الفجــــــر

كن ... جميـــــلا رائعا و بديعا

وأرســـــم لقاسم طريــــقا إلي قلب البركــــــــان

تناديني تحمـــر شفتاه

يمد عنقه
يعانقني اللّهيب
أذوب في ثورة العصافير

هل أصبحت الثورة عـــارا

و الخــــوف دينـــــا و الوطن بيت دعارة

أخذتم من الذل سقيفة ومن الحقد فراشا سقيتم الأرض سمــــــا

و شر بتم علقما و تريدونأن ينزل المطر

لا وطــــــن دونها و لا حب بعدها زينب و حريتــــــــي

ينزف دما نهدهـــــــا يتمزق يوما بعد يوم خصرها

ولكني أحبهـــــــــا لا بل أعبدهـــــا وأهدي لهـــــــا قلمــــــا

وأكتب على جبينها قصيدة أخــــــرى

تبختري حبيبتي كما شئــــــت لا كما يشاءون

فهم لا يعرفون

غظب زينب

و فحم البراكين

لـــــــــي قصة يا زينب

سأكتبها لك عما قريب

أنت و البركـــــان

منتظرا إلا غمزة منك

لفتة منك قبلة منك

قلبة تفجرمن داخلي البركان

قاسم قاسم

فــــــــــــــــــــــاصل

إعلامي

قبل ما إنكمل فيلــــــــــم الجبّة الخامسة و كتابة الأحداث متاعو بالتفصيل ! قلت علاش لا ما نعملوش راحة صغيرة مع فيلم قديم و لكن متجدد ! في نفس الوقت باش إنبدّلو إسمو ...يا جماعة ! في بالكم الي حزب التجّوع هـــذا ماشي لمؤتمر ( التحدي) ! مش عارف في إشكون يتــحدى بن علي ؟ هيلمــــــــــان و ببرابقندا في الفارغ ! إسمع و أفزع ! و لينا كي ليبيا ! العقيد يتحدى و إيزيد يتحدى ! و إجبد من هاكه الــــــــــلّوي !!!! معناتها مهزلة بأتم معنى الكلمة !!!!
إنخيلكم إذا مع زبلة الي باش يترشح لمؤتمر التحدي هذا ! كيفاش عمل و كيفاش عملت جماعتو ...باش إتكون عندكم فكرة ...البلاد بين إيدين طاحت !!!! أحنا أش نعملو !!! في الوقت الكلب هذا !!! ؟

قاسم قاسم

القوفــــرنار

الجـــبّة الخامسة 5

القوفرنار جينرال سمع بالخبر ! و اللّجنة في الثنية باش تخترق الحدود متع المحافضة متاعو! من حينو بـــدى إشرشي في نصبان الشيـــراك متاعو : بالعربي منداف ...سركلها بالمناديف و دخل للبيرو متاعو يستنى فيهم بفارغ الصّبر ! يتحلّف و يتكتف كان ما يربطهالهم ! و يخرج سلامات من الحكاية ! جبد كل المقالات و الكتب و بدى إراجع في دروسو ! و إشرشي في الخشلات...بلاد كاملة تخدم بالخشلات و الحشيات ! كان تعدى عليه أمشى باصى ! و سلامتكم في بودورو و في المحافضة !!! الليل قال طــق ! و الجماعة حلّو الباب البراني ! و لا منداف قال نخدم ! إتعدو إتقول ما ثماش شيئ ! عندهم كلاب إتشّم ريحة المناديف من بعيد !
الجماعة دخلو و الرّاجل ، دخل بعضو و نسى كيفاش باش يتصّرف مع العصابة هذه! القراية الي قراها الكل و كأنها طارت من راسو ! و الخشلات ذابو قداّم السلاح و سياسية الترّهيب و الترغيب!
لازمتنا شاشية للمرّشح متع حزب التّجوع ! شاشية تقلب المخ موش متع ألي باش يلبسها و لكن أمخاخ التوانسة! أحنا حاجتنا بالمواطن !!! في فترة الأنتخبات و بس !!!! كبـــوس سحري ! إخلي التوانسة تقتنع بالمرّشح متاعنــا بدون ما نلتجؤو للعنف اللّفضى و البدني ...هذه يا سيدي أسموها زاورة الديمقراطية ....وألا برّ إنقـــــولو : بطانية الديمقراطية متع بن علي ! إنظن يا سي القوفرنار إنك فهمت المقصود و المعنى الصّحيح متع الشاشية هذه!
القوفرنار: فهمت و إستفهمت ! بالعربي إتحبو إتغولو الجماعة بالشاشية !!!! شاشية رادار! إتبث المعلومات و البرابقندا من راس بن علي و على الهواء مباشرة ألي روس الشعب التونسي بالكامل ...بدون أي وسط ...هاهي ولات WIMAX الشاشية متاعهكم ! تكنولوجيا جديدة متع الأتصالات ألأسلكية و على ذبذبة طرابلسية !!!!

