النــــــــــّادل 5

و صلنا ، بالي سي بوشيحة ، خرج من قابس لقفصة و زين العابدين طالعتلو كلبة بنت الكلب خذى الطيارة للقصرين ...في مدنين يلعبو في الكــــــــــاري متع الدّكتور النجّار ! أولاد إتنقّز ، شايخة على فلسفة الأنتخبات.....قبل ما واصل الفيلم ...لازمني إنذكر القراء بحاجات ...كانت في بعض الأحيان هي المحددة ، حتى في نوعية الكتابة !!!!!

المرحوم جدي : بلقاسم ، حكايتو كتبتها في جمهورية قاسم الصّغيرة و لكن ثمة حاجة ما قلتش عليها ...و هي ليلة الموت متاعو ...مات كبير ياسر و لكن على قد ما عاش ما ضيعش البوصلة ..قعد بمخــــــــو لأخر لحضة في حياتو....مات في الشتاء ، العشوة ، وقت ألي رّوحت من الليـــــــسي ، أمي زينب ، قالتلي راهو صاحبك موش حاجة ! اليوم نهار و ما طولو شــد فيّ و ما خلاّني نعمل حتى شيئ ...أنا إنجي خارجة باش نقضي حاجة ...إقولي يا زينب يا بنتي ..أقعد ما إتخلينيش وحدى ...يا زينب وقتاش قاسم باش إرّوح ....و أنا إنهدي فيه ...و إنقولو أصبر شوية ..عادك بيهم رّوحو ...هاهم قريب باش إيجــــــيو ....يا زينب راني إنحب إنشوفهم و إنسّلم عليهم قبل ما إنموت ...!!!!! دخلت للدار نجري ...صحوبة ..جدّي ...هذا طولو قرابات الزوز ميترو ...كي ياقف حتى باب ما إدخلو ...دخلت و إتحضّنتو ...و نزلو الدّمعات من عينــــــــه ...و شّدني و ضمني لصدرو ....و إقولي ...يا قاسم ...قداّش إنحب ...وينــــــــــو بوك ...توّحشتو ...قتلو أقعد ...أقعد أرتاح ...و قعد على الفرش متـــــــــــاعو ...إمتدّ ...زينب أمي جاب زوز مخادد ..و حطّتهم وراء ظهـــرو ...حتى دخل السيد الوالد ...سي قاسم ..!!! كي شاف بوه هكاكـــه ...يرعش ...برد ...طلع فوق السرير بحذاه و جبد زاورة ...و إتحضنو ...حاب إدفي بوه ...إرتاح جدي على صدر ولدو ...و نادى على زينب ..و قاللها ...جيبي يا عزيزة هاكه الصّندوق الحديد ...جدي ...ما يثاق في حد كان في زينب ! المفتاح متع الصّندوق ...ديمه معاها ....جابت هاكه الصّندوق ...أول مرّة يتحل الصندوق ...قدأمي ...إمعبى ..بالحجايج ...بالأوراق ...قالـــــها خرجي الأوراق الكل !!! خرّجت إمي كل شيئ ...ختى وصلت ...الصّرة ...ثمة صّرة كبيرة ، قاللها حلّي الصّروة ! ألي فيهــــــــــــا يا زينب ..ألكــــــــلّو ليك ...: ذهب ..لويـــــــز ...حلال عليك !!! و سامحني على عملتو معاك الكل...و قد ما نعطيك ما نخلصش .معاك ...زينب ...طلعت على السرّير و قعدت بجنبو الأيمين ...العجوز يلهث ...و يجبد في النفس بالسيف...!!! يتلفّت لولدو سي قاسم ....و إقولو ....الحجايج الكل تستحفض عليهم قد عينك ...و تعرف حدود الأراضي متاعك ...و إتسّلم نهار من نهار لقاسم ....كما إعطيتهملك ...ما إتبيع حتى شبر ...و كان إتموت بالجوع ....!!!! حاضر بابا ...و لا شبر ...

و إنت يا قاسم ....إنتك عندي حاجة ...باش نعطيهالك ...هديّة ..باش إتعز بيها على زينب و بوك و الأرض ...السلاح متاعي ...مقرونتـــــــــــــــى ...راهك من اليوم متاعك ! ! إستحفظ عليهـــــــــــــــــا ....و كان إتعدى عليك واحد ...ما تستناش باش تمشيلو لدارو و سلاحك إمعمّر بالبارود ....الظرب موش في مساحتكم ...الظرب غادي ، قادهم ......! على أرضهم ...في ديارهم كان ألزم ....

يا زينب ..شهّديلـــــــــــــــــــي ....إرتخى العجوز ...على صدر زينب ...صبعو السبابة مدودة ...و هو إشّهد ....لإسي أخر الشهادة ...سندو سي قاسم ...على طولو فوق السّرير ! و قرى عليه صورة يـــــــــــــــــــــس كاملة ....عيطلي بابا ..و قالي برى نادي جيرانا ! ....كانت أخر نظرات على أجمل وجه في حيـــــــــــــاتي ...وجه عزيزي ..و معلّمي و مثلي العلى في الصراع ...

الأرض كما خلّها جدي و لا شبر إتباع ...و بابا زاد شرى برشة و المقرونة مازالت ألي يومنا هذا إمعمّـــــــــرّه ببارودها ...و كان عصفور يتعدى الحدود دون المشيرة متع زينب و إلا بابا ...و الله لا يفلتها ..كان إتكون الرّصاصة بين عيـــــــــــــنو ...الله يرحمك و إسامحك يا صاحبي ...يا جدي يا أحسن جد في العالم.

