27‏/10‏/2008

حانوت مسّكر و لا تدوينة مشومة


***

التونسي بطبيعتو نفـــــــــــاّح، و المدّون التونسي كيف كيف ، إتجيه نفحة أيمات و من بعد إطير و إهز ربي كل شيئ ! علاش ؟ إقول القائل الشيئ نعرفوه و إتسّكرت حتى مواقع كبيرة و نذكر مثلا الفّروم متع تونزين و الفّروم متع نواة و ربّما برشة أخرين أنا ما نعرفهومشي ...المّدّونات و المدّونين إمرّو بنفس الأشكالية ، الأنقطاع أولا و الفراغ ثانيــــــا ...وقت الي المدّون ما عندو ما يكتب يبدى إبلبز و إلا يكتب حاجة ما تستحقش إنو الواحد إضيع فيها الوقت ...هنا إنقولو ..حانوت مسّكر و لا تدوينة مشومة

المّدّون التونسي ما يقراش ياسر !!! لأنك باش تكتب لازمك عشرة مرّات قراية على قد ألي باش تكتبـــــــــــــــو ...المدّون كتونسي بطبيعتـــــــــــو نرفوزي ...من عنبة يسكر ! و من كف صحيح يسقط أرضا و يلقي بالمنديل ...الكتابة ، يعني التدّوين ما إنجّمش إكون هواية !! لا أبدا !! بل و أوكد قضّية كاملة ...عندها هدف دقيق و معين في نفس الوقت ...كونبـــــــــــا صحيحة لا جدال فيها ...إمالا إنقولو للجماعة ألي مازال ما علّقوش الصّباط ...عندكم نفس طويل و ألا ؟ ما عندكشي هذا ...راك باش تقعد إتحل و أتسّكر ...و حل الصّرة تلقى خيط.

المدّونات التونسية طاحت في مؤامرة صحيحة ، و تعدّات على المدّونين قصّة عمّار ! و زّمارة عمّار و شدو في حاجة يستخايلوها باش إتحل مشكلة طبيعة التدّوين و المستوى متع التدّوينة و عملّية الأشعاع متاعها ...عّمار هذا كان نحّاوه المدّونين من روسهم ...و كتبـــــــــو ما يجب أن يكتب راهم ربحو الوقت و ربحو شوية في الطريق ! و لكن حصلو في الخرته ألي إتنصبتلهم باش يقعدو إدورو في حلقة فارغة !!! و علاش المدّونة هذيك إسكّرت و علاش الأخرى مازالت محلولة ...إنا نفهم حاجة وحدة ! إتسكّرت ...المدّونة ...إتحرقت ...شعلت فيها النّار ..حل وحدة جديدة ...العالم هذا يجري بسرعة البرق ...و المدّونين التوانسة ما نجموش يعملو و لا خطوة تنظيمية ألي الأمام ؟ ...فاش يستنـــــــــــــــو ؟

النفحة حاجة و التدّوين حاجة ...ما إنجموش إنخلطو رمضان بشعبان !!! ما إنجموش إنقارنو الفايس بــــــــــــوك بالمدّونة ...كل حاجة في بلاسطها ...و كل حاجة لازمها تخدم خدمتهـــــــــــــا ...في سبيل هدف واضع .

هذا في ما أخص التدّوين و المدّونين .
قاسم قاسم




25‏/10‏/2008

إشكون جاء يخطب فيـــــــــــــــك ؟



شيئ ؟ التدّوين سياسية عندي ...و ما إنجّمش إكون خاطي السياسية ! بالطبيعة بالنسبة للتوانسة ...بالنسبة لشعوب أخرى إنجم إكون كل شيئ !!! واحد يحكي على مغامراتو ...واحد يحكي على سهيرّياتو ...هذيك شعوب إتحررت ! شعوب دفعت ثمن الأنعتاق متاعها ...الشعوب هذيكه الي المدّونين متاعها قاعدين ينتجو في الفكر و في الأدب ...في الشعر وفي التكنلوجيا ما عندهمشي مشاكل كما أحنـــــــــــــــــا في تونس : إضربات الجوع في كل بلاصة !!! تطريد متع طلبة و إساتذة ...تزوير متع قوانين ...رشوة تخبط تعذيب ،هرسلة غورة على أرزاق الناس ...ناس ما هيش قاعدة تخلص وصلتني مايل يا جماعة ...شيئ إدير العار قدّام الناس ...يا سيدي ثمة شريكة فيها أكثر من ألف خدّام ، نحكيلكم في تونس ...أش عمل المدير متاعها ...مع الفيشة متع الخلاص ثمة ورقة ، الخدّام لازمو إصّحح فيها باش يخلص ...إذا الخدام ما إصححش ما ثماش شهرية !!! إشنوه المكتوب في الورقة هذه صدّقو أو لا تصّدقو : فيها مناشدة لزين العابدين بن علي باش إرّشح روحو لأنتخبات 2009 ، هذا و ما يخفاكومشي ألي بن على ديــــــــــــجا ، قبل المناشدة و إترّشح و إربح المدير متع الشريكة هذه ..مازال شادة الصّحيح في الحكاية ...؟؟؟؟ فهمت علاش إنا نكتب في السياسية يا سي المدير ...لأن الشي ألي في تونس ...وصل باش إزوك البقر ...سياسية للصّباح ...