بالضبط هذا الي حاجتنا بيه شاشية بأسم بن علي على ذبذبة طرابلسية !!!! إرّضو الناس الكل و حتى واحد من العائلة المقدّسة ما يغضب ...الناس الكل تاخو بايتها من شبعة 2009 ! إما لا يا سي القوفرنار ...الوطنية متاعنا إتمل علينا أنو نقسمو البلاد بين جمعتنا و إكون المترشح راضي بالقسمة ...ويا أعطك الصّحة في الديزاين هذا !!!! شاشية رادار ..إتبث على العالم الكل !!!! وقتاش تحظر؟
بشوية ...بالشوية ...هذه لازمها جنون متع تليـــــكوم ! و ما هو في بالكم بالي إتباعت في حفلة بيع لا قعد يا حمد !!!

إستنى حدّك حد المسقى ...الشاشية لازمها ما إتبش الأخبار المقودة ! و الظربات الصّحاح ! هاذيك حاجات من أمن الدّولة !
أنا قلت ما ثماش مهندسين صحاح ! أعني ! موش نعني البيوع متع التليكوم ...حشاكم !!! إنتم ما تخدمو كان مصلحة البلاد ! جيوبكم خطيها ...فارغة إتصّفر ...شوفو يا جماعة أنا من ناحية الشاشية قادر فقط إني إنصّورها ...عزيزي مهندس متع شاشية و حفظت عليه الصّنعة ! أما راهي باش إتكون ناقصة برشة قطايع ...بصراحة ما إنجمهاش ...و لكن نبعثكم لواحد يخدم في أمريكا و إتنجمو تتهاملو معاه حتى بالمايل ...الحانوت متاعو إمسكّر من تونس ! عمّار هذاك الحمار شّمعـــــــو عندو مدّة ....عليكم يا جماعة بسمســـــــون أمريكا!!!!!!!!!!!!!!!

ما ثماش حل من هوني ...؟
لا
إتصّلو بيه ...أوليد يعمل ستة و ستين كيف ....توه إشوف كيفاش يشري القطايع متع الرّدار و يبعثهم على البريد السريع !!!
إنعملو عليــــــــــــــك يا سي القوفرنار ....
العمل على ربـــــــــي ...و منا ل 2009 لازم ألبسوه ...يخرج عريس !!!
العقبة ليك يا سي القوفرنــــــــــــــــار !!!!!
العريس أعرّس ....و الحمار يتهّرس.......تعرفها.
نسمع بيها ّ

في أمان الله ّ

kacem kacem

أربيـــــــكا

الجـــبّة الخامسة

4
عصابة التّزوير متع إنتخابات 2009 وصلت لمحطة القطار في تونس، قاصدة ربي لدار أرابيكا. المخابرات الكل في جرّتهم، حماية خاصّة بالسلاّح البارد و السّخون ! كي دخلو الترينو ، الناس الكل خافت و شدة الحيط ! الصّغيرات إتمرعشو من فوهة السلاّح و من الماسك ألي على وجه كل مجرم من عصابة بن علي و التجمّع ! على الحماية الأولي، ثمة حماية أخرى ! عصابة الطرابلسية إتبع في الخيط بالسّنتيمتر ! كان تخرج الجبّة موش على قياسهم إباصـــــو الكل و الفلوس ترجع و المعامل تتفك من جديد !