قاسم قاسم

النـــــــــــادل -4

في الواقع الليلة ، ما كنتش باش نكتب !!! و لكن النّوم هرب و أنا إنكنبص كيفاش باش إنهزلو ساقيه ، صنعة التونسي هذه و قديمة ياسر ، التونسي يدغر من تالي ! لكن طبيعتي ماهيش عاطيتني إني نعطيه الحس !!! مصيبة كبيرة وقت الواحد إكون بين ناريين ، نار البلاد و نار القناعة ...إنكونش إنديتارميني كما التوانسة الكل ! زعمة نعملها ...مع بوشيحة ؟ و لكن ما هو جابها لرّوحــــــــــــو ...إحب الزّبدة و فلوس الزّبدة الراجل ...التوانسة إقولـــــــــــــو : ألي حل زنبيلو عبيــــــــــــــلو ! ما إحب إغوص ..إعبي الفلوس على ضهر الشعب التونسي ! ما هو مستعملها الحكاية باش إيزيد إغوص ...مالا و الله لا فلتها ...إنسيبي و إلا إنشاء الله إكون بويا خلاص.كيفها نخبة طلعت ساقطة و ما هي حابه إتحرك و لا حتى شيئ !!!! إتقول عاملين مزّية على تونس !!! إنا حاير في نخبتنا ، إتقول إدافع على الشعب !!!! و الناس مازال في السّجون ، و الناس إرزاقها ضاعت ، و البلاد إيدك و حديدك ...حاير فاش تستنــــــــى الناس هذه !!! باش يتحرّكو وقت ألي إطيح بن علي ...؟ إشكون باش إطيحو . ؟ ما هومشي عارفين بالي بن علي عملــــــــــــو منو مليون دمية ...إستنساخ ...الحقل الفزيولوجي لعمليات تخصيب الدكتاتورية ..راهو التّجمع !!! و أش فيه من بن علي ...السّرطان الكبير ألي ظرب البلاد و خلاّها حصيدة هو حزب التجّوع ...في إنتضار النخبة باش تتحرّك و تخرج للشوارع و تعرف شعار : بن على يزي فك !!! قاسم باش يعمل إنقلاب ..تجريبي على بوشيحة و إنقلاب إستراتجي على بن علي و في نفس النهــــــــــــــــــــار ....و ثمّة إنقلاب ثالث لازمني نربحو ، الأنتصار متاعي السياسي باش إكون على حساب الخوانجية ...و موش في الوقت هذا ...إنما قاعد إنخططلو للسنوات العشر القادمة ....خلوني إنصفي بن على من الأول و من بعد باش نرجع للغنوشي
...بوشيحة شد دبوزة الرّيكار و من الدّار ما خرجش !!! حال التلفزة و يتفرّج على الفلام ...فيلم بعد فيلم ...و لا في خبرو و لا في دراه بالي هو مرّشح الأنتخابات الرّئاسية ! إتقول موش هوني ..و ما هو صاحب محنـــــــــــــة ...تطلعو كلبة من الكلب في نص الليـــــــــــــــــــل ...جاء إخبط على الباب ....- فيق يا قاسم ...يزي بلا نوم
- ما هو لاباس ....إش صار عليـــــــــــــــك
- إنحب إنولي رئيس بالجديات ...و نغلب بن علي
- يزي بلا دوّة فارغة ....كانك سكرت ...إتقول إنحب إنـــــــــولي و كانك ساحي إتخاف كي النعجة
- لا لا لا لا
...- تعرف كيفاش
...- إشنوه
- لازمك إتكون ديمه سكران
....- موش مشكل ...عندي قاجو ريكــــــــــــــــار ...خليني ديمه خابط ...ما نشّجع و ما نفهم الحكاية كان تحت المخدّر
- ميزانية كاملة .......‘ش قولك كان نهبطو لصفاقص تـــــــــوه ...إرّكحو الصّفاقصية ...و نخدمومهم - كلام رجال
نص الليل خرجنا لصفاقص ...كرهبة جيش ورانــــــــــا ..نحن تحت حماية الجيش التونسي ..ثلاثة دبابز ريكار ..الكرهبة تمشي بالمزوط و بوشيحة بالرّيكار ....فطرنا في الطريق !!!! و إرتحنا !!! عمل دوزتو ...دخلنا وسط المدينة السّبعة متع الصّباح ...ديريكت للجامعة ....مازال عندي برشة حبايبات في الجامعة وين قريت ...و جمهورية قاسم فيها برشة مواطنين من صفاقص ...ما قصّروش فرحو بينــــــــــــــــا ....بوشيحة إشلّم على الناس الكل ...و إقول : أحضر في بلاصتك ..ما تنساش الأنتخابات ....إختار بوشيحة ...مستقبل تونس ...بن على راهو تاريخ ما عاش ينفع ....كنــــــــــــّا واقفين في الساحة ...حارة و كعبة ..في لحضات ...إلتحقت بينا الطلبة الكل ...و سمعت الصّحافة ...و هبط الرّاديو ...و ثمة حتى تلفزة جات إتصّور ...و بطلب من رئيس جمهورية قاسم ..بدات الطلبة : بالرّوح بالدّم نفديك يا بوشيحة ..طلع الصّياح ...و كثر العياط ....بوشيحة يخرج من الجامعة على رأس قرابات الألف طالب ...و يعمل خطاب ::::: إنحبكّم ملفوفين ...كرابطي المعدنوس ...إنعمل عليكم باش نربح بن علي و التّجمع ....أنا باش نبعثو يقضي ...يزيه ما قعد و يزيه ما حكم ...راهو ما يعرفش لا إقتصاد و لا سياسية و لا ثقافة ...إختارو بوشيحة ...و بدى العياط ! و بدى التصفيق ...و الناس : بالرّوح بالدّم نفدبك يا بوشيحة
قاعة العمليات في دار التّجمع
:- إرنب و إتعض ...شوفتو أش عمل ...هذا ألي قلتو ما إنجّم يعمل حتى شيئ ..هاهي صفاقص كاملة ولات مع بوشيحة..
- لا لا لا يا راجل ...إش يفهم هذاك ..لا صفاقص معاه و لا حتى شيئ ..
- إشنوه ...معيز و لو طــــــــــــارو ....ألراجل عامل حملة إنتخابية ...كبيرة ...الأنترنات عباها بتصاورو ...بره شوف المدونات ...شوف الجرائد!!!! الرّأجل ناوي على الخمج ...عطينها باش يلعب دور صغير على قد قدو ...الرّأجل ...ولى غاير علينــــــــــــــــــا
- راهو مازال هابط ...الراجل لقابس ....قابش ضاعت ...باش نخصرو قابس ....كان موش الجنوب الكل
- إتصّفوه ...أحس...أنا قلتلكم ...إتصّفوه
- كيفاش باش إتصفي ..المرّّشح الثاني للرئاسة
- بطلنــــــــــــــــــــــــــ ـــا
....- إنكلّمو الرّئيس ..رئيس التجّمع ....إشوف حل ...لبوشيحة
قصر الرّئاسة
....- ألو ...سيدي الرّئيس
- إنعم .......بوشيحة ولى إعض
- اش تقصد
- صفاقص و قابس ...جاو معاه ...و عامل حملة كبيرة ...و إتزّهت تصاورو في الجنوب ...بدى
بالجنوب - إشنوه ...بوشيحة رئيس ..حلواشي هذه
- إش نعملو
- هاني هابط لمدنين ......توه إنقص عليه ..قصّة عربة ..لا إدور على جربة ...إهبطو الكل لمدنينمدنين ألكلها مرّبعات سود و بيّض صنعة الدّكتور النجــــــــــار .....التجّوع هبّط الطامة و العامة للعاصمة مدنين ...الرّئيس جاي ...إشكون هبطّ : التلامذة الصّغار ! شافوشي المرّبعات ...ولاو ..يلعبو في الكاري ...و دخلت بعضها ...لا أنا في الأسود ...لا إنت في الأبيض ...زين العابدين هبط من الهيلــــــــــــكوبتر ...و جاء الخبر : قفصة الكل خرجت ...عارضة بوشيحة ...جبدت بيه جبدة من ثمه ثمه ...يا ويلو قفصة إطيـــــــــــر و إلا تقعدلو جربة و بن قردان ما فيهومشي حتى 50 ألف ساكن ! إقول توه إنطيـــــــــــــــر للقصرين ...نسبق بوشيحة ....قعدو جماعة مدنين في الشايح ....يلعبو في الخربقة متع الدكتور النجار
قاسم قاسم

خــــــطة الأنقلاب على القيادات الشرّعية

النــــــــــــــادل 3


إنقلاب شبعة نوفمبر، كما في بالك ، التخطيط متاعو ما كانش في تونس ، و الفكرة جاء جينرال إطالي !!! و لكن ما إتشوفو الكل ، فرّخ إنقلابات صغيرة ...أخرها على الصّحافين !!! أش قال و أش قتلك ، المجلس المّوسع !!! إشكون وسّعو و إشكون زاد فيه ! وزير الدّأخلية و حزب التّجوع ! الناس هذاوم من عندي أنا : الشكارة و البحر. الخطة هذه متع الأنقلاب ألي باش نعملو على بوشيحة ، تونسي بحت ، صناعة وطنيّة ماية في الماية ...و زيد الرّأجل نسيبي و إشبيه عاد كان هزيتلو ساقيه ...و قدّاش من نسيب هز ساقين نســـيبو !!!! و قدّاش من ولد علّم بوه الشطيح و الرّديح .

