيد 57 متع محمد باي و زاد علّق تصويرتو في قصر قرطاج ...ماهوش عارف بالي القصر هذاك يعني سيادة الجمهورية و ما هوش ملك السيد الوالد ...الجمهورية التونسية ماتت ...ماعاش باش إتقوملها قيامة إلا ما يقلب بن علي و الطرابلسية و التّجوع.
إنعم رئيس دولة أكلّمك فيك !!!! رئيس جمهورية قاسم ..و عندها يا سي على الدّوعاجي 25 ألف مواطن ...رّبما عندي أكبر حزب في تونس باش إكون في علمك ...أنا عملت البورت أ بورت و إمشيت للناس ..و قللتلهم ..الجمهورية مالعي محلولة ليكم ...جمهورية الحرّية و الكرامة ..الناس يا سي على الدوعاجي ...ما هيش قاعدة تحرق للجمورية قاسم ...بل عن إقتناع و روّية و كلام صحيح قاعدة تتلتحق بإشكون قادر إهز المشعل متع السنوات القادمة ...
بن على ما إلعبنيش ...على كل الأصعدة ...الرّاجل خايف يلعب مع الشابي و ألا المرزوقي ...خايف لا يخسر المقابلة ...و الشيئ هذا كتبتو في فلم الخربقة ...و فيلم الدّم الفاسد و في عدة نصوص . المليح في التّجوع يهبط ..و إنكدلك ما فيهم حتى واحد قادر باش يقرب من الميدان ...ناس فاشلة ! نحّيلهم البرتكان ...إشدو الغابة جري. بن علي ما هوش متع كونبـــــــا ميدياتيك و متع نصوص وو متع راية واضحة و مشاريع و ما إلي غير ذلك من كلام إفوتو ...بن على فجّاة ..صدفة ولى رئيس دولة ...و صدفة أولى يحكم بأحكامو ...و بالصّدفة باش يخرج منها يدّيه على راســـــــــــــــــــــــو .
جبدت سي الدّوعاجي على الكتيبة
موضوع سمح و لازمنا نتحدثو فيه و نجبدو الخنـــــــّار القديم و الجديد...أنا إنقول بالي اللّغة ما هي إلا وسيلة متع كومنيكسيون ...و ما ثماش لغة أحسن من لغة ...أما الكاتب إنجم إكون مصيب و إلا عاقر ...توه فرنسوية عمر الخيام متع تونزين ما إتجّمش إتقارنها بحتى فرنسوية أخرى متع واحد أخر ...لأنها فرنسوية صادقة ...خارجة من الأعماق ...عمر الخيام كي يكتب بالفرنسوية إتحس معها إنك إطير في الخيال ...إتحس روحك مندمج معاه ..إذا الكاتب ...هو الموضوع ...و هو الي قادر أحرّك كل شيئ ...أما اللغة كي يكتبها واحد اخرى ...شوف و إشوف ....بقى النّص الفرنساوي ...ما هوش قادر باش يوصل لأعماق الشعب التونسي ...للقرى و الأرياف ...يبقى نخبوي أكثر منو نص موجّه للخارج موش للداخل ...قدّاش عندها لبراس تكتب ...عمرها ما فاتت العاصمة و أحوازها .
اللّغة العربية ، لغة الضاد ...إثرى لغة في العالم ...و لكن هات إشكون يكتبها ...إشكون هاز القلم ! إنجم إكون هازو نزار قبــــــــــاني ...و إنجم إكون هازو برهان بسيس ...إذا اللّغة ما عندها حتى دخل في النص ...بل إشكون قاعد يكتب و لشكون ...هذه هي القّصة ..
جات اللّغة الدّارجة و انا من روادها ...إنحبها لا أكثر و لا أقل ..و زيد على ذلك كانت تجربتي بالّغة العربية الصّحيحة تجربة صعيبة ( قميص عثمان ) لازمني إنفكر برشة باش إنجم نكتب جملة صحيحة ...و زيد ما نعرفهاش بالقدى ...و أمر من التجربة متع العربية كانت الفرنسوية ...ما عنديش باقاج كبير باش إنجم نكتب الشخصيات متاعي ...و ربما ما يتكتبوش كان بالدّارجة ...فيلم الدّم الفاسد يا الدّوعاجي وصل باش تعطي فيه الأراء متاعها أكبر كتاب سيناريو في العالم العربي ! و التلفزة ...و برشة مسرحين توانسة حبو الفيلم هذا ...لأنو تكتب بالدارجة ...