أربيكا موجودة في الترينو ! الي فيه العصابة و ما هيش فاهمة ألي الجماعة إشرشو فيها بالفتاشة ! لا في علمها لا في خبرها نزلت من الفقونة كما العادت و شدّت الطريق لدارهم ! إتحس بيـــــــد مجرمة أتحطت على كتفها !
واصلي السير ألي الأمام و لا تتكلمي ! إمشي و ما تتلفّتشي وراك !
البنية كانت أربيكـــــا ! و بدى العرق أصب و دخلت بعضها و فشلت من يدّيها و ساقيها ! البنية إتبكمت و كلمة ما نجمتش تنطقها ! شادها واحد من الباندية من ذراعها الأيمين و يمشي بجنبها و بنفس الخطوة ! طاحت المرايات متاعها ...ألتقطها واحد أخر ...و حطّها في جيبو ! الثنية لدارهم مازال طويلة ...ترى شنوه دار في راسها و قالت خلي إنبدلت الطريق ! لا إتباصي العائلة الكل جرّتي ! ما هو ثمة نشاء أرجل من الرّجال ...أرابيكا وحدة من أبطال جمهورية قاسم : ذكية و قادرة تلقى الحل في فراكسيون متع سكوندة ! و كأنها إطمانت ! بل طمّنت روحها ...و قالت للمجرم ألي شادها من ذراعها :

أش قولكم ..نمشو نحكيــــو في القهوة و إنشوف الطلبات متاعكم !!!! أنا إنخلّص عليكم !!!!!!
علاش لا ؟ من حيــنك يا أربيكا ...جيناك بقضية بسيطة ...ما أتخافش ! رانا نخدمو مع الحاكم ! من لجنة نزوير إنتخابات 2009
دخلو القهوة ! !!! واحد شد الكونتوار ...واحد أخر في الباب ..و زوز خرجو الكليونات الكل! و كانت القهوة عامرة ! و كانت الناس رايضة تشرب في الشيـــّش متاعها و تحكي على مشاكلها ...ألي خلّص خلص و ألي ما خلّصشي كان يستنى في الحكاية باش يمنع و يفلت ! شعب يستنى في حوجة، في خوماضة / باش يخطف و ألا يسرق و ألا أغور ...و إلا يهرب بفلوس الخلق.
قهوة السعادة هذه ! فوق باب الطـــوالات متاعها موجودة تصويرة الرّئيس في جبّة عربي ! و لكن صغيرة و موش واضح ! واحد من جماعة العصابة ...شافلها و شاف للقواهجي في نفس الوقت...كي فهم صحوبة ...بال في سروالـــــــــــــو وراء الكونتوار !!!! كي شافو ما عاش فيه ...إحل الكاسة و يجبد منها الفلوس الكــــــــــل و إحطهم في جيبو !!!!

أرابيكا قاعدة مع زوز أخرين متع العصابة في وسط القهوة ! البنية شادة روحها ...و واثقة في نفسها ...أتقول جبل !!! الجمال متع أربيكا و الســـيريو متاعها ! عـــقّد المتحدث بأسم لجنة التزوير ...عيونو ما نجمش إهزّهم فيها !!!
أش قلت ؟
أنا قتلك يا أربيكا ، الجبة هذه لازمها إتكــون على قياس بن علي و على قياس الطرابلسية ! في نفس الوقت ...و إنت خّمم و إفكّر كيفاش باش تصنعها !!! من الظروري جدا ! أنو الجبة هذه إتكون كعبة وحدة في العالم ...نسخة وحدة !!!!