زينب ماك تعرفها ...و قيس ولدي ماك تعرفو ...و امي ماك تعرفها ...و بويا كيف كيف ...حياتي ألي باش إدونها ...إدّونت قبل ما إنولي مدّون ...كل بلاد و أرطالها يا سي المدير ....و الرّطل متاعنا جاء طرناطة كاملة ما ناقصة حتى قرام تدوين ...و إنت ما جاء حتى واحد يخطب فيك ...دّون كما يضهرلك !!! أما خلي قاسم ...يكتب اش إحب و كما أحب ..و على كيفـــــــــــــو ! شايخ !!!!

إذا كانت إتقلّقت من المدّونين ...خوذ راحة صغيرة ..أعمل دورة ...هاذوكم هوما التوانسة ..هاذوكم هوما المدّونين التوانسة ...أنا نحترمهم الكّل : فسيفساء كبيرة ...و فيها طابع من الجمال ...ألي لازمك باش تكتشفو ...هاذوكم أحنـــــا ، توانسة ...بشوية بشوية توه نتعلّمو ...لازمنا نعطيو فرصة لبعضنــــــــــا ! خلي كل مدّون ...إعبر ..إعبر ..حتى يوصل للزّبدة ...يوصل باش يكتب نص ما عاش إطيح من بعدو ألي مرتبة أقل منــــــــــــــــــــــو ...التجّربة يا سيد الرّجال ...تصنع المستحيل ...

كان الشعب التونسي تعــــــــــطاتلو و حتي فرصة صغيرة ...باش يكتشف نفسو ...رانا على الأقل ..خلطنا على إسبانيــــــــــــــــا و غلا البرتغال !!! و لكن على ما راد الله ...ما طاح بينا مرحـــــــــــــــم ...كان ألي إطيّح فينا ذبانة !!! هاكم ما تعـــــــــرفوش ....ما إتنجموش ...فسايدة ...توانسة الفقر و العنتره ...و إلي ما غير ذلك من سبان في أرواحنا ...جلد ذاتي موش وقتو يا صحوبة

أحنا شعب عريق ...و إنجمو إرواحنــــــــــــا في كل شيئ !!! و عندنا الثيقة في أروحنـــــــــا ...و باش ينتصر عندنا الحق ....و باش نربحو المعركة ضد العشوائية و ضد الترهدين ....أحنا شعب عظيم ...من اقوى الشعوب على وجه الأرض ...و ما ثماش وصّية علينــــــــــــــــــا ..لا من بن علي و لا من التّجوع و لا من الطرابلسية ...و لا من أي مخلوق على وجه الأرض .

تحياتي ...الخالصة

قاسم قاسم
.


جمعية المدونين التونسين


أيمها المدّونون ، أيتها المدّونات ،

علاش ما نعملوش جمعية متع مدّونين ، إتعالج برشة مشاكل تتعرّضولها المدّونات ...هاهو المقّص مازال خدّام ! و هاهي ألاوتوسنسير ما زال ما إتخلصناش منها ...أنا إنشوف بالي الجمعية هذه قادرة باش إتحل برشة مشاكل ...و قادرة باش تكبر و إتعيش و إتربي الرّيش !!! كما الصّحافين المدّونين عندهم الحق باش إناقشو و إشاركو بأفكارهم في عدة مواضيع مطروحة على الساحة السياسية و الساحة الجتماعية ...و الساحة الثقافية كذلك ...إذا ولى ضروري باش إتكون عندهم ممثل منتخب ! و قادر باش إوصل الصّوت متاعهم ألي العالم أجمع ...