أنا نكتب للشعب التونسي ...للتوانسة ...لازم إني إنكلّمهم بلغتهم لا أكثر و لآ أقل ...و الدّارجة قادرة باش إتوصل الخبر و الفن و المسرح و السّنمــــــــــا ...إشبيها ، إشنوه ألي ناقصها ...إنت كيفاش إتكلم في العزوز عندك بالفرنساوي و إلا بالعربية الفصحى ....إنت إنكلّم في زينب بالدّارجة...يعني باش نكتب بالدّارجة ...جمهورية قاسم ...لغتها الدّارجة ...
رئيس الجمهورية التونسية +
القائد ألعلى للقوات المسّلحة
قاسم قاسم
هناك 4 تعليقات:
كيفاش بش تعمل إنقلاب وإنت هاك بحذانا في طورنطو, و على فكرة إنت إتهمتني بالباطل و قلت إلّي آنا آداة الحكومة يستعملوا فيّا بش يهبطوا من مستوى التدوين, ربي يهديك أما ظاهرلي فيك تشوف أبيض و أسود و هذا مش بامي بالنسبة لزعيم
وقتاش إتهمتك ...يا سي علاء...حشى و كلا
زعيــــم و نص ...
وكانك شاري الشبوك ..مرحبــــا ... ...
لا يا سيدي مانيش شاري شبوك و لوكان تقدم مشروع سياسي يعجبني و ترشح نفسك هاتو ننتخبك آما إنت حطيط روحك رئيس قبل ما ينتخبك الشعب عملت كيما السيّد إلّي شادد الحكم
أهلا بالقائد الأعلى للقوات المسلّحة،
خسارة طلعت ديجا رئيس و أمورك واضحة و أنا في بالي باش نمشيو نخطبو مع بعضنا في حي التّضامن و نعملو دورة في نهج ميا و خمسة و نسلعو كان لزم....هيّا موش مشكلة هههههه
الثّورة الهادئة سي قاسم بدات من قبل الإستعمار و مرّة تمشي بالشّويّة مرّة بالقوي لذا البنات إلّي ماشي تخطب فيهم ماحاجتهمش بعروس حاجتهم بزيادة في الشهرية ميات دينار في الشهر في ألفين و ثمانية عيب....سيريوزمون التّجوّع فيه يمكن زوز ملاين تونسي زعمة الكلّهم يخلوضو و إلّا الكلّهم بهايم و الأخرين أذكياء إذا تحكي على ثورة هادئة ماهيش مربوطة بالسّياسة مربوطة ببرشا حاجات أخرين و مادام ما زلنا ماعنّاش تكنيك في التّعامل مع الدّم الفاسد إلّا بالتّجاهل و إلّا بالتّنحية مازّال مبعّد هذا باش يجي واحد آخر و ما يتبدّل شي...اللّوغة يضهرلي ماناش نحكيو على نفس الحكاية أنا جوست لاحظت إلّي ثمّة مواضيع معيّنة التّوانسة يرتاحو أكثر كي يحكيوهم بلوغة أخرى و هي أصلا المواضيع هاذي التّوانسة ما يرتاحوش جملة باش يحكيو فيهم هذاكة علاش البلوغينغ إلّي هو أصلا شخصي ياسر و فردي ياسر يصعب على واحد يحكي كان على السّياسة و إلّا الحشرات إلإستوائيّة باش يكون منتظم فيه و حتّى كان إنتظم فترة من بعّد مدّة تطيرلو النّفحة و زيد على الحياة السّياسيّة و إلّا الثقافيّة الحيّة ياسر عنّا ماهو هي بيدها الحكاية.
فخامة الرّئيس أنّستك بالرّجال جملة
إرسال تعليق