ما فهمتش ! كيفاش جبـــّة أتحبوها ...إتجي على قياس راجل و مـــــرا في نفس الوقت ؟ ما دخلتش موخي ...زيدو وظحــــولي الحكاية ...كيفاش إكون طولها 1.80 متر و في نفس الوقت 1.65 متر ...يا خي أوتومــــــــــــــاتيك ..إتبدّل الطول و العرض متاعها على إشكون باش يلبسهـــــــــــا ...هذه ما إتكون كان جبة ذكية ...إدابتاتيف ...
أه بالظبط ..لازمها الكمبـــيوتر ...و التقنية الحديثة ...الجديدة هذه !!!!
إه قولي من الأول ...إتحبو حاجة أخر موديــــل ...وصّلو العلم !!! عليكم بالقوفرنـــــــــار ! أنا مازال نخدم بالتكنولوجية القديمة ...بالكيكانيك الكلاسيكي ...القوفرنار هذاك أخر واحد إتخرج من مدرسة صناعة الشـــــــــــــاشية ...تونس باش إشتهرت في العالم : بالكبوس !

يا إعطك الصّحة يا فالحة ! ذكّرتني بالشاشية !!!! كيفاش جبة بلا شاشية ؟ لازمنا حتى شاشية، نسترو بيها الراس ...و الجرايم الي عملها الراس !!!!!

تعرف كيفاش ...يا إمعلّم ..لازمتكم حتى بلـــغة عربي من دوز ...باش إتغطو كل شيئ و إتولي اللّبسة بالحـــــــــــــاق أصيلـــيّة تونسية ....عليكم بالقوفرنار في الشاشية ! و بالناقد في حكاية البـــــــــــلغة



kacem kacem

أزواو سامنديــل

الجـــبّة الخامسة 3

الحانوت متع أزواو سامنديل إمسّكر توه عندو قداش ! ما إحل الحانوت، كان في الليل أموّخر ! و في ساعة قليل إشكون يشلق بيه ! عاشق الأذان سي أزواو سومانديل ما إفيق كان كي المؤذن أنادي : هيـــّا على التدوين !!!! ما إتشيخــلو و يطلع بلحن جديد و إلا بديزاين متع أخر موضة كان ما يقرى شوية أحاديث و شوية قصص و بوطولات طورة بورة ! الراجل من الولع متاعو بالتاريخ الخوانجي، أنــو زار مزار الشريف و كتب عليه لحن طلع إجنن( ههههههههه).

الشيخ أزواو سامنديل ، خرج من الدّار قاصد الحانوت ، في المدينة العربي بالطبع ، جاية في راسو تدوينة ، عندها إدور أكثر من جمعة ....كي الدجاحة الي باش تلد عظمة ...يمشي و العصب معاه ، القدم متع الصّباط إغوص في الكياس! طق طق تتك ..إتقول عسكري في وقت الأستعمار ! هو في الواقع مازال ما خرجناش من إلأستعمار الجديد !!! إستعمار بن علي و الجّوع و الطرابلسية !!!! هنا بالظبط حبيت نكتب شخصية عاشت في الحفصية في وقت من الأوقات ، الراجل هاذا عاش باندي طول عمرو و ما حكم فيه و لا عسكر و لا بوليس ! لأنو قام في يوم من الأيام بواجبو الوطني و إشد زوز عسكر فرنسيس غفصّهم في السوق العربي متع العاصة ! إقولو الي الدّفينة متاعو حظرت فيها الحكومة ! و أقولو كيف كيف الي بورقيبة جبد عليه في خطاب مرّة من المرات ! إنسيت إسمو و ألي حكالي حكايتو ما نجمش يقنعني وقت الي بديت نسأل فيه !