فيلم ما فيهش الممثلين الكبار متع جمهورية قاسم ! يبقى ناقص !!! أنا طول عمري نكتب في الأكابر متع السياسية التونسية ...لاحظت بالي وليت نكتب في البزقليــــــــــف !!! إشنوه ألي يفهمو بوشيحة باش نخصر عليه الوقت هذا الكل ؟ و إلا الكاتب طاح ؟ يستحيل باش يسقط قاسم ! إلا أرضا برصاصة في ظهره !!! و رصاصة غادرة لأني ما إنضنش جندي تونسي قادر إهز عنيه في كاتب الخطوط هذه ...أنا كلامي رصاص !!! و القلم متاعي بـــــــــــارود اخر طيراز.

باش ، إتنجم إترّكح واحد و تقضي بيه قضيتك ! لا بد إنك تزرع فيه الخوف ...لازمك إتما طراكيه ! حتى يتهد جملة ...و قتها إتنجما إتغولو كمــــــــــا ، إتحب و تقضي بيه حاجتك !!! كيفاش عملت المافيا لبن علـــــــــــــــي ...الرّئيس الحالي ...رّكبلو الرّعب من الخوانجية ..أولا !!! حتى إنو ما عاش يرقد ..من بعد ..جابولو الفرنسيس للخصخصة متع الأقتصاد ...قضات المافيا حاجتها ! كما حبّت ...إتصخصخت البلاد بإسم الطرابلسية ..وإتسجلت في دفتر خانه كما حبو ...يا معامل ! يا تليكوم ..يا بنوك ..يا نقل ...يا ليسيايات و حتى جامعات ...عندي مايل جاني من صاحبي في سوسة ! إقول فيه بالي مدير الجامعة إبــــــــّطل في الكورات متع الطلبة لأنو كرى الصالة متع التدريس باش يعملو فيها عرس ...و لا إستاذ حل فمــــــــــــــــــو ..و لا طالب ...و لا ذبانة قالت لا!!! مافيا إمنظمة جات على البلاد الكل.

مرا ...ساعات خير من ألف راجل !!! نحكي على التوانسة ...إناثي و ذكوره !!!! على فكرة الذكوره نقصو في هاكي البــــــلاد : تافهة ولات بكتبّها بمدونينهـــــــــــــــــا و أكد على ذلك بفنينيها ..بموسيقتها ..بأفلامها ...بمخرجينها ..و حتى بصحافتها الموسّعة ...و ألي ما هوش عاجبو من المدّونين و ألا المخرجين و ألا الفنانين ...فاليتقدّم و يرفع يده ...فإني له لمبارز ....الفكرة هذه جات عبر تهديد صديقي الدكتور أحمد المناعي ، قال إتهدد فيه سيدّة من النهضة ، إنقولو نائبة في مجلس الشورة ...الفكرة هذه لازم باش نكتبها حتى إنها تتأرخ للأجيال القادمة !!

· ألو ..ألو ...ألو
· ألـــــــــــو ..على السلامة ...إشكون معايا
· رئيس الجمهوريّة معاك سي كريم ....أنا قاسم ..!
· أهلا بسي قاسم ....إشنوه حولك ...
· كي الكرموس ...قول كي الطماطم ...بلايص بلايص ...
· إبشـــــــــــــــر
· قداش عندي ما إسمعتهاش ...كلمة إبشر
· إن شاء الله خيـــــــر سي كريم ...وصلوك الجماعة
· أنا جماعة
· قافلة الختروشي ...جماعة العودة ...المباركة
· ما شوفت حد يا سي قاســــــــــــم
· إوصيك بيهم خيـــــــــــــــــرا ....و ما تجبدلهومشي على الموضوع ....
· كل حد حر ....متى إستعبدّتم الناس و قد ولدتهم أمهاتهم أحرار
· باهي ...كرّيّــــــــــــم ...توه عديلي ...الأنسة هند !!!!
· لحظة يا سي قاسم إتجيــــــــــك

هند الهاروني في الكوجينة ...قاسم إحب يحكي معاك

· خطاني من قاسم ....توه إفزّع علينا العباد الكّل ...و إترسيلك مرّة أخرى في الحبس
· برى شوفيه ...على ما يبدو ..عندو قضية
· حاضر

جات هند للتلفون

· ألــــــــــــــــــــــو ....على السلاّمة
· ألو ...أهلا ..و سهلا ....إشبيك كي الهلال ...تخرج كان في راس الشّهر
· و الله عندي قضيّه ...طلبيّة صغيّره باش إتقومي باها
· كان في مقدوري ...ما ثمّة حتى مانع
· هاهو التلفون متع بوشيحة ...إنسيبي ...إطلبيه ...على النيمرو هذا ..نص الليل بالضبط ...و إتقوليلو ...: يا راجل راهو عيب عليك ..باش إترّشح روحك ضد زين العابدين بن علي ، صاحب نعمتك ...و من الأحسن إنك تنسحب ...علاش إتقلّــق في روحك
· يا قاســـــــــــــــم ....خطاني من دبايرك ...أش عملتلك
· شوف يا هند ...أنا طلبت منك حاجى صغيرة ياسر ...براس العزيز عليك ...إعمل اش قتلك
· و الله كما إنكلّمــــــــــــو بكل أرياحية ...و نعطيه نصيحة ...كون هاني !!!
· تصبح على خيــــــــــــر
· تصبح على خير

وصلنالها ...إتعمل على مــــــــــــرا و ما إتعملّشي على راجل بشنباتو !!!! إشنوه فيها هذه ، حتى شيئ ...و الخطة ساهلة و بسيطة ..في الواقع ...صعيب باش الواحد يرفض لقاسم طلب. ..إلا واحد ما يفهمش لا ياسر لا شوية ...

مرتي الجديدة ...ساهره للبرّة ..مازال ما رّوحتش ...ما قلتلكمشي ..مانا حوّلنا ...ولينا نسكنو مع نسيبي الجديد ...عطينا الطاق الفوقاني ...و هو يسكن ألّوطة ..أنا خذيت الطابق الأول باش ما نسمعش الحس ..ناس داخلة خارجه عليه ...مرّشح للرئاسة ...و دولاب كبير ...في الواقع ساكن في شعبة ...التجّوعيــــــين ، هوما ألي يكتبولو في النصّوص و هوما ألي قايمين بيه من جميع و ما ...

فاق الصّباح ...يعمل في الرّياضة ...و شاد راسو ...شوفتو إمعصّبو ...إمشيتلـــــــــــــــــــــــــــو !

· صباح الخير يا نسيبي ...يا سي الرّئيس
· صباح الخير ...و الله عندي شوية إستراس
· ما هو لاباس
· موش لابــــــــــــــــــاس
· كلّمتني مرا البارح ..مع نص الليل ...قاتلي ...سيب عليك من التّرشح ...و راك إتضيع في وقتك ...موش عارف إشكون إتكون المرا هذه
· ما قتلك شيئ أخر ...هذا إسمّوه تهديد يا نسيبي الغالي
· أه أه أه
· هذا تهديد صحيح ....إدخل للدار ما تخرج ...في لغة السايسة ...هذا إسموه راسك في الفيزار ...أدخل لا يغتالوك ...هاذوم الخوانجية ...إهددو فيك
· يزي عــــــــــــــاد ...أه أه أه أه
· إما لا ...تلعب ...راهم صعاب ...و ما يلعبوش ...لا زمك حماية توه !!!!
· تطلب من وزير الداخلية ...أعوان ...دي قارد كــــــــــــــور مسلّحين
· وصلنا للشيئ هذا يا سي قاسم ...
· إنعم
· حرّاس ...لازمك حراس ...على الأقل خمسة ...وين إنت وين هموما ..و إلا راك باش إتموت....إسمع كلّم وزير الدفاع ...أحسن من وزير الداخلية ...يعثلك الجيش ...فيهم الثيقة أحسن
· أنا إنكّلم الرّئيس حـــــــــــــالا ....الزين بإدو ...توه ....يا إما يبعثلي الجيش يحميني ، يا إما ما عاش مترّشح
· إسمع ...قولــــــــــــــــــــــــــو ...جيش سيـــــــــــفيل ...ولاد صحاح ...أطلب خمسة ! أقل منهم لا
· و الله يا قاسم ....عندك برشة تكتيـــــــــــك...علاش ما تخدمشي معاي
· نطلب برشة فلوس ....ما إتنجمش إتخلصّني
· ...توه نطلب الزين ...يا يعطيني الفلوس ...يا ما ثماش ترّشح ....إش قولك إنعينك ! رئيس الحملة الأنتخابية
· هاذا هو الي حاجتي بيــــــــــــــــــــــــــه ...يا سيدي الرّئيس !!!
· الدّار إتسكّرها ....و كلب ما عاش يدخل ...كان ما إيجو الجيش ...الي قارد كور !!!
· حاضر

