المشاركات
إتصّرو ، إنكم في مدينة سوسة ، بالضبط على بوجعفر !!! عباد ماشية ! عباد جاية ! عباد تتحّرك ! الناس إمصّيفة : إقولو الخلاعة. الكميرا ، أتعدي في الوجوه على بعضها ، ثمة الفرحان و ثمة التعيس ! و ثمة ألي ما على بالوش و أغلبيّتها ...التوانسة فالحين في لغة ما على باليش ؟ إشنوه ألي إدور في راس البرباش ألي شد بلاصة بعيدة على الناس الكّل و كأنو موش منهم !؟ و علاش ثمة ناس إتحب تستخلى بأرواحها !!! ؟ هل الناس هذه ما عندها حتى شيئ إلوّج عليه البرباش؟ و إلا العكس!!! مقابل البحر ، قاعد وحدو ! ذكّرني بالمفكّر !!!! بعيد في البحر ثمة بابور بحر ، دوب ما يتحرك في إتجاه الشاطئ!!!! ؟
· و الله قينية ...يحكي وحدو البرباش !!! و زاد طيش الصنارة ؟ يستنى في سمكة ، تحصلشي في المنداف !!!! و كمّل يحكي وحدو : حتى الحوت ولى إخدّم في راسو !!! ما عاش حاصل في ها البلاد !!! إتكّــــــى سي البرباش و خلى قصبة الصّنارة تصطاد وحدها !!!! ظهرو تسلخ بالشمس ! و دبوزة الماء فرغت ...هزّها الكورّينتي و بحرت كتونس . وراه الشط بدى يفرغ و الناس رّوحت لديارها ...و كي خذاتو عينو ...عطى للنوم حسابو ...إرتــــــــــــــاح سي كما حب ! و لكن الحوت سلامتو فيه ....ما عاش يحصل لا أكثر و لا أقل ...و ماعاش تتعدى عليه.
· إيجه و دبة دبّة يقرب من الصّنارة ، يخطفها بسرعة و لكن كي العادة لا حوتة و لا سمكة ! فارغة ! أش إقـــــــــول : الحوت الكل حرق لأطاليا و لفرانسا و ما بقى كان الوزف : الشركاو ! الحوت الصّغير ألي ما يحصلش بصنارة تـــــــــــن .
· ألبس دبشك يا برباش ...يزيك من النوم !
· خلّيني راقد ...يا سي قاسم ...تاعب راني ..تاعب
· مناش ؟ تحصد ؟
· تاعب من لا شيئ ...تاعب من ربي
· برى توه إنقيدك في فريق فاتيقي دي نصّونص ( بالسّوري)
· عندهم فريق كبير! إش كون فيه؟
· خلي عزاها سكــــــــــــــــــــات ...لمّد دبشك ...عندي لك برنامج
· خدمة و إلا كاباس ؟
· فكني يا راجل .......
· وين على بركة الله ....قاصدين ربي ...على خير ...
· موش مشكل ...
· ألبس الكوستيــــــــــــم متاعك ... في الكرهبة ...
· الكرافات ما نعرفش نعقدها
· بابيـــــــــــــــون ...موش كرافات ...تلقاها في جيب الفيسة
· كيفاش سي قاسم ...؟بالسهولة هذه ....مرا و عــــــرس ...و خطوبة ...الحكاية في السّيــــر.
· إشنوه المانع ؟ إشنوه الصّعيب ...؟ سهلّها تسهال ...صعبها تصعاب !
· ما هو لازم ...كذا و كذا
· شوفت كيفاش صعبتوها على أرواحكم ...نساء و رجال ...لأنكم ما نجمتوش تاقفو على ساقيكم كما العالم ...و باش نعمل حاجة لازم كذا و كذا ....قتلك عرس في السّتر !!!! لا أكثر و لا أقل !
· خايف لا إنباصي في جرّتك يا سي قاسم
· ألي خاف إسلم ....ما عنيتكشي ثمة ناس أخرى .....تمشي و إلا لا ؟ وي و إلا نون !!! النقاش ياسر ما إنحبوش ....إتنفذ الأوامر و إلا ...إنت راك تتعامل مع عسكري ...موش فقط مع مخرج
· بالحرام كما إنغامر ....و نمشي معاك و إنشوف
· ألي ما إغامرش ما يشربش الشنبانيا ...
وقت الكرهبة ، قدام دار العروسة ، ناس أغنياء من الهاي كلاس ..هاذوكم ألي يتكلّمو بالسوري ...! الراجل بو العروسة ...عسكري ...عقيد و إلا جينيرال ...عندو رتبة كبيرة ...حتى من الحراسة واقفة قدّام الدار! ناس بالسلاح يا بابا ...البرباش هبط و شاف الكلاشن متع العسكرية الزوز !!! إرجع للكرهبة
· السلام عليكم ...أنا قاسم و هذا ولدي البرباش ...رانا جايبن نخطبو في الصّبية ؟
· إشنوه خطبة ؟...العساس كّلم الدار ...و قال ألي ثمة خطابة في الباب
· إتفظلــــــــــــو يا جماعة ...
إنحل الباب قدام البرباش و دخل و في يدو باكو القطو ....العريس هز أكتافو و حل عينيه مليح ! و شد روحو في الصحيح ...دخلنا الصالة ....و عرضتنا قطعة 1.80 م : أقدم لكم ولاّدة ، ليس فقط أبن زيدون تخبط فيها ...كتبها في الشعر و سمع بيها العالم ...أما البرباش هبط إبربش كي الفلوس في خيوط الصباط ! نسى ما ربطوش بالباهي ...و كي شاف ولاّدة رجعلو شاهد العقل.
قاسم قاسم
ليست هناك تعليقات:
إرسال تعليق