أيها المدونون ، إيتها المدونات ...هاتو إناقشو الموضوع هذا !!! الجمعية لازمها قانون أساسي و لازمها برنامج و لازمها سبب و لازمها و لازمها و لازمها ...بارشة حاجات ...

كنت إتصّلت بعدة مدونين ...و الفكرة متع الجمعية لقات الترّحيب ... و المطلوب اليوم ..من كل مدّون و مدّونة ...إتقول و أتعبر ...أش لازمها تعمل الجمعية ...كيفاش باش تخدم ...شنوه المطروح عليها ....و إشنوه المشاريع ألي قادرة باش إدّورهم ...

أيها المدونون ، أيتها المدونات ...


لازمكم جمعية ...و يد وحدها ما إتصّفقشي

قاسم قاسم

جبنانية تخوض إظراب جوع متواصل....اليوم التّـــــــــــاسع

جبنانية تخوض إظراب جوع متواصل
اليوم التّـــــــــــاسع

تخوض ثلّّة من الرّفاق في مدينية جبنيانة ، إظراب جوع وصل يومه التاسع للمطالبة بحقّهم في العيش الكريم ...لم يـــــــــطالبو هاؤلاء بشئ أخر ســــوى حقّهم في العمـــــــــــــــــل.

أيها الرّفاق !!!

واصلو الأضراب ...
حاصرو الحصــــــــــــــار ....

قاسم قاسم

24‏/10‏/2008

ماية بن علي و لا مرزوقي ...مليون بن علي و لا الغنوشي... عشرة بن على و لا الشابي




ألي إنكلمو إطيح ذبانة في الأخر؟ كنت نتصور إلا أنا ما عاجبني شيئ ...يا خي الجماعة الكل طلعت أكثر مني ...لا فرق في النفسية غير أني أكتب جهرا و الجماعة الأخرين ما إيحبوش يتكلمو و ما إيحبوش يكتبو الحقيقة متاعنا. أش قال و أش قتلك موش باهي و ربما الدكتاتورية تستفيد من عدم التفاهم متع المعارضة . أنا مقتنع إقتناعا تاما الي العقلية متاعنا ما هيش عقلية صحيحة و لازمها تتكشف و أكثر من ذلك لازمها تتبدل ...ما هيش باش تتبدل بالسكات و الكلام في التراكن... بالطبع الشيئ هاذا لازمو كارط سير طابل باش الحكايات تصفى بسرعة ...على قد ما يجري الماء على قد ما أكون معبى بالأكسيجين.

مشات معاك يا قسومة و لكن كيفاش باش إتغير عقلية ولات ورثة و لات عادة ولات مصيبة على البلاد.؟ تغريرها ما إكون كان ما تتعاود المعارضة الكل ...لازمها هندسة جديدة ...لأنو بالعقلية المعارضة اليوم و بالمحاولات الفردية ما ناش باش نوصلو لحتى شيئ ...الدكتاتورية متاعنا أرخص منها ما ثماش و ما شادة الصحيح كان لأننا ما عرفناش كيفاش نجبدو من تحتها الفراش ...إنعم الطرح لازمو أكون ساهل و بسيط و مفهمو للشعب التونسي ...الشيئ هاذا لازمو تحليل بسيط في بساطة الرياضيات و الفيزياء ...صعبها تصعاب سهلها تسهال ...القانون هاذا لازمو أكون القاعدة الأولى في المعارضة. ...المّوحد الأوحد و الوحيد للقوى المعارضة هو الشّعب التونسي ...إسهلشي من هذه ...ما ثماش ...كان كل زعيم ...إتوجه للشعب و ضيّع وقتو باش إكلّم الناس ....رانا ربحنــــــــــــا ...و لكن الله غالب ...الكبارات متوّجهين لبعضهم أكثر منو للفلاّحين المقهورين ..و العمّال الفقراء ..و التلامذة الزّواولة و الطلبة ألي إتمد في اليدّين.

الدكتاتورية متاعنا ولات عزيزة على برشة جماعة و حتى على شق من المعارضة نفسها لأنها ما لقاتش الفضاء متاعها مع برشة جماعة ...و لذلك ولات تلعب على الحبلين مرة معاهم و مرة معانا ...في الواقع أحنا إشكون ؟ و أنا أشكون بالضبط ؟ وقت الي يوصل أي شخص باش إيجاوب على السؤال هذا و يطرحو على روحو توه يفهم الي الوطن ما هوش مستحقلو و لكن ما إكون ها الوطن إلا بــــــه.