قاسم قاسم

النــــــــــــّــــــــــــــادل 2

في نص قميص عثمان ! كتبت جملة مفيدة ، إتقول : لآزمك تلعب باللّغة متاعهم ! تستعمل الخبث متاعهم ، و كان ألزم تستعمل السّحر و الشياطين ، هاذوم ناس الرّحمة لا !!! ياكلو في لحم التوانسة طايب و نيّ ..جنجاويد المال و البوفوار في تونس ، يلعبو في السياسية الوسخة ، قال شنوه ما إنجمهم ولا واحد ! و ما هيش باش إتهبط الدّكاترة و المهندسين من المستوى متاعهم ألي درجة معيّة ، يعني ألي درجة ممارسة السياسية بالطريقة التجّوّعية ...أرجعو و شفو نصوص المنصف المرزوقي و كيفاش إتكلّم معاه رئيس الدّولة في القصّر ...إرجعو و أقرو أش كتب الدكتور منصف المرزوقي وقت ألي حاصروه في سوسة ...و كيفاش بعثو وحدة كرّوسة ( تجديد اللّغة ) في جرّتو ، قال أشنوّه حب يغتصبها ...إقرو كيفاش سيبّو على الرّاجل عصابة من كلاب الشوارع ..تتفيسخ عليه و إتسب في أمو ...و إتعيطلو على أنو مهبول...حزب التجّوع هذا ...ماهوش قادر باش يحكي بلغة ديبلومسية لأنو ما يعرفهاش و ما عندوش كادر عندو الثيقة في روحو باش يتكّلم ...السلاح متاعو كان و باش إكون : لغة الشارع...لغة الخراديق ...لغة أفلام الجنس ألي إتوزع وزارة الدّاخلية و تنتج فيها في نفس الوقت ...مدير الأمن السياسي بنفسو إرّكب و إلصّق في تصاور خليعة ! و الحكاية هذه صارت مع السيدة الكريمة نزيهة رجيبة و السيدة الكريمة نادية شرشور حشيشة.

كالحوته ، النضام التونسي خامر راسو، يستحيل يصلح الجسم براس لا راس لا ساس! و لذلك لازم إنشيـــــــحو ....الحوت الخامر عند البحاره الكبار ..ما إطيشويش ! يحطلو برشه ملح و إشيحوه ...باش يسطادو بيه الحوت الأخر ....حوت ياكل حوت و قليل الجهد إموت ....إذا هيـــــــــــا بنا للصّيد.

بيق تراب بوي ! و لا فهم و لا نجّم يفهم ! كيفاش الفيتورة خلصت ! و خرج قاسم و المرا عندو ســــــــــلامات ! و لكن حصل ...يعرف واحد من المعارضة !!!! تهمه في تونس وقت ألي تعرف واحد من جماعة لا ..ديمه لا !!! و إلا تقرى جريدة معارضة ! و إلا إمشارك في جمعية بلا رخصة ...رّوح من الخدمة ، حل القراج ، حط الكرهبة ! و دخل للحانوت متاعـــــــــــــــو ...المدوّنه ...إش باش إدّون ؟ و الرّاجل وصّلاتو كرهبة البوليس السياسي قدّام الدّار ...يرعش خايف لا إباصي في جّرة رئيس جمهورية إفتراضية ما إتجي على بال كان واحد هزّ إيده من نخبة لا تندب لا إتشد الطفلة !

أش يكتب بيق تراب بواي في المدونة متاعو اليوم :

Énigmes.

و من بعد ما نجّمش يكتب حتى شيئ !!!! سكّر الكوميوتر و رقد ! عين محلولة و عين فايقة ...قادرين إيجيوه في أي وقت ...و بالزّهر ليلتها ما جاه حد ! باقي راهي خربت..فاق الصّباح كما العادة ...يلقى الكرهبة على العجل الأربعة ...إشكون جاء في الليل و بالموس حــــــــــــلّ الباب و عدى على العجل ...و زيد جّر عليها من الأجناب الزّوز ...و كانت كرهبة ! تهديد واضح من الأمن السياسي ...ما حبوش إمسوه هو في شخصو و لكن الكرهبة ميسالش ...بإشكون باش إقدّم قضّية ؟ بمدونة جمهورية قاسم. ألي عرفها فجّاة ...بالحاكم ..و الأنتخبات شادة بعضها ؟ بلع السيكة بدّمها ! و سكت و حتى على المدّونة الشخصية ما كتب شيئ ...الخوف يعمل الجوف...قعد في الدّار ما خرجش للخدمة ...

الصّباح يا فتاح يا رزّاق ...فاقت المرا الجديدة عندي من الثّمنة متاعها ! ليل و ما إطولو و هي إترّد ...صباحها كي وجهــــــــــــــا !!! و لكن إش نعمل وقت الخّطة مربوطة بيهـــــــــــــا ...ألصّبر ...كي تبدى عندك مـــــرا تسكر كما الي عندي لازمك تصبر حتى تقضي قضيتك ...لا صباح لا رباح

· وين باش إنعدو شهر العسل ؟
· مازل ما فقتش ....يرحم والديك ...هابني !!!!
· لا توه إتفيق ...إتقولي وين ماشيــــــــــين...لشهر العسل ...بابا يستنى فينا !
· علاش يستنى ...يا خي ماشي معانا ...علاش ...
· لا لا
· فاش يستنى ...ماهوش باش يترّشح للرّئاسة ...وين ماشي !!!
· يستنى في البلاد ..باش يعطينـــــــــــــا شوه فلوس ...قداش لازما
· عشرين مليون على الأقل !!! موش ياسر لبنت مرّشح الرّئاسة التونسية !!!
· عندو ...نعرف بالي عندو ...أمس صبولو الفلوس متع الحملة الأنتخابية !!!
· إزرم جيبهم ...هاني نستنى فيك
· لا لا نمشيو مع بعضنـــــــــــــــــــــــــا ...إشبيك و كأنك حاب تتخلّص مني!!!
· لا يا عزيزتي ...
· بالحاق ...عزيزتاك ....إتحبني يا قاسم
· و الله إنحبك ...و إحبها ...و يحب ناقتها بعيــــــــــري ...تعرف يا بنت الناس ! إتحبش إتولي السيّدة الأولى في تونس ...و إتعدي شهر العسل في قصر قرطاج !
· وه ..وه ...و إشكون ما إتحبش ...إتولي ..ليلى الطرابلسي ..على الأقل أنا عندي الباك و المتريـــــــــــــــز و عاملة ...إسكريبسيون في المرحلة الثالاثة
· إشنوه ألي قريتـــــــــــــــــه ؟
· أنا قراية ...في البوزار .....إختصاص ....ديزاين إنتريـــــــــــر ...أما قولي كيفاش باش إترجعني ...السّيدة الأولى متع تونس ...فكرة باهية
· أولا ...لازمك إتنفذي الأوامر ...حرفا حرفا ...
· ألي إتقولو يا راجلي ...يمشي ...إنت الموس و انا السّكين
· أول شيئ تعمليه ...إتبطلي الشراب ...البسباس ما عاش إنحب ريحتو !!!
· حاضر ...إشنوه ..أخر ...كيفاش باش تعمل
· إنقلاب صغرون على بـــــــــــــــــــوك ...
· أوه ..أوه ..إش عندو هذاك
· إسمع الدّوه و نفّــــــــــذي ....ألي إنقولو انا ...إنت قولي صحيح
· متّفقين
· لازمك تمشي ...بتؤدة ...كأي سيدة أولى متع بلاد ..ما تنسيش شهر العسل متاعك راهو باش إكون في قرطاج
· أنا عليسة ....إخدم خدمكتك