المهم الشيخ أزواو سامنديل إذكرني بتراث عزيز و غالي و كم تمنيت إني نقرى قصص متع ناس بسطاء صنعت التاريخ في هاكي المدينة العربي ! الي الجريمة ولات فيها اليوم الخبز اليومي متع عصابات التّجوع !
وقت ألي وصل الحانوت سي علي يلقى الجماعة يستنو فيه و الخيط بين إيديهم ! صباح الخير في صباح الخير ...شعل الضوء ..شد الشيخ بلاسطو وراء الجــــــــــّداد و قال للجماعة إتفظـــــلو ..و الدار داركم !!!! طلباتكم !!!

سي علي جيناك بقضية صغيرة ...لازمتنا جبــّة للمرّشح متع الحزب إتغطي كل شيئ و في نفس الوقت إتكون مبروكة مسعودة علينا و عليه في إنتخابات 2009 ...إنحبو جبة إنغلطو بيها العالم الكل ...إتوري ألي صانع التغير ما بعدو حد و لا قبلو حد ...هو و لا أحد ! إنحبوها مصنوعة بإدين من ذهب ...متشّبعة بتاريخنا ...الباهي منو ...الخايب لا ّ ! جبةّ تمحي تاريخ تونس الكل من حنّبعل إلي بورقيبة و إتخلي كان بن علي و ليلى و قصّة الحب متاعهم!!!!! و حبّهم هذا راهو من حب تونس و فلوسها ...التاريخ لازمو يبدى منذ التغير...سي علي الجبة راهي مقدّسة و ما إتجي و ما إتنجم يلبسها كان بن علي! و ما إتلبســـــهالو كان المرا عندو ! رزمك تاخو حذرك من كل شيئ ...و ماك تعرف تغلط غلطة راك إمشيت زيزي ، إنت و حانوتك!
أزواو :
معقول ياسر ...جبتكم هذه لازمها عدّة إختصاصات ! موش كان أزواو ! ثمة حاجات قادر إنعطيها ...حاجات صغيرة ، كما إنقلاب شبعة نوفمبر ! هذاك جاء في وقتو ! و إنجم نلقى رقاعة و حكاية باش نبدى ...ما هو التاريخ إتحبوه يبدى منذ الشابع من نوفمبر ! أما عينك ميزانك ..راهي الجبة إتجي ناقصة ..جبةّ ميــــــني ، فوق الركبة ...هكاكة إتولو بالحاق تتمنيكو على تونس كل ! و الراجل ما يقبلش يلبس حاجة فوق الرّكبة ...إتولي الحكاية ما عاش محتشمة ...و ربي إقول ...إسترو ما إستر الخالق !!!!
باش إنكون واضح معاكم ! لازمكم تلقو ناس أخرى أقوى مني في الترقيع ! أما من ناحية البداية إنشاء إتكون على أيدين من ذهب ...و راهي حكاية الجبّة هذه ما هيش ساهلة كما تتصّورو ...لازمها دبيغة و صبيغة و برشة أنــــواع متع تكنيك ...موجودة في تونس و ننصحكم باش تمشو إتشوفــــــــــــــــــــو خياطة صغيرة ، متخرجة من مدرسة القوانين ! إسمها ....أربيـــــــــكا ! بنية تفهم مليح و ربما تلفي حل في حكاية الأستفتاء متع 2000 ! ما تنسوش راهي ثمة قضية في المحكمة مازال تستنى ....لازمكم خياط قاري القانون الدستوري متع الأستفتاء !!! عليكم بأربيكــــــــــــــــــا !

الجماعة خرجـــو من الحانوت ! و سي علي إتنهد !!! و قال : و الله حصلة ! شعرة لا مشيت زيزي !!! و بالحرام لا ألقاو إشكون إحل حكاية الجبة هذه و لو أمشاو للمريخ !!! سي بعث برسالة على البريد السريع للجماعة الكل !!!! ياش يستعدو لأستقبال لجنة التّزوير متع إنتخابات 2009 ...يدو على قلبــــــو ! خايف لا واحد من الجماعة إطيح للتّجوع و التشّمع و يدخل تحت غطاء العصابات ...بأسم الوطنية و عمار بن زور.