بالعربي و بالدّارجة و بالفلاّقي قاسم حب أقول الي الشخصيةلا زمها إتذوب في العطاء للأخر عندها تتنحى الأنانية و تتنحى المومارسات الفاسدة داخل المعارضين ...أكثركم عطاءا للشعب التونسي أكثركم صدقا أكثركم ثقة بنفسه

بالنسبة لجمهورية قاسم لازمها عشرة من الناس صحاح و رزان لا أكثر و لا أقل بعشرة من ناس متفاهمين قادر إطيح بن علي و ماية بن علي في مرة واحدة...النضام ما بقى منو شيئ و يتمنى أنو يرتاح و يرقد...

مصالحة ...بالضبط هذا أش أحب النضام التونسي ...إحب مصالحة ..أحب شرعية جديدة مقابل تسريح بعض المساجين السياسين و شوية دزان بيدق ...و حّلآن اللّعب كما إتقول برشة جماعة ...نضام دون مشروع ما إعيش كان بالرّقايع ...كل تركينة تلقاوها إمرّقعة ...فيه شوية من الخوانجية الحمير و فيه برشة من اليسار الكلب ...و البقية ذبان لا أكثر و لا أقل.

العاقل و الي يفهم مليح السياسة لازمو يعرف الي هو إيناضل موش ليه إنما للأجيال الجاية و من أجل وطن حتى أنو إنورثو أولادنا الحرية و الكرامة ...أنا إنحب قطيعة صحيحة مع العشوائية و مع التخلويض متع المعارضة و متع النضام ...بدون قطيعة تظع النقات على الأحرف متاعها يستحيل تحرير الشعب التونسي و يستحيل تتبنى عندنا الحرية و الكرامة كما فهمتها في الكتب ...باهي قول أنا أنسان إيديال ...مثالي بالعربي ...أقوللكم و علاش لا؟ وقت الي كل شيئ عندنا ...عندنا الكوادر الاّزمة و المعرفة الآزمة باش البلاد هذه تاقف على سقيها....حكايتنا ما هيش خوف من نضام بن على ؟؟؟؟ حكايتنا عقل ؟ العقل التونسي ما هوش نورمال و ما يعرفش اش يصلح بيه و لذلك قعدنا إنبيعو و نشرو في المقالات لبعضنا ...وقت العقل التونسي يرفض باش يتفاهم هو و الجسم متاعو الي هو الشعب ...وقتها بن علي يعمل أش أحب بالمعارضة و بالشعب .

...النخبة المعارضة الي هي إتمثل الفكر و الي إتمثل العقل المدبر ما حابتش تتفاهم في بعضها يستحيل باش الجسم إنجم ياقف على ساق واحدة ....ثمه توازن لازمنا إنشرشو عليه في العمق متاعنا حتى نفهمو و نقتنعو باننا قادرين باش نقعدو مع بعضنا ونتفاهمو على مواجهة بن علي و إلا حتى فرعون ...المعارضة ما هيش حابة تقتنع بألي هي قادرة.....ما هيش عارفة أش تعمل جملة .... و كأنها فاقدة الثيقة في نفسها و كأنها خايفة و كأنها حاشمة من بن علي و إلا من الزبانية متاعو ....موش عارف يا ناس !!! المعارضة متاعنا قريتشي تجارب شعوب أخرى ؟ كيفاش عملو ؟ حتى الفوسكة ما تعرفش تستعملها ....إتقولولي نضام بن على قوي ...؟ منين جاتو القّوة ...؟ أضعف منو في العالم ما ثماش ...نضام بلا مشروع ...بلا فكر ...يعني فاشل ...و لكن و الواضح ..أحنا أفشل منــــــــــــــو لا أكثر و لا أقل ...