إتكسمت كمــــــــا يلزم ، نهار الصّباح متاعي ، لازمني نشري القاطو ...و نشري قادو لزوجتي الجديدة ..ألي مازال ما جرّبتهاش ..و ما نيش باش إنجرّبها أبدا ...فساد الأسونس ما إنحبوش بطبيعتي ...ركبنا في كرهبة المــــــــرا : بي أم حمراء ، إتقربع و قلتلها ...إندهي ..ما شين عند السرفار ...الي سربانـــــــــــــا البارح ، تعرفو الولد هذاك ...إشمو بيق تراب بوي...خرجة الكرهبة كالطشاشة في طريقهـــــــــــــا للسّيد النادل ..

وقفنا قدّام الدّار ...عملت كلاكسن ...و لا خرج واحد من الّدار...الكل خايفين ! بيق تراب بوي ...راهو دخل تحت السّرير ...وقت ألي ما خرج و لا بشر ..نزلت و ظربت الناقوس ...قولو عشرة مرّات ..باش خرج سي المّدّون من الغار متاعـــــــــــــــو ...

· ماعش إدور بيّ ...إقلب من هوني
· في طولك ...في عرضك ....ما إتخافش
· راهو نستعمل معاك ...لغة أخرى ...
· إتهدد في قاسم ....مازال ما جابتكشي أمّك ...إطلع في الكرهبة حاجتي بيك
· فوّكني ...جرّتك ملح
· أطلع ....الكرهبة هذه الحمراء ...من اليوم متاعك ...هدّية بمناسة العرس متاعي
· إشنوه ....هذا يعني ...إنت ألي نقبت العجل البارح ...
· أه
· وصّلني ....و أرجع بالكرهبة ...ترجع تخدم في نفس البلاصة ...
· حاضر

طلع بيق تراب بوي ...إطمان في الكرهبة ...و رجعلو شاهد العقل ...ما إبعدناش ياسر على دارهم ...خذيت أنا و المرا تــــــــــــــــــــــــاكسي ...و رجع بيق تراب بوي ..بالكرهبة ...ألوّح في الماية و العشرين

في طريقنـــــــــــــــا ...ألي نسيبي العزيز ...بوشيحة المرّشح لرئاسة الجمهورية التونسية .


قاسم قسام
.

بيق تراب بـــــــــــوي في النــــــــــــّــــــــــــــادل

بــــطولة
بيق تراب بوي، قاسم ، مريم ، بوشيحة
و بعض الأخرين

الصّوف يتباع بالرّزانة

اللّغز توه يتحـــــــــــــــل !

الحلقة الأولى
جمهورية قاسم تقدّم
الأنتخابات الرّئاسية 2009



البنية كبرت يا سي قاسم و لازمني نتهنى عليها ...تعرف الي البلاد قريب باش إتولي ديمقراطية و كل شيئ يوظاح فيها و في الوقت هذاك ما عاش عندي حل اخر كان باش نستقيل لأنو الحزب متاعي إيجه التمويل من الحكومة ذاتها. قتلو أشبيك خايف يا سي رئيس حزب الأنترناتيف الديمقراطي؟ قالي تي سيب عليك يا قاسم تي الحكاية عاملها كان بش إندبر راسي و نعمل جوقة في الفارغ ...يا قسومة في الواقع أنا ما عملت شيئ تي هوما جابوني و أعطوني الفلوس الكل باش إرشح روحي لرأسة الجمهورية.

و لكن حسب من إنشوف الحزب هذا ما عاد يصلح لحتى لشيئ كان باش إنسكرو لكن قلت و أنا إنسكر في الحانوت ما ظابيا نتهنى على البنية عندي مريومة ...قارية شوية ديمقراطية و تعرف تكتب في المجلات و الجرائد متع الحكومة و إتحب إتجرب روحها في الحكاية ...با خي قاتلها رودي بالك تدخلي السياسة و أنت مازلت عازبة لأنو الجماعة تو إيدورو بيك ...هاك علاش جيتك يا سي قاسم باش تعطيني فكرتك..أش قولك في الموضوع.

قتلو يا بابا إنت قصد الدار الكبيرة و حتى كانك عرضت علي وحدة أخرى مش البنية عندك و الله ما نرجع التالي ...كي هيّ كي غيرها و الأقربون أولى بالمعروف...و ما عندك كان الرجال ...إتحب تعمل السياسة أحنا في هاكه الصّردوك إرّيشو و إتحب إتشّد دارها تتفضل.

يا سي قاسم و الله ما كنت نعرف الي إنت مش متزوج ؟ و الله في الواقع أنا متزوج بزينب و لكن عاملين كتب ما بيناتنا إنقول فيه الي قاسم عندو الحق في العرس متى وجب ذلك لتوحيد القبائل و الشيئ هذا موش غريب على الدين الأسلامي و لا على الدكتاتورية متعنا ...شوف الأعراس السياسة قداش منها ...و شوف كيفاش العائلات متع المافيا إتبدل قصة بقصة ( مرا ب مرا ) و إتبدل حتى في النساء باش إتحافظ على نسل الديكتاتورية و إتحافظ على مصالح البلاد.

في كل بلاسطة تلقى وحّيد منهم و إلا أنسيبهم ...يا سيدي إنسيب و لا بن عم قريب . و باش نسترجل معاك قلت علاش ناخو بخاطرك ...و إتكون إنت رابح و أنا رابح و البنية رابحة ...يا خي باش تلقى ما خير مني : راجل عندو طيارة ...كل ليلة في بلاصة و وين إيطيح الليل إيبات.

· يا سي قاسم ما لا مبروك عليك ....إنت السكين و إحنا اللحم
· قطّع كما إتحب
· إشنوه نبداو بالتقطيع ؟ لا يا بابا أنا ما إنمس حتى شيئ كان على سنة الله و الرسول
· هات إيديك نقرو الفاتحة : بسم الله الرحمان الرحيم .....أمين.

يا سيدي كل شيئ بالبركة و ربي أنشاء الله إهنيك. قتلو ما لا خرجت منها توه : خليني نتصرف في البنية و ما تبعها من حزب و من برامج: قالي مريم وصلتك و الحزب إنت حر فية. أنا إنموت على الجوّ ...
الحزب تو إنشوفولو أومرو و مريــــــم الماء الي ماشي للديمقراطية الغالطة جمهورية قاسم أولى به. قوتلو القضية وصلت و توه بالسلامة....برى بابا إشوف التقاعد متاعك و أشرب كاس تاي مع العزوز....و زيد فكّر شوية في حكاية التّرّشخ ضد بن علي 2009! ....همهم الرّأجل ...و زي ألي ما عجبتوش الحكاية ...إرجع و قال :

· خبزة يا سي قاسم ...جاتني للدّار ..إنسلّم فيها ...إفيّّم ساهل من لحي الرّجال الشّكارة و البحر الشعب و ما تابعو ...مستقبلي و مستقبل عائلتي قبل كل شيئ إش إهمني فيهم ! لا ترحم كلب ....مترّشح للرئاسة ...و إرّبح بن علي : شماتة فيكم ...شماته في دين ولديكم الكّل ...شماته فيكم يا خونه ...

خلاّني و فصع ....يضحك ..هاكي الضحكة الصّفراء متع الحشايات ...جاء يتمسكن ! حشالي قطوس في شكارة ...و قلب ....و قدّاش من مرّة تتعدى عليّ !!!! و لا تشعف يا ولد زينب...دغروني يا زينب للمّــــــــــــرّة الألف ...

· باهي ...صحة و فرحة ...



باش نتعرفو على العروسة ...و إنقدمكم المرا متع الخمسة شهر الجايات. أنا بصراحة إنقولهلكم ما إنحبش قطوس في شكارة : لازمني إنشوف السلعة و إنثبت في كل شيئ قبل لا نرمي الأبرة في الخيط ...حتى و لو كان زواج سياسي و المرا تمّن بالدمقراطية.

توه إنشوف أنا ديمقراطية و أنا حرية عندها. ما تعرفو المرا مرا و الراجل راجل كانت من النساء الديمقراطيات و إلا من النساء المتربصات ...هذا مستقبل عمرو الواحد إحط ساقيه كان وين إيصيبها و ما إدخل لدارو كان القمح و الشعير.

يا سيدي لبست الكاستيم متعي كالعادة ...حطيت شوه بارفان باش إندوخها من الظربة لولة و الباقي الكل ساهل. المرا كان ما تركحش في الساعة لولة متع المقابلة إنوصيكم ما عاش إتحاول يا صحوبة ...كل شيئ إيجي بالسيف كان الشيئ هذا راهو بالكيف ...و يا ربي بديت نوصل للقهوة الي أعطيتها فيها الرندفو...قلبي على الحزب قبل مريم و لكن أنا إنموت الجمـــــال و الزين ..موش زين العابدين ...الزّين في معنى السّماحة و الطول ...و الخد و الرّقبة جمّار.... و كان تطلع قردة نهارها مشوم هي و باباها و الديمقراطين الكل...و الوحدة الشعبيّة و كل من هب و دب و قال نترّشح لأنتخابات وذني.....

يا سيدي دخلت القهوة متع الجماعة هاذوكم الي تعرفوهم ...وين القهوة بدينارين و كاس العصير بأربعة ...نحكيلكم على القهاوي الغير شعبية الي مجعولة لأولادهم بصاحباتهم و لصاحبات صحباتهم ...السياسة راهي فلوس و الجماعة هاذوما عندهم قهاويهم و عندهم قعداتهم و عندهم جّوهم ...سمسارة ...عارفها تكسيرة جيتني في الثنية و لكن يا جماعة عندي شوق أكبر مني و هازني بين هواء و فظاء للمرا الجديد...يا جماعة عارف القهوة ما هيش باش تعجبني من غلاها و من القعورة الي قاعدين فيها الي ما يحكو إلا على اخر سيارة شراوها و على البنية الي باش إطيح الليلة....قهاوي الخبث و السّفالة...قهاوي التلفزة التونسية ...قهاوي مكتوب ...قهاوي الرّخص الأنساني.

دخلت ...قعد ...شديد تركينة ...الدنيا ظلام ما إتشوف شيئ ...القهوة متع ركشات و متع إتبزنيس و متع حتى الزطلة و أنا عندي خواطري ظيقة ...أقل رائحة إرد. جاء السّرفار : ولد مش بطّال متكستم ...و قالي إتفظل يا سي المدير ...أش تشرب : سمالي تسميات حتى في نيويورك ما إسمعتش بيها...قتلو سهلها يا صحوبة وأعطيني حاجة تنشرب مثلا : قهوة كابوسن ...ديويو ...ديويو ما ثماش ...اللعب كان في الكبير : إتحبش ويسكي ...ريكار...بوخا حتى البيرة ما ثماش.

طلبت دبوزة ماء و عصير برتقال... المهم الكومند لازمها توصل عشرة دينارات ...أرخص شيئ كانت الكماندا متاعي...توه المرا مازلت ما جاتش و انا بديت نقلق وإنفد من ها القهوة. يا خي أشبيها المرا ما أختارت كان القهوة هذي ...بالك متعودة بالبلاصة المعوّجة هذه ... و بالك ما تشري كان الغالي ...يا صحوبة عارفها تكسيره و بديت نحسب باش المرا تخو حاجة رخيصة و ما إترسليش في المركز متع العوينـــــــة....

و الله و الله قهوة يا جماعة ...دنيا إتموج و تعوم و قطايع كي البطاطة ...من كل بر ...ساعات إنقول الشيئ هذا منين جاء ...حتى في المكسيك ما شفتوش. الواحدة تقول أرخة ...تمشي ...تزعبن ...تتمنيك ..تجرح العيون. يا رسول الله .... ...الكراهب الي إنشوف فيها من الشباك و كانك في إسكوير ستريت في قلب نيويورك. الهامر و المرسداس و الطويوطا كي البطاطة...أنا خايف لا المرا إتجي في كرهبة أخر مديل و إلا أتجيني بصاحبها ديريكت. عندهم يا جماعة الحكاية نورمال ...تي أكثر من ألمانيا و السويد....قافز الشباب التونسي ياسر ...قفزة نوفمبرية ألتالي ...حداثة ..تظرب تعمي..جهلوت بكل الحقائق ...شباب زاطل و لا يتعمل عليه ..

يا رسوله المرا مازال ما جاتش و أنا معاش صابر و الصبر إيجبه ربي ...هذه من توه بدات إتوخر ما لا كيفاش من بعد؟ شعلت سبسي عربي مبروم كما جماعة لندن.... غادى في لندرة إلكلها تبرم، الأنقليز فقراء ما عندهومشي فلوس كما التوانسة هاذوم راهو عجب ربي العالمين ...وقت لي نبرم سيبسي إتشيخلي و نذكر الأيمات في لندن و الميترو متاعها. نبرم في الدّخان من الغلاء متاعو ..راهو ب10 دولارات الباكو ! موش لعب ...طحنا للدخان الرّخيص ..لا أكثر و لا أقل...إنقليـــز ...يا صحوبة ...لندرة !


سكرت عيوني و بديت إنعوم في مدينة الضباب ...يا جماعة لنقليز ما أسهلهم و ما أبسطهم شعب ...لاحظت الي الناس الكل في لندن تثاوب ...الناس الكل حالة إفامها في الصباح و في العشوه كيف كيف ...الناس في المدينة هذيك ناقصة نوم ...الناس تخدم اكثر ما ترقد ...هاك علاش البلاد لباس عليها ...عندنا الناس الكل إتفيق ناشطة من النوم.... التوانسة بخلاء ...جماعة خرجة و دزان نحو و لا علاقة لهم بالعمل و المثابرة....جماعة ركشة ...هاهو خذى غمضة ...التوانسة مازالو إقيلــــــو ...تعسيلة !! يا ربي ...إنسيتها القايلة من إتفارقت أنا و هاكي الجنّة متع زين العابدين.