حتى صحافة معارضة ما نجمنتاش نعملوها ...دون صحافة كبيرة و واقفة ...دون أقلام صحيحة ما غصير شيئ ...كانك معملّين على تونسنيوز ...إنقوللكم ...إنســــــــــو ! و برّكم بعيد....الصّحافة الي قادرة تصنع ثورة هادئة ...راهي صحافة مناضلة !!! إتعلّ/ الناس كيف تكتب على الحيوط بالتّباشير ...إتعلّم الناس كيفاش تخرج من الغيران متاعها ...الصّحافة المعارضة ...راهي صحافة الشارع التونسي ...لا اكثر و لا اقل ...إتكون أقرب لمشاكل الناس من الحاكم نفسو

لابد من الكاريزيم باش تربح ...إذا أقتنعت الي إنت ماكش قادر باش تنجح ما تنجحش.أما لو الجماعة هاذم أقتنعو بألي هوما قادرين باش إدورو البلاد و قادرين باش إطيحو نضام بن علي و يجبروه على التخلي و الله لا إيزيد فيها ليلة في قرطاج ...الربيع من باب الدار يبان ...و ربيعنا حسب من إنشوف ما زال بعيد.

كيفاش باش إنحاربو العقلية المتردية هذه و كيفاش باش إلّمدو الروس الكل متع المعارضة في بيت واحد ؟ الشيئ هاذا يا جماعة لازمو جيل كامل أخر من داخل المعارضة ...أنا إنشوف أنو تنظيم المعارضة ما إنجم إكون كان من التحت معناتها من الوطة خلاص ..بالتّوجه للشعب ...توه إوحدها غصبا عنها ...توه إصفي وحدو ألي ما حاجتوش بيه إطيرو الشعب ......المعارضة و الناس المعارضين الي مازالو صغار لازمهم إيعاونو الجماعة الكبار باش يتفاهمو و يجبروهم على الشيئ هاذا ...بالعربي ثمة برشة ناس باهية داخل المعارضة و ما عندهاش حتى ماورائيات و لا حتى طومحات باش تترأس جلسةو ألا حتى مؤتمر ...الناس هاذوما لازمهوم يقعدو مع بعضهم و يكونو لجنة صغيرة ...لجنة أتصال بالمعارضين الكل في العالم ...من الداخل و من الخارج ..بعث اللجنة أمر ولى ضروري.

لجنة هذه لازمها إتحضر لمؤتمر إتجي فيه الروس الكبار متع المعارضة الكل من الغنوشي لحمة الهمّامي ...الفار و القطوس ........ ...الحمامة، صاحبي متع تونزين عندو برشة يحكي على الشيئ هاذا و لكن المشروع إمتاعو و لا حب يرى النور...تعرفوشي علاش؟ لأن كل واحد إحب يتزعمو ...

مشكلتنا يا جماعة في كثرة الزعماء ؟ يا سيدي في تونس تعرف و إلا ما تعرفش ..قاري و إلا موش قاري قادر إتولي زعيم ....ما حبتش العباد هذه تفهم إلا لازمهم الصبر و المثابرة و الثيقة في النفس و المليح توه يوصل كان حب ربي ...برشة جماعة في المعارضة زفر عليها الترينو و كل وين إتشوف حاجة باش إتصير و إلا صارت ديريكت إطيحو فيها ذبانة قبل حتى ما يوصلو باش يعرفو النتيجة متاعها ...الشيئ هاذا نابع من حاجة وحدة و من قانون واحد : في التراب و لا الشعب التونسي ...موش لازم باش ندخل في التفاصيل متع الشيئ هاذا و لكن حتى القبلية موجودة و ضاربة إطنابها كما حابة....معارض مازال إعيش في مفهوم فضاء ضيق كما فكرو و نقصد به الفضاء السياسي و الفكري القبلي أحسن إنو المعارضة تفوتو بمحطة لأنو ما هوش قادر على المعارضة بمعنى البناء و إنما إعارض باش إهدم لا أكثر و لا اقل.

شعار المعارضة الجديدة قريب باش إولي : ماية بن علي و لا مرزوقي ...الراجل يخدم و إقدم في عمل جليل للوطن الكل و لكن برشة معارضين ما هوش عاجبهم المرزوقي موش لأنو صاحب فكر و فلسفة إنما لأنو مرزوقي لا أكثر و لا أقل ...و كأن المعارضة هذه هابطة من القمر و ألا من جنس أخر و إيفوتو حتى التوانسة الكل في الأصل و الفصل. الجماعة هاذوما قالو ألي المرزوقي لآيكي ياسر ...ناقفو معاه و غدوه يعمل فينا ما عمل بن على في جماعتو ...لا لا ما إساعدناش ...و كأن المرزوقي ما دافعش على التوانسة الكل وقت الي سكتت برشة جماعة ...ما إيهمانش في الحكاية هذه و هاتو الصحيح و خوذو راي قاسم أحسن من أنكم إتضيعو الوقت في الدوه الفارغة كما عملت بارشة ناس.....يا سيدي إستعملو المرزوقي....خلّوه إغطي بقعة ...قطار و إلا حتى عشرة قطارات .....من بعد أعطوه في ظهررو ماهي عادة العرب و الشيئ هاذا ماهوش غريب عليكم ....و قداش من مرّة إتعملت الحكاية هذي في تاريخ تونس المعاصر.

كيف كيف الشابي موش عاجبهم ! عامل صحبة مع الخوانجيّة هذاك و إترّشح للرئاسة و ما شاورش ...و زيد من توزر ...من الشابة ...ماهوش قافز كي جماعة تونس العاصمة ! و زيد عمل برشة إضرابات متع جوع ...و رجّع الحكاية صنعة ...التوانسة ولى إختصاصهم إظربات جوع و السبب في ها الحكاية الشابي ّ...طلّعو شعار جديد : ماية بن على و لا الشابي ...ماهوش عاجبهم ...و لا طرف : هاذوكم هوما التوانسة ...ما ثماش ...يا نهار أحرف ...ثّمة مرزوقي واحد ....من دوز ...و شابي واحد من توزر ...منين إتحبو إطلّعلّكم معارضين ...نخلقهم أنا ....إنجيبهم من اليابان ...هذاك الحاضر


و زيدها لصّّ ، مليون بن علي و لا الغنوشي ...و موش عاجبهم ...أهلو ناكرين فيه ! جمعيتو ألي عملها ..خرجت على الطاعة متاعو ...و ألكلها إتحب إتولي أمراء ...الخليفة الغنوشي ...قالو لا و ما إساعندناش ...و زيد من الحامة .....أوه ...أوه ...أوه يا الحامة ، الناس إتقـــــــــــــــــول

ثماش واحد أخر يا جماعة تعرفوه ...معارض و عندو في راسو ما إقول ، دون الغنوشي و الشابي و المرزوقي ...أنا ما نعرفش ...هاني نستنى فيكم ..على أحر من الجمر باش تخلقولي واحد ...عندو ما إقول ...و عندو على الأقل حاجة تستر...

حتى واحد ما هوقادر باش إكلّمكم باللغة هذه كان قاسم لأنو عندو مبدأ و ما يكسرها لحتى حد ...أنا جيت بجمهورية ما نيش جايكم من الجبل ...المهم و الي حاجتي باش نوصلو ...باش تتفاهمو و إلا لا؟ باش إتريضو و تشوفو بعيد و إلا ؟ باش تسترجلو و إتسبقو مصلحة البلاد على مصالحكم الخاصة و إلا لا؟ السؤال هاذا مطروح على الناس الكل اليوم.

الرسول صلى الله عليه و سلم وقت الي حكم في قريش و أعطاهم الحل باش إيحطو الحجر الأسود في الحيط كان يعرف ماية في المية النفسية المتغجرفة متع العرب و أهل قريش ...اليوم الحل واحد ...و ماثماش غيرو ...من كل عائلة سياسية واحد و العمل كان على ربي ...موش على أفكار طايشة لا فيها لا لون لا ضو.....هاتو إنفشّخوخ بن علي في إنتخابات ...صحيحة ...إنخرّجوه يديه على راســـــــــــــــو ...هنا يا ناس إتولو عملتو ..........الثورة الهادئة ...

المهم الموضوع هاذا ...موضوع اليوم ...و البلاد من لحظة لأخرى قادرة إطيح في أيدين ديكتاتور أخر معبى بالفلوس و قادر إيبعها مرة أخرى و تجهض عندنا الديمقراطية و ما يسلم لا من كتب و لا من قرا جملة ....كان تسترجلو و إتنحو عليكم الكلام الزايد و هذا به و هذا عليه و هاذا كان و هذا ولى ... أحسن من ان تكتبو كل يوم جريدة ما عاد يقرى فيها حد كان بعض المثقفين في الجغرافيا السياسية ....الناس ماتت في الحبوسات و الناس ماتت بالشر في ديارها ما بين عائلتكم و قدام عيونكم و أنتم قاعدين إتناقشو في أشكون باش يتراس جلسة تنفع البلاد و إتخرج البلاد من الفينقة .....


قاسم قاسم