الي يعمل في حاجة صغيرة صغيرة إرد روحة طيارة كبيرة و بلا بيه البلاد تحبس...البلاد إلكلها ولات مديرين و رؤساء شعب و مفكرين و الحكاية ما ثم شيئ الخدامة معادش عندها ...إلكلها إطـّــــبل من شمالها لجنوبها و إتهز في القفة و إتحب العيشة الرخيصة و بالساهل...ناس إتعيش من ظهور بعضها ...كريدي ...خطفة ...تلهميق في كل شيئ !!!!! ما تتقارنو بحتى شعب في العالم


كي حليت عيوني نلقى في وجهي مرا واقفة 1.86 م ، شنوه قد !!!! و شنوه زين و شنوه جمال ...بديت إنشهد و نقرى في أيات الكرسي ...أرلانا موتي في أيمتها ...و هي تمشي على الشـــــــّط . يا صحوبة هذه الديمقراطية و إلا لوح ...ديمقراطية متع ثمه ثمه ...و الله كادر أش يخلق و أش إحسن في خلقو : إستغفر الله كان ما جيتش في قهوة يا جماعة كما إنسيّل الدم. عجزت على الكلام ...إتبكشت كلمة ما نجمتش إنقولها ...وأه ما نجمتش تخرج من حلقي ...أنا هملت متع شكسبير ...المرا عندي يا جماعة إتهبل الي ما عمرو هبل و لا عمرو إتصور روحو يهبل....

الله غفور رحيم و لازمني باش إنشد ليكيليبر متاعي و ندهن القرجومة حتى تسرّح و تنطق بالجملة المفيدة و الكلمة ولات بحسابها لا العصفور إيطير و إيطير معاه راسي يا بيق تراب بــــــــــوي : يا سارفير مشي إوحد ركار حلال ...... جابو و جاء يجري في كاس طويل و معاه زوز قلاس مازالو يطرشقو.

بسباس يا بابا كزيت الزيتونة ...لونو الأصفر ذكرني بأيمات قاسم من مغامرة لمغامرة و السباحة في الثلاثة متع الصباح و ما إنكمل السهرية كان في برليــــــن الغربية جبدة من مدريد لألمانيا في جرة ليلة بالبسباس. ربي يغفر و لكن صاحبة الشر هذه رجعتني 15 سنة لتالي ...هزّيت الكاس ...ما نجمتش نشرب وقت الي شوفت المرا إتشوفلي و ترقص في الكاس...إذكر يا صحوبة كليب هوني وسطن وقت الي هي تغني و البيانسيت حاط الكاس متاعو على البيانو ...ثم مرا ترقص في وسط الكاس ...اه يا أمريكا أش عملتي في قسومة.....الشفطة بكاس و الركزة بألف دولار ...نحكيلك على أيماتي في لوس أنجلوس...و كعبة مع زينب المكسيكية ...إتهبل بيق تراب بوي و جماعتو...وين ناخو شفطة من الريكار إنضيع و ما نرجع للواقع مع المرا الجديدة كان بين الرمشة و الرمشة.

أش قلت يا صحوبة ...إنسيت نكتب ...و إتعديت في الطويل ...باش باش نبدى المرا بالحديث على الحزب الي موديرو بابها و إلا على تيتانيك و إلا على الديمقراطية و إلا كيفاش يبدو...إنسيت يا صحوبة كيفاش تتعاملو مع النساء التوانسة و خاصة كي تكون قنبلة كما هذي. إنسيت الفلسفة متعكم و نسيت الي أنأ موجود في تونس ...يا ربي كيف نعمل و المرا إتشوفلي و تتبسم ...عينها تتكلم و إتقول أحكي يا قاسم...علاش باش نحكي ...يا صحوبة علاش؟ على الحب الي ما عاش منو...كي العادة سكرت عيوني و قلت الأبيات هذي:

يا هرما يباع و يشترى !!!!
هل جئت ؟
أم جيئ بك لسوق الأناث على أنه الملتقى؟

لم تفهم شيئا و توجهت حالا إلى...تنفست الصعداء عندما غادرت المجلس ...أخذت نفسا طويلا و أكملت ما بكأسي و هممت بالرحيل. رجعت صاخبة بيديها كأسان من الريكار ...كانت رائحة البسباس قد عمت جميع القاعة و كأني دخلت في عالم النساء الديمقراطيات. أنستي متعودة على البسباس و التجين....أصلها متعّودة يعني.

هاذي المرا و إلا لوح ..المرا عندي تســــــــــــكر .... هذه هي الديمقراطية و إلا لوح و بوها حاب إوحلي وحدة ما تسحاش و الريكار يا جماعة بخمسة و عشرين دينار الدوزة.....موش الدّبوزة ....التكّسيرة باش إتولي تكّسيرتين و السّكرة سكرتين ...و تيتانيك ما عاد إطير كان بالستوك متع شراب....إستر يا ستار....مرا و تشرب !!!! هذه ما جاتنيــــــش على البال ...و زيد إدّخن !!!! و جات في راسي ...تزطلشي المرا هذه؟ و إتزطلني معاها ...و أنا زاطل من رّبي ...

جابت الزّوز ريكار ! و قعدت ..و أنا عيوني وليت إنحل فيهم بالسيف ...الكاس ألآول هبّلني ...دّوخني ..ما عاد فيّ حتى عضم صحيح ...إرتخيــــــــــــــت ...سكرت خيط !

· إشنوه سي قاسم ...عجيبتك ؟
· إشنوه عجبتــــــــــــــني ...زيك ما ثماش ...مرا و نص !!!؟
· إشنوه برنامجك ....؟
· الفاتحة قرينــــــــــــــــها ...و مازال ...كان الواحد باش إسيّل الدّم
· يا خي ذبيحـــــــــــــــــه ...؟؟؟؟؟
· نستعمل في ألفاظ مجازية ....للسنّمــــــــــــــا ...
· برنامجك ....!!!
· أش تقصدي ...برنامج اش ؟ و اللّه ما فهمت ...أش تقصدي !!!!؟
· شهر العســــــــــل ؟ وين باش إنعدوه !!!
· إنت في بالي تعرفيه العســــــــــــــــــل ؟
· أش تقصد ؟
· العسل ...الحّر ...تعرفيه و إلا لا ؟
· نعرفو بالطبيعة ....لكن وين باش إنعدو شهر العسل ؟
· إختاري بـــــــــــــــــــــــلاد!!!!
· إش قولك سي قاسم ...إنعدوه في ميامي و إلا هاوي
· وين إيجـــــــــــــو ؟ عندك فلوس !!!!
· كيفاش ؟ راك واخو بنت المّرشح الأول لرئاسة الجمهورية ، كان ما في علمكشي
· زعمة بالجديات ......باش يترّشّح ...و إلا شارينو الطرابلسية ؟
· فيها بيعة و شرية ...و لكن راهو مترّشح دوستوريـــــــــــــــــــــــا !!!!
· الرّبح ماهوش باش يربح ...
· ما يلعبشي على الرّبح ...الفلوس الي عطاوهملـــــــــــــو ...موش متع ربح !!! هكاكه و بره ...غير باش إقولو ..هونا عندنا ديمقراطية في تونس
· معناتها بوك ...كلينكس ...يمسحو بيه في الطواول !!!
· أيه ما إتقولش هكه على بابا ....بابا راجل ...و نص
· لا ما قلت شيئ أنا ....أيا وين إتحبي إتعدي راس العام
· شهر العسل موش راس العام ّّّ
· سامحني غــــــــــــــــالط ....مازال ما نيش إمصّدق ألي أنا قريت الفاتحة متاعك !
· و اللّه حتى أنا موش مصّدقة روحي ألي باش عرّست و إتهنيت و باش إنعدي شهر العسل في كاليفورنيـــــــــــــــــــــــــا
· زاده ...نقّزتي غادي خلاص ....




بيق تراب بوي ، نادل المقهى ، جاء متعدي بحذى الطاولة ، وقفت و إمشيتلو باش إنشوف الحسبة ...المرا وصلت للكاس الخامس ريكار ...

· قداش وصلت الحسبة يا بيق تراب بوي
· عندكم ...125 و 25 و 10 ما غير السرفيس
· أنا قدّاش عندي ...و السرفيس جديد عندكم في تونس
· شوف ...هنا يا تدفع ...يا تاكل طريحة و تتفك الكرهبة ...و إتباصي
· باش ندفع ...لكن ...عندكم راهو غلاء و كوا ...حتى في أمريكا الأسوام هذه ما ثماش
· هنا تونس ...و أعرف عند إشكون قاعد ...راك في بار متع المافيا الكبيرة
· إسمع
· إشنوه ....ما عنديش وقت ...عرفي ..إراقب فيّ ..ها توه نرجعلك !

رجعت لبلاسطي ...لقيت المرا سكرانة خيـــــــــط و ألي متعدي تعطيه بوصه ! لإتوزع في البوص على الشّمال و اليمين ...و ما أكثرها إملقطّة هاكي البلاد ! بلاد معقدّة جنســــــــــياّ ...أي شديتها من يدّها و قلتها ...يا تقعد و إتريض ! يا إطلقك توه ...لا حلّت لا ربط ...تركزلي ...إطلق ...راهو ..عندي كي صبلي نشرب ! قاتلي ! لا ما تحسبهاش حاجة و إلا حاجة ...هاذوكم صحابي ....كيفاش صحابك بالبوص و إنت مــــــــــــرا حرمة ....و الله ديمقراطية عندك ....و الله قفزة ...إشبيك كي صحفة اللّبلابي ....ألي جاي إذوق ...أه...لم روحك ...الدّوه هذه ما عاش إنحبّها !

إسترجلت المـــــــــرا و حطت ساق على ساق ...و بان كل شيئ و الناس تخزر ! إتقول ...ما شافوش الشيئ في حياتهم : ...و الله و الله ما إجنّنوه : صدق الجريدي و قت ألي قال : الخرا حشاكم وحدي و لا العسل مع الناس ...و زيد مع التوانسة !!!

· قدّاش عنك فلوس باش إنخلصّو ...و نخرجو
· ما عنديش ...حتى فرنك ...
· وينهم فلوس ...التّرشح متع السيد الوالد ...ما هو عطيــنو ماية مليون !
· صرفهم ...بابا راهو مصارفي ...و الطايح عندو مرفوع ...و عندو حتى مرا أخرى ...يصرف عليها ...و سهريات ...و سكرات
· زيد ...إتقرّعي ...أحكلي ..وين يمشي ..
· يمشي للحّمامات كل ليلة ....و يمشي يسهر في مع المدّلكات !!!!
· شنوهّ
· موضة جديدة في تونس ...للناس القافزة ...قالك تدليك ...
· فهمت ....يزي ...توه كيفاش عملنا ...في الفلوس ...كيفاش باش إنخلصّو
· ما نعرفش
· إسمع ...ما تتحرّكشي من بلاصتك ...هاني جاي


بيق تراب بوي ...واقف يد على الكونتيوار ..و يد فيها الصّحن ...عينيه باش تخرج منو !!! حتى هو إمرّشح ...ما يخدم كان بالرّكـــــــــــــــار ...ريحتو بكلّها بسباس !!!!

· شوف ...إنت ولد ناس ملاح ...و خليك فاهم !
· ما عنديش فلوس ..باش إنخلّص ...الليلة ...خلّص إنت ...و أنا إنجيلك متاعك غدوه
· هذا ..موش كلام سي قاسم ...نخلص تّوه ....و إلا هات مفاتح الكرهبة !!!
· في طولك في عرضك ...ما كنتش نعرف ألي الحكاية باش تطلع قارصة
· شوف ...قاسم ...تروب بون ...تروب كون ( بالفرنسوية)
· إش معناتها ؟
· معنـــــــــــــاتها باش تتحمل مسؤوليتك ...العرف يتصّرف معاك ؟
· إشكون عرفك ؟
· الطرابلسيــــــــــــــــــــــّة
· برى قلو .........ثمه كليون باندي ....ماهوش باش إخلّص ..و بالحرام لا خلّصتها ....لا إنت و لآ هو ...إسمع و زيد قولو ....إيجب معاه المليح
· إمثبت يا قاسم
· إخدم خدمتك .......بيك و إلا بلا بيك ...قاسم ..حال فيها إمرّمة الليلة
· أخطاني ...راهم إطردوني
· خلي إطردوك ..........تخدم عندي

وأحنا نتناقشو ...و إنصيحو و إنعيطو ...جاء واحد من الطرابلسية ...؟!!! إهز في أكتافو

· إشبيه هذا
· ما عندوش باش إخلّص ....( بيق تراب بوي)
· إشنوه ...ما عندوش ...مفاتح الكرهبة ...أطلع بيهم ....( الطرابلسي )
· لا ( قاسم)
· باندي سيادتك ( طرابلسي )
· و نص ...و كان عجبك ....( قاسم )
· لحضة ..........( الطرابلسي )

مشى لبيق تراب بــــــــــــوي و خلاّني وحدي ...

· إشكوننو .....هذا ؟
· قاسم ........متع جمهورية قاسم ...من المعارضين ...إقول هكه !!!!
· باهي .....برّه أخدم على روحك ....

الطرابلسي يعمل في تلفون

· إيجي ...هز عليّ ها الجرثومة ...معارضة جعانة ...إتحب تاكل بوبلاش
· لحضة وحدة ...و رئيس فرقة الأمن السياسي إجيك ...

علّق التّلـــــــفون ...و جاء للطاولة !!!! قابلني ...

· هاك ماشي للحبس ...توه إتخلص غادي ثاني و إمثلث ...باندي !!!! حاسب روحك
· باندي و نص ...إقلب وجهك من قدامي ...فاهم !!!!
· و إتعيط زاده
· طا قوـــــــــــــــــــل ....

دخل مدير الأمن السياسي ...و قعد حذى الطرابلسي ...حدذى عرفو !!!

· معارض سيادتك
· و نص
· بطاقة التعريف ....
· ما عنديش ...موش عاطي ...
· إش إتحب بالــــــــــــــــضبط .......إشنية المشكلة ....سامحنا يا طرابلسي ..بره إخدم على روحك ..

بعد ولد الطرابلسيّة ...و مشى !!!!

· قدّمت المــــــــــرا عندي ..بنت الأستاذ بوشيحة ...المرّشح للرّئاسة !!!
· إشنوه !!!!
· إه ...بنت بوشيحة ...كاملة ...بوها مترّشح ضد بن علي ...و ما ثمه حتى واحد قادر إقوم مقامـــــــــــــــــو ...باش إتعدو السناريو متاعكم ...الأنتخبات مازال عليها ..3 أسابيع ...و كان حاب إتبعبصها ...خليها تتبعبص
· إش معناتها !!!
· إتخلص الفيتـــــــــــــــــــورة حالا ...و إلا نتعو للي بعدك ...بوشيحة إنقولو يجبد الترّشح متاعو حــــــــــــلا ...و إخلي زين العابدين يرقص وحدو ..
· لحضة وحدة

وقت مدير الأمن السايسي ...و نادى على النـــــــــــــــأدل ...جاء بيق تراب بوي

· هات الفيتورة !!!
· هاهو متعك .........و أخدم على روحك !!!!
· إنت خلّصت ...في بلاسطو
· أش دخلك
· سامحني

رجع ....مدير الأمن السياسي ....

· تصبح على خيــــــــــــــر سي قاسم ....و نقصّ مشاكل !!!!


kacem kacem